Aisaya 38:1-22
38 A teleŋ koŋ, mi Hɛsikaya del a naa, nduyɛ ndoo lo niŋ chobe mbo vi. Mi wana suaa le Mɛlɛka wo Aisaya, po Amɔɔsi wo huŋ naa ndu chua. Mbo dimul ndu aa, “Nyɛ Chɛhowa dimi wo cho hoo ni: ‘Choŋguŋ yuŋgu numndo, kanifuule a nɔ le piɔmndo sɔlaa. A cho sioŋgɔɔ a naa hoo le.’”
2 Okoŋ, mi Hɛsikaya muli hɔlla o kpeloo kɔɔli, mbo kandu piɛileŋ o Chɛhowa lo aa:
3 “Oo Chɛhowa, I nyɔɔlu num a yandii, loonuŋ a mɛɛ ya chɔm lo lechoo wo o numndo a kɔl nuu kpou yɛ, nduyɛ a mɛɛ ya tosa nyɛ cho o kɛndɔɔ wo num o hɔl lɛ.” Okoŋ, mi Hɛsikaya kandu chaŋndo tau tau.
4 Le hei, mi Chɛhowa suaa o Aisaya lo, mbo dimul ndu aa:
5 “Miiŋgu pila ma kɔ dimul Hɛsikaya aa, ‘Nyɛ Chɛhowa, Mɛlɛka Deeve finya num mama dimi wo cho hoo ni: “I tuei piɛile numndeŋ, nduyɛ I che mɛmɛma ŋ tusi waŋ. I cho yoomu numndo* chɔɔlu bɛndi le wɔsilaŋ 15,
6 nduyɛ mi piŋi num a chioo hoo masaa le Asiiliaa o ba. I cho chioo hoo manda.
7 Tamaselii Chɛhowa cho soliŋ kpeku le chɔmndo maa nyɛ ndu Chɛhowa dimi wo cho peelɔŋndo cho hoo ni:
8 I cho tosa mi wunduma cho naa helaa* Ehaasi wa waŋ ma miiŋgu amakɔɔ le nɛiyo tɔ.”’” Okoŋ, mi paaleŋ le miiŋgu amakɔɔ le nɛiyo tɔ o naa helaa, mi che bɛɛ lee kuɛ niŋ lachi.
9 Nyɛ Hɛsikaya, masaa le Chuda poonyiaa wo cho hoo ni, boondii o wa a naa nduyɛ mbo siaŋgu ve.
10 Mi dimi aa: “Mi che bɛɛ I yuuwa wɔ le,Kɛ I nɔ mi kuɛ o Sɛiyo* niŋ.
Wɔsiŋ nuŋ chuu le mi huŋ wuoo.”
11 Mi dimi aa: “I cho lɛ Chɛhowa chɔ le. Chɛhowa, o cho o lɛŋnde wanaa cho yoomu wa niŋndo.
I chi lɛ niŋ waŋnda chieeya le,Te I huŋ kɔ pɛ o lɛŋnde nyɛ o nyɛ yoomaa cho le wo.
12 Fondaŋ ni chalaa cho ko maa tɛndii wana mandaa lasaa,O nda puusiaa ma kuaŋnuŋ a ndu wo.
I simbul yoomu nuu mɛɛ wana womulaa simbul nuaa kola o chii womul lo yɛ.O kili kili ya, mɛɛ nda kili kili nuaa kɛi tuandaa yɛ.
Chɔŋ idii haaa mi nyumndaŋ ma tol, o nyɛpalaa niŋ koni ŋ mal la ni.
13 Mi kɛsi kɔl nuu haaa mi paaleŋ le sɛ.
Maa kpɔkuŋ,* a cho hiouwɔɔ lachi a paala nilaŋ kpou yimi yimioo.Chɔŋ idii haaa mi nyumndaŋ ma tol, o nyɛpalaa niŋ koni ŋ mal la ni.
14 I cho hiouwɔɔ lachi a chaŋndo maa you velaŋ a lɛfɛŋndo wo.I cho hiouwɔɔ lachi a chaŋndo naŋ chaa piiŋndo ni.
Hɔltaŋ la saŋga ya niŋ a tofaa o choo choo niŋ.
‘Oo Chɛhowa, I cho bɔɔ o nyɛ nɛiyaa kala kalaa niŋ.Simnuŋ wana ni malaa!’
15 Yɛɛ kpeekpei ya nɔ yɛ mi dimi?
O soo naa ya chua, nduyɛ mbo tosa.
O yoomu nuu niŋ kpou, I cho wa wana tusiaŋLe mɛɛ suɛi kɔl tambɛiye komal la yɛ.
16 ‘Oo Chɛhowa, diomnda numndaŋ a sɔɔŋ ŋ tosa woŋ tosa ni mi wana o wana wa yoomu.Nduyɛ, muŋ tosa ni mi wa yoomu.
A cho tosa mi seŋgu, nduyɛ mi wa yoomu.
17 Yɔŋii ya wa o kɔl nyulu niŋ yɛ, mi nyɛ nɛiyaa kala kalaa komal la.Kɛ le mɛɛ ŋ kaala ya tau yɛ,Ma piŋi ya o sooŋ tɛɛmbaa niŋ.
A chua hakila nilaŋ kpou ma viaunuŋ ndaŋ amakɔɔ.*
18 Kanifuule, Sɛiyo* nɔla mbo ke num bɛɛleŋ te,Nduyɛ piɔmndo nɔla mbo saŋgala num te.
Wanaa cho kɔlaŋ o sɛiyo niŋnda nɔ tiindaŋ le sakpoyɛi numnde le.
19 Wanaa cho yoomu wa nɔla ma saŋgala num,Mɛɛ ya cho num hau saŋgalaa nuaa yɛ.
Finyaa nɔla mbo pɛɛku puaa nduaa o velu wa a sakpoyɛi numnde okɔɔ.
20 Oo Chɛhowa, piŋi ya.Nduyɛ ŋ cho num chonduŋ nuŋ solul a nyɛm chaaŋ iyooŋ,Teleŋ naŋ cho wa yoomu wo kpou, o chiɛi Chɛhowa wo niŋ.’”
21 Okoŋ mi Aisaya dimi aa: “La huŋ a kato nda toosiaa a fikiima vesɛiyaŋ ndo mi la sui o hindɔɔ, le halikpeŋ mbo seŋgu.”
22 Hɛsikaya ndoo nyuna niŋ aa: “Tamaselii kuɛɛnɛ chɔm yɛ maa I cho lakɔ o chiɛi Chɛhowa wo?”
Tɛɛsiaalaŋ
^ Hibuluiye, “palɛi numnde.”
^ Ɔɔ “Naapum wunduaŋ o naa helaa haa waŋnda ndaa tofa ni le teleŋndo chɔmndo.”
^ Ɔɔ “Siɔl.” Koŋ cho ni, sɛila waŋnda chieeya kpou. Tofa Tɛɛsiaa.
^ Ɔɔ “yalakana.”
^ Ɔɔ “ma faŋa laŋ kpou num o hɔl.”
^ Ɔɔ “Siɔl.” Koŋ cho ni, sɛila waŋnda chieeya kpou. Tofa Tɛɛsiaa.
