Aisaya 39:1-8
-
Wanaa nda vem fulaa Babilɔŋ nda (1-8)
39 A teleŋ koŋ, mi masaa le Babilɔŋ, Mɛlodaki-baladaŋ po Baladaŋ ndo yɔŋ Hɛsikaya yaulaŋ a kioo. Kanifuule, mbo tuɛi maa o wa a naa nduyɛ mbo siaŋgu.
2 Mi Hɛsikaya bii wanaa masaa vem nda nyɛkɛndɛi,* nduyɛ mbo chɔm nda nyɛ o nyɛ wa o chiɛi nda kɛsi nyɛm baa kalaŋ ndo niŋ. Mbo chɔm nda kaniŋ humboŋ, kooliiyoŋ, chuɛima baasam ndaŋ a chuɛima sɔvɛma cheleŋ, nyɛm ndɔŋ chɔuwoŋ kpou, a nyɛ o nyɛ wa o fondaŋnda nda kɛsi nyɛm baa kalaŋ ndaŋ niŋ. Nyɛ o nyɛ ve o chiɛi lemasa Hɛsikaya wo niŋ, a o masale ndɔleŋ bɛŋgu mbo kɛɛ nda ndu chɔm te.
3 Okoŋ kɔɔli, mi Aisaya, wana suaa le Mɛlɛka wo huŋ o Masaa Hɛsikaya lo, mbo nyuna ndu aa: “Kuɛɛnɛ puaa haa fula yɛ, nduyɛ yɛɛ nda dimi yɛ?” Mi Hɛsikaya muli aa: “Babilɔŋ pɔɔli nda fula ni.”
4 Mbo nyuna ndu vɛlɛ aa: “Yɛɛnɛ ŋ chɔm yɛ nda o numndo chiɛiniŋ?”* Mi Hɛsikaya muli aa: “Mi chɔm nda nyɛ o nyɛ o chiɛi ni lemasaa niŋ. O fondaŋnda naŋ kɛsi nyɛm baa kalaŋ ndaŋ kinɛi, nyɛ o nyɛ cho loŋ mi kɛɛ nda chɔm te.”
5 Okoŋ mi Aisaya dimul Hɛsikaya aa: “Nyɛ Chɛhowa, Mɛlɛka puaa chɔuwa dimi wo cho hoo ni,
6 ‘Teleŋ cho fuuluu, nyɛ o nyɛ num a finyaa num aa mamaa kɛsi o chiɛi num lemasaa niŋ haaa a paale hauleŋ ndeŋ, a cho lakɔŋnɔŋ a muŋ Babilɔŋ. Nyɛ o nyɛ a cho mɛi le.’ Chɛhowa dimi lende ni.
7 ‘Nduyɛ puaa ŋ cho violɔɔ wa, a cho lakɔŋnɔŋ a apum ma kɔ wa wallo o chiɛi lemasaa niŋ le masaa Babilɔŋ.’”
8 Okoŋ, mi Hɛsikaya dimul Aisaya aa: “Yooŋgu Chɛhowa wo hoo bɛnda.” Okoŋ mbo dimi vɛlɛ aa: “Kanifuule, kɔl nyuloo a hɛnɛkɛyɛi* cho wa boondii ya cho wa yoomu ve.”
