Aisaya 4:1-6
4 O paale leŋ choo, waŋ laanduaa a ŋɔmmɛu cho wana pɔnɔɔ o pilɛ saa ma dimi aa:
“Naapila cho wa nyɛdiaa* naa,A nyɛla naala chuɛɛnaŋndaŋ nuuviaa ni.Chɛl naa kinɛi ma veelu naa maa laandaa numnda naŋ cho ni,Le halikpeŋ mi siɔmbulaŋ la faŋaŋ naa choo.”*
2 O paale leŋ choo, Chɛhowa cho tosa mi chiyii piɔl le wa chiyii kɛndɛ kɛndɛ, a chiyii tɔɔma bɛndu. Nduyɛ wanaa lo niŋ yoomu o Isɔluɛi niŋnda cho naŋɔɔ kɔl, okoŋ ma kelu yoŋgaa a komɔɔla kɛndɛla wa niŋ o lɛŋndeŋ niŋndaŋ.
3 Wana o wana cho lo o Saayɔŋ niŋ a Chulusalɛm, a cho wa wanaa diandaa ndu o hɔl. Nduyɛ wanaa cho o Chulusalɛm niŋnda kpou, a cho nda diolaŋ poonyiaa le ma wa yoomu.
4 Te Chɛhowa pulu pɛ chuaa laanduaa Saayɔŋ mbo faŋa nda nɔɔ* lekɔɔ, mbo wɔɔsuu kooma nda tɛɛmbuu o Chulusalɛm niŋndaŋ, o cho Chulusalɛm yamɛi kilul nduyɛ mbo dɔɔnuŋ tumbe o kala kala a ndu.
5 Chɛhowa cho vɛlɛ fondaŋndo tosa o pembii Saayɔŋ nde choo a o fondaŋnda nda bii bɔŋaŋnda bɛŋndaŋ ndo, mi yumbu yumboo a kumnde wa kindɔŋndo lechoo ipala, nduyɛ mi yiŋndeŋ le wa biyɔɔ ichɔl. Fondaŋnda ndɔla sɔvɛla laŋ kpou la cho wa o manda ndɔɔ bɛŋgu.
6 Bafɛiyo cho wa le wunduleŋ ipala, mbo wa fondaŋ viaŋnaŋndo, a le nda mandaa te hueiyii bɛnduei wa pɛ hɔŋndo, nduyɛ mi piɔɔ wa siaa.
Tɛɛsiaalaŋ
^ Hibuluiye, “beedii ɔɔ bulu.”
^ Koŋ cho ni, siɔmbulaŋ le kiɔɔ challe o nɔɔ a le kiɔɔ chuauwa violɔɔ.
^ Hibuluiye, “poolaŋ.”
