Aisaya 40:1-31
40 Mɛlɛka nyaa dimi aa: “La dɛɛniaa, la dɛɛniaa wanaa niaa kɔltaŋ.
2 La soo diomnda kɔl dɛɛniaalaŋ o wanaa cho Chulusalɛm nda lo.La dimul nda maa saŋga nda wa niŋndo fuuluu o mɛɛlulaŋ,Nduyɛ maa a chii paawa* le haki ndaa.
La dimul nda maa Chɛhowa chii nda paawa kpou* le haki o haki nda tosa.”
3 Waŋndo cho yondaa o pollo niŋ aa:
“La bɛɛndiaa* nɛi Chɛhowa wo!
La toosiaa nɛi bɛndoo sakpo o pollo niŋ le Mɛlɛka naa.
4 La peelu kpoloŋndaŋ mi la heelu laŋ tema,Nduyɛ mi la miŋgi pembuŋ bɛndoŋ a pembuŋ pɔmbɔŋ tɛlɛlɛ.
Fondaŋnda cho doŋgili doŋgili laŋ la nɔ mi la wa tɛlɛlɛ,Nduyɛ mi la miŋgi fondaŋnda cho a poutaŋ ndaŋ dɛŋgbɔɔ.
5 Naŋɔɔ bɛndu Chɛhowa wo cho chɔmnɔŋ kpendekele,Nduyɛ mi waŋnda chieeya kpou che ndu,Kanifuule Chɛhowa dimi lende ni.”
6 Yaŋ nilaŋ! Waŋndo cho dimioo aa: “Veelu choo choo!”
Mi o cheleŋ nyuna aa: “Yɛɛnɛ ya veelu yɛ choo choo?”
“Waŋnda chieeya kpou cho ko maa bil puiyaa.
Kaala lo lechoo ndaa kpou cho ko maa bil lapeeŋgoo yondoo niŋ.
7 Mi bil puiyaa vesa,Nduyɛ mi peeŋgelaŋ la nyamala,Te Chɛhowa yoomu pɛ o laŋ choo.
A tonya, waŋnda chieeya cho ko maa bil puiyaa.
8 Mi bil puiyaa vesa,Nduyɛ mi peeŋgelaŋ la nyamala.Kɛ diom Mɛlɛka naa cho le fɛɛŋ a fɛɛŋ.”
9 Kɔ o pembii bɛnduii filioŋnde choo,Num wana lanɔ cho hoo hunɔɔ a yooŋgu kɛndɔɔ le Saayɔŋ ndo.
Heelu diom numndo choo choo kpeleŋ a mayoomu,Num wana lanɔ cho hoo hunɔɔ a yooŋgu kɛndɔɔ le Chulusalɛm ndo.
Heelu diomndo choo choo, siooŋii bii num te.
Yonda o chieeŋ bɛndoŋ niŋ Chuda aa: “Mɛlɛka nyaa cho hoo ni.”
10 Chɛhowa, Mɛlɛka Kpuluŋguma Bɛndoo cho hunɔɔ a kpaayaa,Nduyɛ mbo tosa masaleŋ a ba ndɔɔ.
Fanda ndɔɔ cho ndu o ba,Nduyɛ paawa o yɔŋgu wo cho ndu lachi.
11 Maa wana mandaa lasaa, lende o cho saa nduaa biyɔɔ nyɛkɛndɛi ni.
O cho hunɔɔ saa fɔŋnduaa chuuŋgiaa naapilɛ a ba ndɔɔ,Nduyɛ mbo biinuŋ nda o ibuŋ mbo kuɛ a nda.
A cho chuauwaa ndaa wuɛsioo wa, o cho nda isisi lachi mbo kuɛ a nda nyɛkɛndɛi.
12 Nɛɛnɛ kɔndu yɛ niŋ mɛŋndaŋ o pee mɛŋma ihɛllo niŋ kpou o ba mbo tuu maŋ?Nɛɛnɛ tuu yɛ niŋ choo choo a ba ndɔɔ?*
Nɛɛnɛ chuuŋgiaa yɛ niŋ chundu cho o lɛŋndeŋ choo wo mbo tuu ndu?Ɔɔ nɛɛnɛ handu yɛ niŋ pembuŋ bɛndoŋA pembuŋ pɔmbɔŋ o sekeleilaŋ choo le lusul ndɔɔ sinaa?
13 Nɛɛnɛ tuu yɛ niŋ nyina Chɛhowa wo?Nduyɛ nɛɛnɛ nɔla yɛ mbo sila ndu maa wana ndɔ silaa?
14 A nɛɛnɛ o naŋgu yɛ le mbo sɔla sinapɛŋgoo,Ɔɔ nɛɛnɛ pɛɛku yɛ ndu a nɛi sandaa okɔɔ?Nɛɛnɛ pɛɛku yɛ ndu kɔl kaloo,Ɔɔ mbo chɔm ndu nɛi sinapɛŋgu kpeekpeiyo?
15 Lɛŋnde kpou cho ndu o hɔl mɛɛ mɛŋndeŋ le del nuaa tue o baawaa niŋ yɛ.I cho ndu ko o hɔl mɛɛ waŋndo nyɔla nuaa chundoo nyɛɛmbuiinii, mbo handu ndu o sekeleiyo choo yɛ.
Lɛŋii mɛŋndaŋ ma balu ve, o chua ndi bɛɛ, maa chundu koni i wa ndu o ba ni.
16 Yɔmii cho Lebanɔŋ nde bɛɛ cho letuu le mi yiŋndeŋ le hiou lachi a sandei le.Nduyɛ visiaa yonduaa cho loŋ nda bɛɛ, a cho letuu le sala luamaa le.
17 Lɛŋnde kpou cho ko ndu o hɔl maa nyɛ cho kposoŋ te wo.O chi ndi nyɛ o nyɛ le.
18 A nɛɛnɛ ŋ tuu yɛ Mɛlɛka?
A yɛɛnɛ o velaŋ yɛ?
19 Mi wana chaa nyɛ a laba wo toosiaa piɔmndo,Mi wana tosa wallo a chiliŋnde wo kumbu ndu a kooliiye,Nduyɛ mbo bayiaa ndu yɔlɔŋ o toosiaa a kanii humbuei yoŋ.
20 Mi waŋndo hɛli yɔmndo le piɔmndo toosiaa,Yɔm se le wo.
Mbo nuuviaa wana chaa nyɔɔŋ toosiaa a laba wo,Le mbo bɛɛndial ndu piɔm del te wo.
21 Baa la sina wɔ ndi pɛŋgu le?
Baa la tuiyɔ ndi le?
Chɔŋ o kandɔŋndo, kani bɛɛ a dimullɔ nya le?
Chɔŋ a teleŋ chiyuŋ chieeŋndo hoo kilaŋ ndoŋ, baa la biiyɔ ndi bila le?
22 Waŋndo cho o chalta ndɔlaŋ la cho filioŋ mbo hiau chieeŋ tiu tiuwo hoo wo.Wanaa cho o chieeŋndo choo wa kpou cho ko maa kamballa ndu o hɔl.
O pɛŋgɛla choo choo naŋ chaa kola waaŋgaa kɛndɛ kɛndɔɔ ni,Nduyɛ mbo pɛŋgɛla ndu maa tɛndii waŋnda cho leniŋ ndo.
23 Mbo tusi laŋgbaa kalla mbo siiŋguu nda wanaa fonduaa,Nduyɛ mbo siiŋguu wanaa kialaa ŋyamaa* o lɛŋndeŋ choo maa nyɛ cho kposoŋ te wo.
24 A kendu le tɔlɔɔ,A kendu le saŋɔɔ,Puunduŋ ndaŋ kendu le lɛŋndeŋ biyɔɔ.Te hueiyii tuu ve hɔŋ nda pɛ, a vesa sɛɛŋ.Nduyɛ mi hueiye kuɛŋnuŋ a nda mɛɛ i kuaŋnuŋ nuaa a fueeŋnde yɛ.
25 Wana Diandaa nyuna aa: “A nɛɛnɛ nya tuu yɛ ya maa naa ndu sulaŋ ni?
26 La heelu wɔ hɔlla choo choo mi la tofa.
Nɛɛnɛ toosiaa yɛ nyɔɔŋ muŋ kpou?
Mɛlɛka toosiaa muŋ ni mbo hɛɛnduu muŋ mɛɛ nda simi nuaa puaa chɔuwa yɛ. O sina mɛɛ ŋ cho bolle pilɛ kpou yɛ,Mbo veelu muŋ ŋ pilɛŋ pilɛŋ a diola ndalaŋ.
Le mɛɛ o cho wana kpaaya bɛndu, nduyɛ mbo tosa sɔɔŋ kɔndɔfiliŋ kpaayaŋ bɛndoŋ yɛ,Nyɔɔŋ muŋ i pilɛ bɛɛ laasiaŋ te.
27 Oo Chekɔpu, le yɛɛnɛ ŋ cho yɛ suɛi nuaa? Oo Isɔluɛi, le yɛɛnɛ ŋ cho yɛ dimioo aa,‘A cho chɔ sɔɔŋ cho yɔŋnɔŋndo o yoomu nuu niŋndoŋ te Chɛhowa,Nduyɛ num Mɛlɛka, a cho ya biyɔɔ o sandei choo le’?
28 Baa la sina wɔ ndi pɛŋgu le? Baa la tuiyɔ ndi le?
Chɛhowa, wana toosiaa nyɛ o nyɛ o lɛŋndeŋ choo wo, ndu cho Mɛlɛka cho le fɛɛŋ a fɛɛŋ ndo ni.
Fɛɛŋ bɛɛ o saŋga le, nduyɛ o yɔkpa le.
Wana nɔla ma yaasiaa sinapɛŋgu ndɔɔ le.*
29 Mbo ke wanaa yɔkpa wa kpaayaa,Nduyɛ wanaa nɔ mayoomu le wa, mbo luei nda yoomuaŋ tau tau.
30 Mi puaambuaa saŋga nduyɛ ma yɔkpa.Mi puaa feleŋguaa boŋ nduyɛ ma del.
31 Kɛ wanaa dɔu tiindaŋ ndaa o Chɛhowa niŋnda cho vɛlɛ kpaayaa sɔla.
A cho helɔɔ tema mɛɛ koviaa hel nuaa choo choo a kumbaŋndaŋ yɛ.
A cho nyaanɔŋ, kɛ a yɔkpa le.A cho lakɔ, kɛ a saŋga le.”
Tɛɛsiaalaŋ
^ Ɔɔ “sala.”
^ Ɔɔ “le diiŋ diiŋ.”
^ Ɔɔ “toosiaa.”
^ Te a pasa sooŋ pɛ, fondaŋ cho chɔŋ o suei bɛnduei kɔ o suei pɔmbuɛi yo. Tofa Tɛɛsiaa B14.
^ Ɔɔ “masaa.”
^ Ɔɔ “ma chii sɔɔŋ ndɔŋ biyɔɔ bila le.”
