Aisaya 41:1-29
41 “Nya lɛŋii mɛŋndaŋ ma balu ve, la mei kpili mi la yaŋ nilaŋ.*Lɛŋnde kpou sɔla vɛlɛ kpaaya ndaa.
A huŋ, okoŋ ma soo.
Ŋ huŋnuŋ naapilɛ, mi kilul nya yamɛi.
2 Nɛɛnɛ ke yɛ wana fula ba paaleŋ le chaŋ ndo wo kpaayaa,Mbo veelu ndu o peluŋ ndɔŋ bɛŋgu o sakpoyɛi choo,*Mbo chua lɛŋndeŋ mbo mal ndu o ba,Nduyɛ mbo tosa mi masaa waa wa ndu o ba bɛŋgu?
Nɛɛnɛ tosa yɛ nda maa chundu muɛi nduɛi faŋnde lachi,Nduyɛ mbo puusiaa nda a chiŋɔle ndɔleŋ mɛɛ hueiye kuaŋnuŋ nuaa a fueeŋnde yɛ?
3 Mbo tisa nda kɔɔli a kiltaŋ nyɛ o nyɛ yɔŋnuŋ ndu le,Mi peluŋ ndɔŋ keeku o nɛila o keeku wɔ paandu le laŋ.
4 Nɛɛnɛ tosa yɛ hei?Nɛɛnɛ veelu yɛ waŋnda chɔŋ o kandɔŋndo?
Ya Chɛhowa, ya cho Wana Tasoo ni.Nduyɛ wana mɛɛlaa huŋ bɛɛ, I cho siŋgaŋ te.”
5 Wanaa cho o lɛŋii mɛŋndaŋ ma balu ve niŋnda che ndi, nduyɛ mi siooŋnde bii nda.
Wanaa cho o lɛŋndeŋ mɛɛlulaŋ nda kpou kandu nyiiyaa.
A naŋnuŋ kpɛɛluŋ, nduyɛ ma huŋ lachi.
6 O kɛ kɛ fee mala chaaŋ ndɔ,Nduyɛ mbo dimul wanayɛi nduɛi aa: “Nɔ dialuŋ kalaŋ.”
7 Lelaŋ, mi wana chaa nyɛ a laba wo luei wana tosa wallo a chiliŋndoŋ ndo yoomuaŋ.Mi wana luaa chiliŋnde a haamɛiyo* le mi i wa fɛɛdɛɛ woLuei sumnɔ siou chiliŋnde kpɛlɛkiaa wo yoomuaŋ.
Mbo dimul wana duau chiliŋndoŋ naapilɛ wo aa: “Wali ŋ tosa wo naŋ bɔɔ.”
Okoŋ mbo baŋ nyɛ o toosiaa wo a lɔndimɛiyoŋ,* le halikpeŋ o del te.
8 “Kɛ num Isɔluɛi, buɛi nuu ŋ cho ni.Nduyɛ num Chekɔpu, num ya hɛli ni.Num cho po* Ebilaham chaaŋ ni wo ni.
9 A wa o lɛŋndeŋ mɛɛlulaŋ pɔ mi chua num.Nduyɛ a wa o fondaŋnda landaŋ landaŋ ndaŋ mi veelu num.
Mi dimul num aa, ‘Num cho buɛi nuu ni.I hɛli num, nduyɛ I kɛɛ num te.
10 Yɔŋ isiooŋ te, kanifuule I cho a num latulu.
Buulaŋ te, kanifuule ya cho Mɛlɛka numndo ni.
A tonya, I cho num yoomuaŋ luei nduyɛ mi mala num.I cho num saa a ba ni kɛndɔɔ mi kuɛ a num o sakpoyɛi choo.’
11 Wanaa cho a kɔl tuu ma simul num nda kpou, siɔmbulaŋ la cho nda biyɔɔ nduyɛ ma sɔla bɛɛla tambɛilaŋ.
Wanaa cho sɔŋgɔɔ a numnda cho hunɔɔ simnɔŋ wanaa fonduaa, nduyɛ ma sɔla tambei.
12 A cho nuuviaa wanaa wa sɔŋgɔɔ a numnda, kɛ a seeluŋ niŋ nda le.Wanaa wa chɔuwo a numnda cho hunɔɔ simnɔŋ maa nyɛ cho kposoŋ te wo.
13 Ya Chɛhowa Mɛlɛka numndo, ya saa ba num kɛndɔɔ ni.Ya cho num dimullo ni aa, ‘Yɔŋ isiooŋ te, I cho num mala.’
14 Yɔŋ isiooŋ te, num dondopoloo* Chekɔpu.Nya waŋnda Isɔluɛi, I cho nya mala.” Chɛhowa, Wana Pendu nya wo, Wana Diandaa le Isɔluɛi dimi lende ni.
15 “I siiŋguu num nyɛ nda luaa witiiyoŋ ndo,Nyɛ sɛnɛi nda luaa witiiyoŋ a sondolaŋ la tiɔɔŋ ndo.
A cho pembuŋ bɛndoŋ pesi ma chuii muŋ mululu,Nduyɛ ma miŋgi pembuŋ pɔmbɔŋ maa ifueeŋ.
16 A cho muŋ viouwɔɔ o hueiye niŋ,Nduyɛ mi hueiye kuɛŋnuŋ a muŋ.Hueiyii fuku fukuei cho muŋ saŋɔɔ falulu.
A wa niŋ a nyaale le Chɛhowa,Nduyɛ a kialu niŋ yoŋgaa a Wana Diandaa le Isɔluɛi okɔɔ.”
17 “Wanaa cho o bahawɛiyo niŋnda a wanaa bala fonduaa cho mɛŋndaŋ nuuviaa, kɛ lepilɛ bɛɛ a cho saalɔŋ te.
Diɔɔmuei vesa nda o lasondo sɛɛŋ a kolɔɔ bii nda wo.
Ya Chɛhowa, ya cho nda mala ni.
Ya cho Mɛlɛka Isɔluɛiya wo, I mel nda le.
18 I cho tosa mi peelaŋ la piɔl o pembuŋ pɔmbɔŋ nyɛ vil lechoo le woŋ choo,Nduyɛ mi tosa mi mɛŋndaŋ ma piɔl o kpoloŋndaŋ niŋ.
I cho tosa mi lɛŋnde polteŋ le simnuŋ naa bil pioo cho wa wa,Nduyɛ mi tosa mi peelaŋ la piɔl o lɛŋnde nɔ mamɛŋ te leŋ niŋ.
19 I cho yɔm sida wo tɔlɔɔ o pollo niŋ,Yɔm akeesiaa wo, yɔm matɔɔ wo, a yɔm machuɛiyo.
I cho yɔm chunipa wo tɔlɔɔ o pollo niŋ,Latulu a yɔm asi wo vɛlɛ a yɔm saipulɛsi wo,
20 Le halikpeŋ mi waŋnda kpou che,Nduyɛ ma sina, ma yaŋ nilaŋ,Okoŋ ma bii bila maa Chɛhowa tosa hei ni,Nduyɛ maa Wana Diandaa le Isɔluɛi tosa ni mi i yɔŋnuŋ.”
21 Chɛhowa dimi aa: “La huŋ chɔm suɛi nyɛi.”
Masaa le Chekɔpu dimi aa: “La huŋ mi la chɔm nyɛ yɔŋnuŋ ndo.
22 La chɔm nyɛ kpeekpei yɔŋnuŋ ndo, nduyɛ mi la dimul naa sɔɔŋ nɔ le hunɔɔ yɔŋnɔŋndo woŋ.
La dimul naa sɔɔŋ yɔŋnuŋ o paandoo niŋndoŋ,*Le halikpeŋ miŋ yiyaŋ* o muŋ choo, nduyɛ miŋ sina fulamakɔɔlilaŋ.
Ɔɔ, la dimul naa sɔɔŋ nɔ le hunɔɔ woŋ.
23 La dimul naa nyɛ nɔ le hunɔɔ o chilaŋ niŋndo,Le halikpeŋ miŋ sina maa mɛlɛkaa nya cho ni.
La tosa suɛi, o wa i kɛndɛ ɔɔ i wɔɔŋ,Le mi kɔndɔfillo bii naa te ŋ che ndi pɛ.
24 Nyɛ cho kposoŋ te wo nya cho ni.Nyɛ fondoo fuu batiuwaa nya sɔla niŋndo cho ni.
Wana o wana hɛli nya pɛ, wana nɔɔlɛiyo o cho ni.
25 I hɛli waŋndo ba luaŋ ndo, nduyɛ o cho hunɔɔ.O cho koŋ fula ba paaleŋ le chaŋ ndo wo cho diola nilaŋ saŋgala.
O cho masaa waa* niɔu niɔu, naŋ chaa puuloo o cho niɔu niɔu wo ni,Mɛɛ wana chuau kpɛɛnɔŋ ndo o muuliaŋ nuaa puuloo yɛ.
26 Nɛɛnɛ dimi yɛ a hei okɔɔ o kandɔŋndo, le halikpeŋ miŋ sina a ndi okɔɔ?Ɔɔ nɛɛnɛ dimi yɛ a hei okɔɔ o paandoo niŋ, le halikpeŋ miŋ dimi aa, ‘Tonyaa o dimi ni’?
A tonya, wana o wana suu a ndi okɔɔ le!
Wana o wana yonda ndi le!
Wana o wana tui nyɛ o nyɛ a num te!”
27 Ya fɛlɛŋ dimul Saayɔŋ aa: “Nyɛ nɔ le yɔŋnɔŋndo wo cho hoo ni!”
Nduyɛ, Chulusalɛm ya cho yɔŋ wana dimiaa yooŋgu kɛndɔɔ ni.
28 Mi hiau lachi a tofaa o nɛi, kɛ I chi wana o wana le.Wana o wana ve nda tɛɛŋ le mbo yɔŋgu silaa le.
Mi che bɛɛ mi hiau lachi a nda nyunaa, kɛ wana o wana muli le.
29 Nda kpou wanaa fonduaa* nda cho ni.
Nduyɛ walta ndalaŋ bɛɛ, nyɛ fondoo fuu la cho ni.
Piɔmaa ndaa nda toosiaa a chiliŋnde wa* cho ko maa ihuei, nduyɛ maa nyɛ cho le wo.
Tɛɛsiaalaŋ
^ Ɔɔ “la mei kpili ya lachi.”
^ Koŋ cho ni, le mbo tosa wallo le ndu.
^ Ɔɔ “malatoo.”
^ Ɔɔ “pɔŋtiiyoŋ.”
^ Hibuluiye, “kulii.”
^ Koŋ cho ni, a nɔ kpaaya le numpila manda le, nduyɛ a cho wana sɔvɛ le.
^ Hibuluiye, “o tasela ndɔ woŋ.”
^ Ɔɔ “handu kɔllo.”
^ Ɔɔ “wanaa cho masaa ikɛiya.”
^ Ɔɔ “nyɛ cho kposoŋ te wo.”
^ Ɔɔ “piɔmaa nda toosiaa a chiliŋii teeŋgiɛi ya.”
