Aisaya 42:1-25
42 Buɛi nuu, o ya cho tooloo wo,
Ndu ya hɛli ni, nduyɛ I hini kɔl a ndu.
I tusi ndu nyina nuu choo.O cho hunɔɔ a sandei o lɛŋndeŋ choo.
2 O cho chaŋ te, kɛlɛŋgaa niŋ te mbo heelu diomndo choo choo.Nduyɛ, o cho tosa mi waŋnda tuei diom ndɔɔ o nɛi bɛndoo choo le.
3 Bilte naŋguŋ le kendiŋndo leŋ, o kendi leŋ niŋ te.Nduyɛ, o nyumi niŋ yiŋnde hiŋ le nyumndo leŋ te.
O cho sɔɔŋ tosa o nɛi sakpoo choo le mbo hiŋ a sandei.
4 O saŋga niŋ te kɛlɛŋgaa niŋ te mbo yɔkpa, haaa mbo tosa mi sandei hiŋ o lɛŋndeŋ choo.Nduyɛ, wanaa cho o lɛŋii mɛŋndaŋ ma balu ve niŋnda cho chumndo le sawa ndɔɔ.*
5 Mɛlɛka bɛndoo, o Toosiaa choo choo nduyɛ mbo pɛŋgɛla ndu wo,O pɛŋgɛla lɛŋndeŋ a nyɛ o nyɛ cho lechoo wo,O wou wanaa cho o lɛŋndeŋ choo wa hueiyii yoomɛi o miliŋ,Mbo ke wanaa cho balɔɔ lechoo wa yoomoo wo,Nyɛ ndu Chɛhowa, Mɛlɛka tonyaa dimi wo cho hoo ni:
6 “Ya Chɛhowa, I veelu num o sakpoyɛi choo.I saa ba numndo.
I cho num manda, nduyɛ ma wa maa kpemaa naa tɛɛŋ naa waŋnda,Ma wa vɛlɛ paŋgeloo le waŋnda o lɛŋnde niŋ.
7 Kanifuule a cho wanaa sumɛiya hɔltaŋ kumbi,Nduyɛ ma soli wanaa cho o biyɔɔ niŋ o sooŋndaŋ niŋnda,Vɛlɛ a wanaa cho ichali o biyɔɔ niŋ o chiɛi manyumndo niŋnda.
8 Ya cho Chɛhowa ni. Diola nilaŋ la cho laŋ ni.Naŋɔɔ cho le ya wo, I ke ndu wana o wana le,*Kɛlɛŋgaa niŋ te mi ke piɔmaa nda toosiaa wa saŋgala cho le ya wo.
9 La tofawɔ! Sɔɔŋ yaa dimi o paandoo niŋ pa woŋ chuu yɔŋnɔŋ.Suŋ suŋ niŋ, sɔɔŋ sɛnɛiyoŋ ya cho dimioo ni.
Tuupa miŋ yɔŋnuŋ, I cho nya dimul a muŋ okɔɔ.”
10 La solul Chɛhowa chondii sɛnɛiye.La soli chondei le ndu saŋgalaa nya cho o lɛŋndeŋ mɛɛlulaŋ nda,Nya cho o pee mɛŋma ihɛllo kɔŋgɔ wa a nyɛ o nyɛ cho leniŋ,Lɛŋii mɛŋndaŋ ma balu ve, a wanaa cho leniŋ nda.
11 Lɛŋnde polteŋ a chieeŋ ndɔŋ bɛndoŋ,Tanda Kidaa wo a sɔndɔkɔlta balu ndu laŋ kpou, a heelu diom ndaa choo choo.
Wanaa cho ichali o tanda lapouwo niŋnda deŋi choo choo a kɔl kɛndɔɔ.A deŋi choo choo kpeleŋ o pemboŋ choo.
12 Waŋnda kpou yɔŋgu bɛɛle bɛnduleŋ o Chɛhowa lo,Nduyɛ ma saŋgala ndu o lɛŋii mɛŋndaŋ ma balu ve niŋ.
13 Chɛhowa cho fula le sɔŋgɔɔ maa wana dialuŋ kala.
O cho kpeeŋiaa sɛmbɛ o nɔ le chɔuwo wo maa kuubanɔ chɔu.
O cho deŋi, a tonya, o cho deŋi choo choo le chɔuwo.O cho chɔm maa o nɔ kpaayaa mbo hiau yaamɔɔwaa nduaa.
14 “Le teleŋ vilɛi niŋ I cho o meinaŋ kpili.
Mi lo o meiyaa lende kpili, mi duau yapila o mandaa bɛŋgu.
I cho wa koŋullo a nyɛ nɛiyaa, mi nyuumbuŋ, mi saaliaa yoomuaŋ,Mɛɛ pulii vialɛi bii nuaa wana folioo* yɛ.
15 I cho pembuŋ bɛndoŋ a pembuŋ pɔmbɔŋ pesi pesi,Nduyɛ mi veesiaa bil puiyaa cho o muŋ choo wo kpou.
I cho siiŋguu peelaŋ lɛŋii mɛŋndaŋ ma balu ve,Nduyɛ mi veesiaa fondaŋnda mɛŋma ibuŋgaŋ ma cho wo.
16 I cho lakɔ a wanaa sumɛiya o nɛi nda sina le wo,Nduyɛ mi tosa ma kuɛ o nɛila nda kue wɔ paandu choo le laŋ.
I cho nyumma cho nda lachi waŋ siiŋguu nyɛ teŋgaa,Nduyɛ mi miŋgi fondaŋnda cho doŋgili doŋgili laŋ tɛlɛlɛ.
Hei ya cho tosa le nda ni, nduyɛ I mel nda le.”
17 Wanaa dɔu tiindaŋ ndaa o piɔmaa nda sɛl la niŋnda,Vɛlɛ a wanaa dimul piɔmaa nda toosiaa a chiliŋndoŋ nda* aa: “Nya cho mɛlɛkaa naa ni” wa,A cho nda yomɔɔ ma nyaanuŋ, nduyɛ mi siɔmbulaŋ la bii nda.
18 La yaŋ nilaŋ, nya wanaa nila baŋulɛiya.La tofa mi la che, nya wanaa sumɛiya.
19 Nɛɛnɛ suma yɛ mbo hiau buɛi nuu?Nɛɛnɛ nɔ yɛ nila baŋulɛilaŋ mbo hiau wana ya vem ndo?
Nɛɛnɛ suma yɛ mbo hiau wana ya fanda wo?Nɛɛnɛ suma yɛ mbo hiau buɛi Chɛhowa wo?
20 La che nyɛm bɔɔbɔɔ, kɛ la hendu kɔllo muŋ choo le.
Mi la kumbu nila nyalaŋ, kɛ la yeŋ lani le.
21 Chɛhowa cho a yeemɛi le chɔmndo mɛɛ sawa ndɔɔ* cho o bɛndu, nduyɛ mbo wa filioŋ yɛ.Kanifuule, wana sakpoo o cho ni.
22 Waŋnda haa nda puŋga nyɛm ndaŋ a ka ka ni, nduyɛ ma kuaŋnuŋ a muŋ.Nda kpou cho a hauwaa o sooŋndaŋ niŋ, nduyɛ ma wa a viaŋaa o biyɔɔ niŋ.
A bii nda ma kuaŋnuŋ a nda, nduyɛ wana o wana piŋi nda le.A kuɛŋnuŋ a nda, nduyɛ wana o wana dimi nuaa aa: “La miiŋgu a nda naŋ” te.
23 Nɛɛnɛ nya tɛɛŋ cho yɛ hei tueiyɔɔ?
Nɛɛnɛ nya tɛɛŋ cho yɛ kɔllo handɔɔ nduyɛ mbo yaŋ nilaŋ le chilaŋ?
24 Nɛɛnɛ yɔŋgu yɛ Chekɔpu le ma kuɛŋnuŋ a ndu,Nduyɛ mbo mal Isɔluɛi wanaa puŋga nyɔɔŋ nda o ba?
Baa o cho Chɛhowa, wana naŋ tosa hakioo a ndu wo le?
Ma kɛɛ le kɔlaŋ o nɛila ndɔlaŋ choo,Nduyɛ ma kɛɛ le sawa ndɔɔ* diikɔŋndo.
25 Le hei, mbo hiau lachi a ndu kɔl ndɔ tuuwo hulɔɔ choo,Kɔl ndɔ tuu ŋama ŋamaa, nduyɛ mbo tusi ndu kɔl tuu chɔuwo choo.
Mi kɔl tuu koŋ tɛɛmbuu nyɛ o nyɛ balu ndu, kɛ o hendu kɔllo o keŋ choo le.
Mi kɔl tuu koŋ hiau lachi a ndu nyɛpalaa tusioo choo, kɛ o chue ndi suɛi sɔvɛ o kɔl ndɔɔ niŋ te.
Tɛɛsiaalaŋ
^ Ɔɔ “nɛi ndɔ chɔmaa.”
^ Ɔɔ “I piɔu naŋɔɔ nuu a wana o wana le.”
^ Ɔɔ “yollo.”
^ Ɔɔ “piɔmaa nda toosiaa a chiliŋii teeŋgiɛi ya.”
^ Ɔɔ “nɛi ndɔ chɔmaa.”
^ Ɔɔ “nɛi ndɔ chɔmaa.”
