Aisaya 43:1-28
43 Nyɛ Chɛhowa dimi wo cho hoo ni,Num Chekɔpu Wana Toosiaa num ndo, num Isɔluɛi wana chɔu num ndo:
“Yɔŋ isiooŋ te, kanifuule I chii num piondɔɔ.
I veelu num a diola numndaŋ,
Nduyɛ le ya ŋ cho niŋ ni.
2 Te a keeku pɛ o mɛŋndaŋ niŋ, I cho wa a num latulu.O yɔŋ bɛɛ ma keeku o peelo, mɛŋndaŋ ma kumbu num te.
Keeku bɛɛ o yiŋndeŋ niŋ, le cho num lomɔɔ le,Kɛlɛŋgaa niŋ te mi haŋgul ndɔɔ lom num.
3 Ya cho Chɛhowa Mɛlɛka num ndo ni,Wana Diandaa le Isɔluɛi, wana num Piŋiaa.
I yɔŋgu Ichipi maa sala baŋaa le num,Nduyɛ mi yɔŋgu Itoopiaa a Siba sɔŋgɔ numndo.
4 Kanifuule ma simnuŋ wana sɔvɛ ya o hɔl,Num aa nɔ bɛɛleŋ, nduyɛ mi kaala num.
I cho waŋnda a lɛŋnde yɔŋgu,Le yoomu numndo chiindiaa.
5 Yɔŋ isiooŋ te, kanifuule I cho a num latulu.
I cho chuauwaa numnda* soli ba paaleŋ le chaŋ ndo, mi hiŋ a nda,Nduyɛ mi chuuŋgiaa nda naapilɛ ba paaleŋ le del lo.
6 I cho ba luaŋ ndo dimul aa, ‘Mal nda!’
Nduyɛ mi dimul ba tou wo aa, ‘Kukaŋ nda choo le.
Mal puaa niaa cho landaŋ nda ma hiŋ, nduyɛ ma mal chuauwaa niaa laanduaa cho o lɛŋndeŋ mɛɛlulaŋ nda.
7 Wana o wana nda veelu a diola nilaŋ,A ya veelu le mi sɔla bɛɛleŋ nda,A ya chɔu nduyɛ mi toosiaa wa.’
8 Huŋ a wanaa sumɛiya, mi che bɛɛ a nɔ hɔltaŋ,Vɛlɛ a wanaa nila baŋulɛiya, mi che bɛɛ a nɔ nilaŋ.
9 Lɛŋnde kpou chuuŋgiaŋ o fondaŋndo o pilɛ,Nduyɛ mi waŋnda kpou diinuŋ naapilɛ.
Nɛɛnɛ nda tɛɛŋ nɔla yɛ mbo dimi maa sɔɔŋ muŋ cho yɔŋnɔŋ?
Ɔɔ a nɔla pa ma tosa miŋ tuei sɔɔŋ tasoŋ?*
A huŋ a seiyaa ndaa le ma chɔm maa tonyaa nda dimi ni.Ɔɔ acheleŋnda tuei ma dimi aa, ‘Tonyaa i cho ni!’”
10 Chɛhowa dimi aa, “Nya cho seiyaa niaa ni.A tonya, nya cho buɛiyaa niaa ya hɛli wa ni,Le halikpeŋ mi la sina, mi la laalaŋ* o ya niŋ,Nduyɛ mi la bii bila maa le teleŋ o teleŋ, yapilɛ kpe cho ni.
Mɛlɛka o Mɛlɛka cheleŋ toosiaŋ ya lachi le.Nduyɛ o faŋaŋ o ya kɔɔli, Mɛlɛka cheleŋ cho le.
11 Ya, ya cho Chɛhowa ni. Nduyɛ o faŋaŋ o ya kɔɔli, wana piŋiaa cheleŋ cho le.”
12 Chɛhowa dimi aa, “Ya cho wana dimul nya sɔɔŋ muŋ ndo ni, mi piŋi nya,Nduyɛ mi tosa mi la sina sɔɔŋ muŋ teleŋ mɛlɛka cheleŋ ve wɔ nya tɛɛŋ te wo.
Lelaŋ, nya cho seiyaa niaa ni, nduyɛ ya cho Mɛlɛka ni.
13 O faŋaŋ okoŋ kɔɔli, le teleŋ o teleŋ yapilɛ kpe cho ni.Wana o wana nɔla mbo poonda ya nyɛ o nyɛ o ba le.
Te I tosa isɔɔ pɛ, nɛɛnɛ kuuna yɛ ndi?”
14 Nyɛ Chɛhowa, Wana Pendu nya wo, Wana Diandaa le Isɔluɛi dimi wo cho hoo ni:
“Le sabu nyaa, I cho nda yɔŋ Babilɔŋ, nduyɛ ma kɔ tɛɛmbuu diola ndala ŋchiliŋndaŋ kpou.Kaadiaŋnda cho wa o dɛndɛla ndala mamɛŋndaŋ niŋ, ma wa chaŋndo a nyɛ nɛiyaa.
15 Ya cho Chɛhowa ni, Wana nya Diandaa, Wana Toosiaa Isɔluɛi yo, Masa nyaa.”
16 Nyɛ Chɛhowa dimi wo cho hoo ni,Wana cho nɛiyo toosiaa o pee mɛŋma ihɛllo tɛɛŋ ndo,Vɛlɛ a nɛiyo o yɔŋ bɛɛ o mɛŋma yoŋgbaŋ yoŋgbaŋ ndaŋ tɛɛŋ ndo,
17 Wana naŋ nyɛm chɔu suaa naŋndoŋ a suaa wo,Puaa chɔuwa a kuubaa ndaa latulu wo. Mbo dimi aa:
“A cho la hini, kɛ a cho lɛ chɔnɔŋ te.
A cho nyum pɔli mɛɛ yiŋndeŋ le wa nuaa o saabɛiyo mi le nyum yɛ.”
18 “La loonuŋ sɔɔŋ paandoŋ te,Nduyɛ la handu kɔllo o sɔɔŋ paandoŋ choo le.
19 Sɔɔŋ sɛnɛiyoŋ ya cho niŋ tosaa ni.Ŋ cho suŋ suŋ kandɔɔ yɔŋnɔŋndo.
Baa la biiyɔ ndi bila le?
I cho nɛiyo toosiaa o pollo niŋ,Nduyɛ mi tosa mi peelaŋ la wa o lɛŋnde vesɛileŋ niŋ.
20 Visiaa yonduaa cho ya bɛɛleŋ ke,Tuŋaa yonduaa a ɔsiluichiiya.Kanifuule I tosa mi mɛŋndaŋ ma wa o pollo niŋ,Mi peelaŋ la wa o lɛŋnde vesɛileŋ niŋ,Le mi wanaa niaa, wanaa ya hɛli wa a kol,
21 Wanaa ya chɔu le yapila wa,Le halikpeŋ ma saŋgala ya.
22 Kɛ num Chekɔpu, a veelu ya le.Kanifuule num Isɔluɛi, ma saŋga a ya.
23 A chuu ya saa le salala numnda luamaala kpulukuulaŋ te,Nduyɛ ma kɛɛ le ya bɛɛleŋ kioo a salala numndaŋ.
I beŋ num le ma chuu ya ke le,Kɛlɛŋgaa niŋ te mi saaŋgiaa num le ma chuu ya filaŋkiŋsɛŋ.
24 A pindul la keŋ yeelɛiyo* a kanii* numnde le,Nduyɛ a tosa mi hini kɔl a chuɛima salala numndaŋ te.
Kɛ ma tosa mi saŋga a hakila numndaŋ,Nduyɛ ma yɔɔkpiaa ya a yɔŋnda numnda wɔɔŋndaŋ.
25 Ya, ya cho hakila numndaŋ* wɔɔsuuwo ni le sabu diola nilaŋ,Nduyɛ I cho lɛ loonɔŋ a hakila numndaŋ te.
26 Yiyalaŋ ya, miŋ hiŋ a sɔɔŋ naŋ, nduyɛ miŋ kɔɔsa.Timbi kpeŋgii numnde le ma chɔm maa a nɔ di.
27 Finyaa nyaa mamaa tasiaa tosa hakioo,Nduyɛ mi wanaa suaa le nya wa* tosal la nilakalulaŋ nduyɛ ma simul la.
28 Lelaŋ, I cho laŋgbaa kalaa cho o fondaŋ diandaa wa chua maa a cho a nɔɔlɛi,Mi yɔŋgu Chekɔpu le mbo sɔla tambei,Nduyɛ mi tosa mi Isɔluɛi sɔla yioulaŋ.
Tɛɛsiaalaŋ
^ Hibuluiye, “kulii numnde.”
^ Naapum sɔɔŋ taseŋ nɔ le yɔŋnɔŋndo o chilaŋ niŋndoŋ.
^ Ɔɔ “tiindaŋ.”
^ Ɔɔ “tɔlɔɔ chuŋ kɛndɔɔ.”
^ Ɔɔ “wolii.”
^ Ɔɔ “sɔɔŋ nilakaluŋ numndoŋ.”
^ Naapum wanaa ndaa puɛɛku waŋnda Sawala Mɛlɛkaŋ nda.
