Aisaya 44:1-28
44 “Yaŋ nilaŋ Chekɔpu, num buɛi nuu,Nduyɛ num Isɔluɛi, num ya hɛli wo.
2 Chɛhowa, Wana Toosiaa num nduyɛ mbo chuau num,Mbo mala num teleŋ ŋ wa o demboo niŋndo,*Nyɛ o dimi wo cho hoo ni:
‘Yɔŋ isiooŋ te, num buɛi nuu Chekɔpu.Nduyɛ num Chɛsulɔŋ,* num ya hɛli wo.
3 Kanifuule, I cho wanaa cho a bolola vesɛilaŋ nda mɛŋndaŋ ke ma kol,Nduyɛ mi tosa mi peelaŋ la wa o lɛŋnde vesɛileŋ niŋ.
I cho chuauwaa numnda* nyina nuu ke,Nduyɛ mi dɔu wanaa cho fula o pulale numndeŋ choo wa sala.
4 A cho wa mɛɛ tɔlɔɔlaŋ la wul nuaa mi la wa puiyo tɛɛ tɛɛ yɛ,Vɛlɛ a mɛɛ yɔmndo wa nuaa o pioo ikɛi yɛ.
5 Waŋndo cho dimi aa: “Le Chɛhowa ya cho ni.”
Mi o cheleŋ veeluŋ ndupila a diola Chekɔpu laŋ.Mi wana cheleŋ poonyiaŋ vɛlɛ o ba aa: “Le Chɛhowa ya cho ni.”
Okoŋ mbo chua diola Isɔluɛi laŋ.’
6 Nyɛ Chɛhowa, Masaa le Isɔluɛi,Wana Pendu ndu wo, Chɛhowa, Mɛlɛka puaa chɔuwa dimi wo cho hoo ni:
‘Ya cho wana tasoo ni, nduyɛ ya cho wana mɛɛlaa ni.
Mɛlɛka o Mɛlɛka cheleŋ cho o ya kɔɔli le.
7 Nɛɛnɛ cho yɛ maa ya?
Wana koŋ o fula kpendekele mbo dimul la a ndi okɔɔ!
Chɔŋ a teleŋ ya kila waŋnda haa o paandoo niŋ pa wo,Nɛɛnɛ nɔla yɛ mbo chɔm ya sɔɔŋ cho suŋ yɔŋnɔŋ ndoŋ,Vɛlɛ a sɔɔŋ nɔ le yɔŋnɔŋndo o chilaŋ niŋndoŋ?
8 Wanaa niaa, la yɔŋ isiooŋ te,Nduyɛ la nyiiya kpa kpa a siooŋnde le.
O cho ya le dimul nya a pilɛŋ pilɛŋnda a ndi okɔɔ tuupa mi i yɔŋnuŋ te?
Nya cho seiyaa niaa ni.
Mɛlɛka o Mɛlɛka cheleŋ cho o ya kɔɔli le.
O faŋaŋ o ya kɔɔli, I sina Pou Kpoowa cheleŋ te.’”
9 Wanaa sial piɔmnda wa kpou, wanaa fonduaa nda cho ni.Nduyɛ nyɛm ndaŋ nda chua muŋ ŋ sɔvɛ woŋ, ŋ nɔ tɔnɔ o tɔnɔ le.
Nda cho seiyaa ndaa wa, a* chi nyɛ o nyɛ le nduyɛ a sina nyɛ o nyɛ le.Lelaŋ wanaa toosiaa nda wa, siɔmbulaŋ la cho nda biyɔɔ.
10 Wana o wana chɔu pɛ mɛlɛkaa ɔɔ mbo toosiaa piɔm ŋchiliŋndo,*Tɔnɔ o tɔnɔ o sɔla o ndu niŋ te.
11 Siɔmbulaŋ la cho chaaŋaa nduaa kpou biyɔɔ!
Wanaa chaa nyɛ a laba wa, waŋnda chieeya nda cho ni.
Nda kpou chuuŋgiaŋ naapilɛ ma sim.
Siooŋii bɛnduei cho nda biyɔɔ, mi siɔmbulaŋ la bii nda kpou.
12 Mi wana tosa wallo a chiliŋndoŋ ndo handu chiliŋnde o suɛɛnde choo a nyɛm ndɔŋ walloŋ.*
Mbo chɔu ndi a haamɛiyo,*Mbo lɔɔ ndi a ba ndɔ kpaaya bɛndoo.
Okoŋ mi yiaaŋ ma nɛi ndu, nduyɛ mi yoomuaŋ ma chuu ndu.O kol mamɛŋ te, nduyɛ mbo saŋga yɔkɔɔ.
13 Mi wana tosa wallo a yɔmnde wo siɛndi yoole tuwaaleŋ o yɔmndo choo, mbo pila pɔu siaŋaa, nduyɛ pɔu koŋ o tual niŋ kɔɔli ni.
Mbo sɛl ndu a nyɛ sialaa, nduyɛ mbo hɛɛnduu tuuliaalaŋ a nyɛ ndɔ wallo,
Mbo toosiaa ndu maa wanachiee,Mbo naŋ naŋ chaa wanachioo ni.Okoŋ, ma kɔ kɛsi ndu chiɛiniŋ.*
14 Waŋndo opum cho, wali ndɔɔ cho le yɔmii sida ve kioŋndo ni.
Mbo hɛli yɔm kɛndɛ kɛndɔɔ opum, mɛɛ yɔm oki wo cho nuaa yɛ,Mbo mal ndu le mbo hindu, nduyɛ mbo simnuŋ o bɛndu yɔmnde tɛɛŋ o bundɔɔ niŋ.
Mbo tɔl yɔm lɔɔluɛɛ wo, mi piɔɔ sia lechoo mbo hindu.
15 Okoŋ, mbo simnuŋ yɔmnde le yiŋndeŋ kiisuuwo.
Mi ndupila chua itiŋ le haŋgɔɔ mbo sinaŋ lafuu.Mbo kiisuu yiŋndeŋ le beediiyo* lomɔɔ.
Kɛ a koŋ kpou, mbo toosiaa vɛlɛ mɛlɛka a ndu le ndu piɛiyo.
Mbo toosiaa piɔmndo a ndu, nduyɛ mbo baŋ ndu wulaŋ lachi.
16 Yɔmndo hoo o tiŋ, mbo soliŋ ndu kpeku le yiŋndeŋ kiisuuwo.Mbo soliŋ o tiŋ kpeku le visioŋ tuɛiyɔɔ mbo de.
Mbo haŋgu vɛlɛ mbo sinaŋ lafuu, okoŋ mbo dimi aa:
“Aa ma che! Nuawɔ se yiŋnde kɛndɛ le haŋgɔɔ!”
17 Kɛ o tɔɔ, mbo sɛl piɔmndo a ndu, mbo toosiaa mɛlɛka.
Mbo beŋ ndu wulaŋ, nduyɛ mbo wa ndu sooluuwo.
Mbo piɛi o ndu lo mbo dimi aa:
“Piŋi ya, kanifuule num cho mɛlɛka nuu ni.”
18 A sina nyɛ o nyɛ le, a bii nyɛ o nyɛ bila le.Kanifuule hɔlta ndalaŋ la cho la kindaa kpɔku, a chi le,Nduyɛ a nɔ sinapɛŋgu o kɔlta ndalaŋ niŋ te.
19 Wana o wana yiyaŋ o kɔl ndɔɔ niŋ,Ɔɔ mbo nɔ kɔl kaloo a sinapɛŋgoo, mbo dimi aa:
“I soliŋ yɔmndo hoo o tiŋ kpeku le yiŋndeŋ kiisuuwo,Mi soliŋ suɛɛŋii nduɛi kpeku le buloo lomɔɔ a visioŋ tuɛiyɔɔ le mi de.
Baa I nɔ pa mi soliŋ o tɔ lo wo kpeku le mi toosiaa nyɛ wɔɔŋ wɔɔŋndo?
Baa I nɔ pa mi sooluu buŋgɛi* fula o yɔmndo ve?”
20 O cho ko maa wana cho pultaŋ dioo wo.
Kɔl ndɔɔ hui ndu, nduyɛ mbo faŋaŋ o nɛi tonyaa choo.
O nɔla mbo piŋi ndupila le, kɛlɛŋgaa niŋ te mbo dimi aa:
O cho choolaŋ te ya nɔ laŋ o ba ni kɛndɔɔ le?”
21 “Loonuŋ sɔɔŋ muŋ num Chekɔpu, a num Isɔluɛi,Kanifuule num cho buɛi nuu ni.
Ya chɔu num ni, nduyɛ buɛi nuu ŋ cho ni.
Num Isɔluɛi, fɛɛŋ bɛɛ I puɛɛnuŋ a num okɔɔ le.
22 I cho yɔŋnda numnda wɔɔŋndaŋ wɔɔsuu naŋ chaa a yumbu yumboo ya kumbu laŋ ni,Nduyɛ mi wɔɔsuu hakila numndaŋ, naŋ chaa a yumbu yumbu ikpuŋgbaa ya kumbu laŋ ni.
Miiŋgu ya o ibuŋ, kanifuule I cho num miŋgi piondɔɔ.
23 Nya cho o choo choo niŋnda, la deŋi choo choo a nyaaloo,Kanifuule Chɛhowa tosa hei ni!
Nya cho o fondaŋnda yiŋgilɛilaŋ o lɛŋndeŋ choo wa, la deŋi choo choo a kɔl kɛndɔɔ!
Nya cho o pemboŋ choo wa, la deŋi choo choo a nyaaloo,Bundɛlaŋ a yɔmii cho leniŋ nde kpou!
Kanifuule Chɛhowa miŋgi Chekɔpu piondɔɔ,Nduyɛ o chɔm naŋɔɔ ndɔ bɛndoo sanaa a Isɔluɛi.”
24 Chɛhowa, Wana Pendu num,Nduyɛ mbo chuau num teleŋ ŋ wa o demboo niŋndo, nyɛ o dimi wo cho hoo ni:
“Ya cho Chɛhowa ni, wana toosiaa nyɛ o nyɛ wo.
A ba ni ya pɛŋgɛla choo choo ni,Nduyɛ mi pɛŋgɛla vɛlɛ lɛŋndeŋ.
Nɛɛnɛ wa yɛ a ya latulu?
25 I cho tɛɛmbuuwo tamasila wanaa dimi sɔɔŋ fondoŋ nda,*Nduyɛ ya tosa ni mi wanaa viam yawalaŋ nda tosa sɔɔŋ naŋ chaa diɔmnda ni.Ya hiŋ wanaa taasiaa hɔlla ni,Nduyɛ mi siiŋguu kɔl kalu ndaa diɔmnde.
26 Ya tosa ni mi nyɛ buɛi nuu dimi wo yɔŋnuŋ,Okoŋ mi peelu sɔɔŋ wanaa niaa viamaa dimi woŋ kpou.Ya dimi a Chulusalɛm okɔɔ ni aa, ‘O cho vɛlɛ wa o piaa cha.’
Nduyɛ mi wa dimioo a chieeŋ bɛndoŋ Chuda okɔɔ aa, ‘Ŋ cho miiŋgu taŋgulɔŋ,Mi miŋgi nyɛ o nyɛ tambu loŋ toosiaa.’
27 Ya cho mɛŋma yiŋgilɛiyaŋ dimullo ni aa, ‘Ma vesa,Nduyɛ I cho peela numndaŋ kpou veeliaa.’
28 Ya cho Sailɔɔ dimullo ni aa, ‘Ndu cho wana ni mandaa lasaa ni,Nduyɛ nyɛ o nyɛ ya yeema ndu mbo tosa, o cho ndu tosa kpou.’Ya cho dimioo a Chulusalɛm okɔɔ ni aa, ‘O cho miiŋgu taŋgulɔŋ,’
Nduyɛ mi wa dimioo a chiɛi Mɛlɛkaa okɔɔ aa, ‘Chiyii numnde cho kilaŋ.’”
Tɛɛsiaalaŋ
^ Ɔɔ “chɔŋ a teleŋ ŋ veluŋ ndo.”
^ Diolaŋ ndaŋ la sim, “Wana Cho Sakpo Wo.” Diola lebɛɛlaŋ la cho ni le Isɔluɛi.
^ Hibuluiye, “kulii numnde.”
^ Koŋ cho ni, piɔmnda.
^ Ɔɔ “piɔm nda toosiaa a chiliŋii teeŋgiɛi yo.”
^ Ɔɔ “bauve.”
^ Ɔɔ “malatoo.”
^ Ɔɔ “o maaŋndo niŋ.”
^ Ɔɔ “buloo.”
^ Ɔɔ “buŋgɛi vesɛi.”
^ Ɔɔ “wanaa lachoowaa suaa le Mɛlɛka wa.”
