Aisaya 45:1-25
45 Nyɛ Chɛhowa dimi a Sailɔɔ, wana ndɔ o pɔya wo okɔɔ wo cho hoo ni,Wana o saa ba ndɔ kɛndɔɔ,Le mi lɛŋnde kpou wa ndu o ba bɛŋgu,Mbo puu masaa waa kpaayalaŋ o ba,Mbo kumbi diola kpakila tiɔɔŋnda cho ndu lachi laŋ,Le halikpeŋ la ve ndu la kindaa lachi le. Mbo dimi aa:
2 “I cho lakɔ num lachi,Mi miŋgi pembuŋ pɔmbɔŋ tɛlɛlɛ.
I cho diola kpakila nda toosiaa a chiliŋii siaŋɛi* laŋ pesi pesi,Nduyɛ mi kili kili chiliŋuŋ cho o diolaŋ ndoŋ.
3 I cho num ke nyɛm baa kalaŋ cho o fondaŋnda manyumndaŋ ndoŋ,Vɛlɛ a nyɛm baa kalaŋ cho ŋ viŋi viŋiaa woŋ,Le halikpeŋ ma sina maa ya cho Chɛhowa ni,Mɛlɛka Isɔluɛiya, o cho num veeloo a diola numndaŋ ndo.
4 Le sabu buɛi nuu Chekɔpu vɛlɛ a Isɔluɛi wana ya hɛli wo,Ya cho num veeloo a diola numndaŋ ni.
I ke num diola lebɛɛ laŋ, mi che bɛɛ a sina ya le.
5 Ya cho Chɛhowa ni, nduyɛ Mɛlɛka cheleŋ cho o ya kɔɔli le.
Mɛlɛka kɛ kɛ cheleŋ cho o ya kɔɔli le.
I cho num yoomuaŋ luei,* mi che bɛɛ a sina ya le,
6 Le mi waŋnda sina maa,Chɔŋ ba paaleŋ le chaŋ ndo haa kɔ ba le del lo,Mɛlɛka o Mɛlɛka cheleŋ cho o ya kɔɔli le.
Ya cho Chɛhowa ni, nduyɛ Mɛlɛka cheleŋ cho o ya kɔɔli le.
7 Ya kila nyɛ wawoŋndo ni nduyɛ mi toosiaa nyumndaŋ.Ya tosa ni mi kɔl nyuloo wa nduyɛ mi hiŋ a kpundɔɔ.Ya Chɛhowa, ya cho sɔɔŋ muŋ kpou tosaa ni.
8 Num choo choo, tosa mi piɔɔ sia.Nduyɛ num yumbu yumboo, tosa mi sakpoyɛi chuchuŋ o lɛŋndeŋ choo.
Lɛŋndeŋ le kumbiŋ mi le yɔŋgu kɔmnde piŋiaa leŋ,Nduyɛ mi le tosa mi sakpoyɛi bɛɛ vil a teleŋ pilɔɔ.
Ya Chɛhowa, ya tosa ni mi hei yɔŋnuŋ.”
9 Kpundɔɔ cho le wana simul* Wana ndɔ Toosiaa* wo.Kanifuule o cho ko maa tɛndu kpɛɛnɛi puuluei,O cho o malaa lɛŋ a tɛndula cheleŋndaŋ ndo.
Baa puuloo nyuna pa wana cho ndu chɔuwɔɔ wo aa: “Yɛɛnɛ ŋ cho yɛ toosiaa?”
Ɔɔ, wali ŋ tosa wo dimul num pa aa: “O nɔ la ba le”?*
10 Kpundɔɔ cho le wana nyuna finya ndɔ aa: “Yɛɛnɛ ŋ velu yɛ hoo?”
A wana nyuna kala ndɔ aa: “Yɛɛnɛ ŋ cho yɛ hoo violɔɔ?”*
11 Nyɛ Chɛhowa, Wana Diandaa le Isɔluɛi, wana chɔu ndu wo dimi wo choo hoo ni:
“Baa a nɔ pa kiisaŋndo a ya le sɔɔŋ nɔ le hunɔɔ woŋ,Ma dimul la nyɛ ya nɔ mi tosa a chuauwaa niaa vɛlɛ a wali ya tosa a bala nilaŋ ndo?
12 Ya toosiaa lɛŋndeŋ ni, nduyɛ mi toosiaa waŋnda chieeya lechoo.
A bala nilaŋ ya pɛŋgɛla choo choo ni,Nduyɛ ya dimul nyɛm cho loŋ ndoŋ kpou nyɛ ŋ nɔ miŋ tosa wo ni.”
13 “I hɛli waŋndo o sakpoyɛi niŋ,Nduyɛ I cho tosa mi nɛila ndɔlaŋ kpou la wa sakpo.
Ndu cho chiee ni bɛndoo taŋgul ni,Nduyɛ mbo mal wanaa niaa cho o biyɔɔ niŋnda fondo fuu, a yɔŋgu paawa* ɔɔ ma tosa luɛiyɔɔ niŋ te.” Chɛhowa, Mɛlɛka puaa chɔuwa dimi lende ni.
14 Nyɛ Chɛhowa dimi wo cho hoo ni:
“Tɔnɔ* Ichipiaŋnda a yulale Itoopiaŋnda a Saabiaŋnda, a bandu bandii bɛnduei ya,Cho hunɔɔ naa num chua miŋ simnuŋ nyɛm num.
A cho wa num hunɔɔ kɔɔli a yɔlɔŋ nda o laba.
A cho hunɔɔ naa num chua ma beŋ num wulaŋ.
A cho dimi o piɛileŋ niŋ naa num chua aa, ‘A tonya, Mɛlɛka cho a num latulu.Wana o wana cheleŋ cho le, Mɛlɛka kɛ kɛ cheleŋ cho le.’”
15 A tonya, Mɛlɛka veŋ ndupila wo ŋ cho ni,Oo Mɛlɛka Isɔluɛiya, Wana Piŋiaa.
16 Siɔmbulaŋ la cho nda kpou tolɔɔ, nduyɛ ma sɔla bɛɛla tambɛilaŋ.Wanaa toosiaa piɔmnda wa kpou, a cho hunɔɔ bɛɛla tambɛilaŋ sɔla.
17 Kɛ Chɛhowa cho hunɔɔ Isɔluɛi piŋi lefafɛɛŋ.
Fɛɛŋ a fɛɛŋ siɔmbula tul num niŋ te, kɛlɛŋgaa niŋ te ma sɔla bɛɛla tambɛilaŋ.
18 Chɛhowa, Mɛlɛka Toosiaa choo choo a lɛŋndeŋ ndo, Mɛlɛka tonyaa,O kila lɛŋndeŋ, mbo toosiaa leŋ, nduyɛ mbo simi leŋ yi wo,O toosiaa leŋ le mi le wa fondo fuu le,* kɛ le mi waŋnda chieeya wa lechoo.Nyɛ o dimi wo cho hoo ni:
“Ya cho Chɛhowa ni, nduyɛ Mɛlɛka o Mɛlɛka cheleŋ cho o ya kɔɔli le.
19 I ve o fondaŋ viaŋnaŋ niŋ mi soo le, fondaŋ cho o nyumndaŋ niŋndo.I dimul chuauwaa Chekɔpu wa* aa,‘La nuuviaa ya, kɛ sɛmbɛ nyaa cho wa fondo fuu’ le.
Ya cho Chɛhowa ni, wana dimi nyɛ cho sakpo, nduyɛ mbo dimi tonyaa wo.
20 La chuuŋgiaŋ naapilɛ mi la hiŋ.
La huŋ diompilɛ, nya hɛluŋ haa o lɛŋii cheleŋnde niŋ mi la huŋ nda.
Wanaa balu haa a piɔmaa nda sɛl la,Nduyɛ ma piɛi mɛlɛka nɔla mbo piŋi nda le wo, a sina nyɛ o nyɛ le.
21 La huŋ a konala nyalaŋ, vɛlɛ a suɛi nyɛi.
La naŋgu naapilɛ o diompilɔɔ niŋ.
Nɛɛnɛ dimi yɛ hei le teleŋ vilɛi,Nduyɛ mbo suaa a hei okɔɔ paandu pa?
Baa o cho ya Chɛhowa le?
Mɛlɛka o Mɛlɛka cheleŋ cho o ya kɔɔli le.Mɛlɛka cho sakpo mbo Piŋi wo ya cho ni. O faŋaŋ o ya kɔɔli, Mɛlɛka cheleŋ cho le.
22 Nya cho o lɛŋndeŋ mɛɛlulaŋ nda kpou, la muliŋ naa ya chua mi la sɔla pioŋɔɔ.Kanifuule ya cho Mɛlɛka ni, nduyɛ Mɛlɛka o Mɛlɛka cheleŋ cho o ya kɔɔli le.
23 I mɛnaŋ a yapila.Nyɛ ya dimi wo fula ya o sondo o sakpoyɛi choo,Nduyɛ mɛɛ mbo yɔŋnuŋ:
Wana o wana cho ya wulaŋ beŋ,Nduyɛ mi wana o wana mɛnaŋ le ya lo lechoo wo chɔmndo.
24 Okoŋ ma dimi aa, ‘A tonya, Mɛlɛka cho sakpo wo Chɛhowa cho ni, nduyɛ o nɔ kpaayaa.
Wanaa dɔɔnuŋ tumbe a ndu wa kpou, a cho hunɔɔ ndu o hɔl a siɔmbulaŋ.
25 Chuauwa* Isɔluɛi kpou cho chɔ maa kɛɛsiaa kɛndɔɔ nda tosa ni le Chɛhowa piɛiyo,Nduyɛ a cho yoŋgaa kiolɔɔ le sɔɔŋ o tosal nda woŋ.’”
Tɛɛsiaalaŋ
^ Ɔɔ “kapaa.”
^ Hibuluiye, “nɛiyo chɔm nyɛkɛndɛi.”
^ Ɔɔ “sim sɛɛŋgiaŋndo a.”
^ Ɔɔ “Wana Chɔu Ndu.”
^ Ɔɔ naapum, “Puuloo dimi pa aa ‘Wali numndo nɔ la lɔɔ le saa le?”
^ Ɔɔ “Yɛɛnɛ ŋ cho yɛ violɔɔ o nyɛ nɛiyaa pulii vialɛi hei niŋ?”
^ Ɔɔ “sala.”
^ Ɔɔ naapum, “Wanaa tosa wallo le.”
^ Ɔɔ naapum, “le mi le wa fondo le.”
^ Hibuluiye, “kulii Chekɔpu ve.”
^ Hibuluiye, “Kulle.”
