Aisaya 46:1-13
46 Bɛl baŋ wulaŋ, mi Nibo naŋguŋ.
A dovi piɔmaa ndaa chɔluaa kua a wolɔɔlaŋ nda o lakɔɔ.Piɔmnda haa cho ko maa wolɔɔla lusulɛila yɔɔkpiaa chɔluaa wa.
2 A tunduŋ nduyɛ ma baŋ wulaŋ diompilɛ.A nɔla ma piŋi wolɔɔlaŋ te,*Nduyɛ ndapila bɛɛ cho lakɔ o biyɔɔ niŋ.
3 “La yaŋ ya nilaŋ nya yuŋgu Chekɔpu wo, a wana o wana lo o yuŋgu Isɔluɛi yo niŋ,Nya ya toolu chɔŋ teleŋ nya wa o demboo niŋ haaa mi la huŋ sɔla violɔŋndo wa.
4 Haaa mi la yuuwa, I siŋgaŋ te.Haaa mi yuluŋnde fula nya, I cho hiouwɔɔ lachi a nya tooloo.
Mɛɛ ya tosa niŋ paandu yɛ, I cho lakɔ a nya, mi toolu nya, nduyɛ mi piŋi nya.
5 A nɛɛnɛ ya siimaŋ yɛ mi la tuu ya a ndu,Ɔɔ a nɛɛnɛ ya velaŋ yɛ mi la tuu ya a ndu?
6 Waŋnda apum cho, ma soli kooliiyoŋ o bɔlɔla ndalaŋ niŋ, ma hulu muŋ kpeŋjeŋ.Ma handu kaniŋ humboŋ o sekeleiyo choo le lusul ndɔɔ sinaa.
Ma paawa* wana tosa wallo a chiliŋndoŋ ndo, le mbo toosial nda mɛlɛka.
Okoŋ ma beŋ ndu wulaŋ, ma sooluu ndu.
7 Ma chua ndu o lachoŋgu,Ma kuɛ a ndu o fondaŋ ndɔɔ, okoŋ ma kɔ simi ndu loŋ.
O nɔla mbo faŋaŋ o fondaŋ ndɔ koŋ te.
Ma chaŋ choo choo o ndu lo le malaa, kɛ o mulul nda le.Nduyɛ, o nɔla mbo piŋi wana o wana o nyɛ palaa niŋ te.
8 La loonuŋ hei, nduyɛ mi la sɔla kɔl dɛɛniaa.
La kɛsiŋ hei o kɔl nya wanaa yɔŋ wɔɔŋnda haa.
9 La loonuŋ sɔɔŋ yɔŋnuŋ o paandoo niŋ pa* woŋ maa ya cho Mɛlɛka ni,Nduyɛ Mɛlɛka o Mɛlɛka cheleŋ cho o ya kɔɔli le.
Ya cho Mɛlɛka ni, nduyɛ Mɛlɛka o Mɛlɛka cho maa ya le.
10 Chɔŋ o kandɔŋndo, mi dimul nya sɔɔŋ nɔ le yɔŋnɔŋndo woŋ.Nduyɛ le teleŋ vilɛi niŋ, mi dimul nya sɔɔŋ yɔŋnuŋ ndɔ bɛɛ le woŋ.
Lelaŋ ya dimi ni aa, ‘Kɛɛsiaa* nuu cho lasisi,Nduyɛ nyɛ o nyɛ ya yeema pɛ, I cho ndu tosa.’
11 I cho you biyaa veelu ba paaleŋ le chaŋ ndo,Mi veelu waŋndo o lɛŋnde cho landaŋ ndeŋ niŋ le kɛɛsiaa* nuu tosaa.
Ya soo ni, nduyɛ I cho ndi tosa.
Ya kɛɛsiaa ndi ni, nduyɛ I cho ndi vɛlɛ tosa.
12 La yaŋ ya nilaŋ, nya wanaa nila kaluaa* haa,Nya cho haa landaŋ a sakpoyɛi wa.
13 I hiŋ a sakpoyɛi nii nya ikɛi,I cho lɛ landaŋ a nya le,Nduyɛ piŋi nuu cho viouwɔɔ le.
I cho Saayɔŋ piŋi, nduyɛ mi chɔm Isɔluɛi naŋɔɔ nuu.”
Tɛɛsiaalaŋ
^ Koŋ cho ni, piɔmaa cho chɔluaa o lakɔɔ wa.
^ Ɔɔ “sala.”
^ Hibuluiye, “o tasela ndɔ.”
^ Ɔɔ “Sabu ɔɔ Sila.”
^ Ɔɔ “sabu.”
^ Hibuluiye, “kpaayaa.”