Aisaya 47:1-15
47 Num chua laandu yufuaanɔɔ Babilɔŋ,Tol ma chal o chundoo niŋ.
Num chua laandu Kaadiaŋnda,Chal lɛŋ naa kpeŋgbei* lemasa cho le wa.Kanifuule, fɛɛŋ bɛɛ wana o wana veelu lɛ num maa chua lemasaa le ŋ cho le.
2 Chua pou nda chuii nyɔɔŋ ndo ma chuii kpeyaŋndo.
Faŋa kola waaŋgaawo num o hɔl.
Soliŋ doma vilɛiyo lekɔɔ, mi lɔlula numndaŋ la lo fondo.
Taŋ peelaŋ.
3 A cho num yuŋga ma lo tum fondo.
Dialuŋ num lasiɔmboŋ cho chɔɔmɔŋ.
I cho num maa miŋgul, nduyɛ wana o wana cho ya lasisi o nɛi le.*
4 “Wana cho naa piondɔɔ wo,Diola ndɔlaŋ la cho Chɛhowa, Mɛlɛka puaa chɔuwa ni.Ndu cho Wana Diandaa le Isɔluɛi ni.”
5 Num chua laandu Kaadiaŋnda,Chal nda ma mei kpili o nyumndaŋ niŋ.Fɛɛŋ bɛɛ waŋnda veelu lɛ num aa, Masa Laandu cho Masɛi bolle wo le.
6 Mi tuulu kɔllo a wanaa niaa.
Mi chɛl mi wanaa niaa simnuŋ wanaa nɔɔlɛi,Nduyɛ mi mal nda num o ba.
Kɛ a tuiinuŋ nda inyiɛɛ le.
Hali a yuwɛiya bɛɛ, ma siiluu nda wolɔɔla lusulɛilaŋ.
7 Ma dimi aa: “Le teleŋ o teleŋ I cho wa Masa Laandoo le fɛɛŋ a fɛɛŋ.”
A hendu kɔllo o sɔɔŋ muŋ choo le,Nduyɛ a yiyaŋ pɛŋ mɛɛ suɛi hei cho mɛɛlu yɛ le.
8 Lelaŋ yaŋ niko nilaŋ, num kaala hoo yelelaŋndo,Num cho hoo o chaŋnaŋ hɛnɛkɛ, ma dimi o kɔl niŋ aa:
“Ya cho ya ni, wana o wana cho maa ya le.
Fɛɛŋ bɛɛ I vii pɔnɔɔ le,
Nduyɛ fɛɛŋ bɛɛ I viikuu chuauwa le.”
9 Kɛ sɔɔŋ muuŋ ndoŋ muŋ cho num komal o lepilɛ niŋ kpe, nduyɛ o paaleŋ le pilɛ niŋ kpe:
A cho chuauwa viikuu nduyɛ ma vii pɔnɔɔ.
Sɔɔŋ muŋ cho num komal nduyɛ miŋ kindila num mɛɛ,Le mɛɛ ŋ cho yawala bɔɔbɔɔ viomɔɔ nduyɛ ma nɔ kooma wɔɔŋ wɔɔŋndaŋ o ba yɛ.
10 Ma tiindaŋ o dɛnɛ wɔɔŋ numndo niŋ.
Ma dimi aa: “Wana o wana cho ya chɔ le.”
Taasi numndo a kɔl kalu numndo laasiaa num ni,Nduyɛ ma dimi o kɔl niŋ aa: “Ya cho ya ni, wana o wana cho maa ya le.”
11 Kɛ kpundɔɔ cho num komal,Nduyɛ kooma wɔɔŋ kɛ kɛ ŋ nɔ, ma nɔla ndu kuuna le.
Nyɛpalaa bɛndoo cho num tolɔɔ choo, a nɔla niŋ ma hɛluŋ ndu le.
Tambii ŋ sina kani bɛɛ le ve cho num komal o lepilɛ niŋ kpe.
12 Hiou lachi a kooma wɔɔŋ cho num o ba waŋ soliŋndo kpeku, vɛlɛ a yawalaŋ viomɔɔ,Mɛɛ ŋ bii niŋ tosaa chɔŋ o feleŋgɔyɛi numnde niŋ yɛ.
Naapum a sɔla niŋ tɔnɔɔ leniŋ.Naapum a tosa niŋ mi siooŋnde bii waŋnda.
13 A saŋga niŋ yɔkɔɔ a wanaa silaa bɔɔbɔɔ nuuviaa.
A chɔŋ niko ma piŋi num,Wanaa sooluu nyɛm cho o choo choo niŋndoŋ nda, wanaa tofa looŋ nda,Wanaa tofa paŋguŋ sɛnɛiyoŋ,Okoŋ ma dimul num nyɛ nɔ le num yɔŋnɔŋndo o chilaŋ niŋndo wa.
14 Nda kpou cho ko maa bil vesɛi.
Yiŋndeŋ le cho nda lomɔɔ.
A nɔla ma piŋi ndapila o yiŋnde bɛnduleŋ niŋ te.
Le cho yiŋnde isuɛɛŋ wana haŋgu le ma sinaŋ lafuu le,Nduyɛ o cho yiŋnde wana chal lachi le.
15 Lende wanaa num aa kooma wɔɔŋnda cho simnɔŋ le num ni,Wanaa ŋ bii niŋ wallo a nda chɔŋ o feleŋgɔyɛi numnde niŋnda.
A cho saŋnɔŋ, mi o kɛ kɛ kuɛ nɛi ndɔ.*
Wana o wana nɔla niŋ num piŋi le.
Tɛɛsiaalaŋ
^ Ɔɔ “kpɛŋɛ.”
^ Ɔɔ naapum, “I cho wana o wana komal o kɔl nyulu niŋ te.”
^ Hibuluiye, “o tanda ndɔɔ niŋ.”
