Aisaya 48:1-22
48 La yaŋ nilaŋ, nya yuŋgu Chekɔpu wo,Nya cho nyapila veelɔŋndo a diola Isɔluɛi laŋ,Nduyɛ mi la fula o mɛŋndaŋ Chuda* wa,Nya cho mɛnaŋndo o diola Chɛhowa laŋ niŋ,Nduyɛ mi la veelu Mɛlɛka Isɔluɛiyo wa,Mi che bɛɛ o cho o tonya choo a o sakpoyɛi choo le.
2 Kanifuule a dimi maa a cho o chiee diandaa niŋ,Ma wa Mɛlɛka Isɔluɛiya nyunaa le malaa,O nɔ diolaŋ aa Chɛhowa, Mɛlɛka puaa chɔuwa wo.
3 “Mi dimul num sɔɔŋ o paandoo niŋ pa.*
Yapila kpeekpei dimi sɔɔŋ muŋ ni,Nduyɛ mi tosa ma sina muŋ.
O lepilɛ niŋ kpe mi tosa nyɛ, okoŋ miŋ yɔŋnuŋ.
4 Kanifuule I sina maa wana bolle kalaa ŋ cho ni.Chiliŋnde kɛsii numnde cho ni, nduyɛ chiliŋii siaŋɛi* tendii numnde cho ni.
5 Paandu pa ya dimul num ni.
Tuupa mi i yɔŋnuŋ, mi tosa ma tuɛi a ndi okɔɔ.Le halikpeŋ a dimi nuaa aa, ‘Piɔm nuu tosa hei ni.Piɔm ni ya sɛl lo a o ya toosiaa a chiliŋnde wo* dimi ni mi hei yɔŋnuŋ.’
6 Ma tuɛi nduyɛ ma cha nyɛ o nyɛ fee.
Baa a dimul acheleŋnda a ndi okɔɔ le?
Chɔŋ niŋ kɔ kɛ, I cho sɔɔŋ sɛnɛiyoŋ yondaa naa num chua,Sɔɔŋ viaŋnaŋ ŋ sina a muŋ okɔɔ le woŋ.
7 Suŋ suŋ koni ŋ toosiaŋ ni, ŋ viu wɔ bɛɛ le,Sɔɔŋ num oo tui paandu a muŋ okɔɔ le woŋ mɛɛ hau.Le halikpeŋ a dimi nuaa aa, ‘Yaa sina niŋ a muŋ okɔɔ.’
8 Sako, num aa tuiyɔ le, num aa sina le,Nduyɛ nila numndaŋ la ve la kumbiaŋ o paandoo niŋ te.
Kanifuule I sina maa wana huiyaa pila ŋ cho ni,Nduyɛ chɔŋ a teleŋ ŋ veluŋ ndo, wana yɔŋ wɔɔŋndo ŋ cho ni.
9 Kɛ le sabu diola nilaŋ, I cho kɔl ni tuuwo biyɔɔ.Le mi sɔla saŋgalaa, I cho kɔl tuu ya nɔ le nya wo biyɔɔ,Nduyɛ I cho nya tɛɛmbuu le.
10 I dindi nya, kɛ o cho mɛɛ nda dindi kanii humbuei yɛ le.
I tofa nya o yiŋnde tondoleŋ niŋ a nyɛpalaa.
11 A tonya, le sabu diola nilaŋ, I cho isɔɔ tosa.Le yɛɛ mi chɛl mi diola nilaŋ la nɔɔla?
I ke wana o wana cheleŋ bɛɛle cho le ya leŋ te.*
12 Yaŋ nilaŋ Chekɔpu, a Isɔluɛi, num ya veelu wo.
I siŋgaŋ te. Ya cho wana tasoo ni, nduyɛ ya cho wana mɛɛlaa ni.
13 A ba nuu ya kila chiyii chieeŋndo ni,Nduyɛ a ba ni kɛndɔɔ ya pɛŋgɛla choo choo ni.
Te I veelu nyɔɔŋ muŋ pɛ, ŋ sim diompilɛ.
14 Nya kpou la chuuŋgiaŋ naapilɛ, mi la yaŋ nilaŋ.
Nɛɛnɛ cho yɛ nda tɛɛŋ mbo yonda a sɔɔŋ muŋ okɔɔ?
Chɛhowa ndoo kaala ndu.
O cho nyɛ o yeema wo tosa a Babilɔŋ,Nduyɛ mbo chiŋalaŋ Kaadiaŋnda a ba ndɔɔ.
15 Yapila soo ni, nduyɛ ya veelu ndu ni.
Ya hiŋ a ndu ni, nduyɛ o cho batiuwaa sɔla o nyɛ o cho tosaa wo niŋ.
16 La sɔɔŋguu ya ikɛi, mi la yaŋ nilaŋ.
Chɔŋ o kandɔŋndo pa, I suu o vioŋnɔŋ niŋ te.
Chɔŋ a teleŋ i yɔŋnuŋ ndo, I wa loŋ.”
Chɛhowa, Mɛlɛka Kpuluŋguma Bɛndoo vem ya ni, nduyɛ mbo ke ya nyina ndɔɔ.*
17 Nyɛ Chɛhowa, wana Pendu nya wo, Wana Diandaa le Isɔluɛi dimi wo cho hoo ni:
“Ya Chɛhowa, ya cho Mɛlɛka numndo ni.Ya cho num pɛɛkoo ni le tɔnɔ numndo,*Nduyɛ mi wa num chɔmndo nɛi ŋ nɔ ma kuɛ choo wo.
18 Te a handu pɛ kɔllo o sawala nilaŋ choo,
Kɔl nyulu numndo cho simnɔŋ maa mɛŋma pee bɛndu,Nduyɛ mi sakpoyɛi numnde wa mɛɛ pee mɛŋma ihɛllo muuluŋ nuaa yɛ.
19 Chuauwaa numnda* wa wa tau maa isiooŋ,Nduyɛ mi chuauwaa num aa mamaa bɛɛ ndaa wa tau tau mɛɛ siooŋnde cho nuaa yɛ.
Fɛɛŋ bɛɛ diola ndalaŋ la ve kiolu le, kɛlɛŋgaa niŋ te mi la faŋaŋ ya o hɔl.”
20 La fula Babilɔŋ!
La nyaanuŋ Kaadiaŋnda!
La yonda ndi a kɔl kɛndɛ bɛndoo! La yonda ndi!
La tosa mi wanaa cho o lɛŋndeŋ mɛɛlulaŋ nda sina a ndi okɔɔ.
La dimi aa: “Chɛhowa miŋgi buɛi ndɔɔ Chekɔpu piondɔɔ.
21 Teleŋ o sim nda lachi ma keeku o fondaŋnda wɔɔŋ wɔɔŋndaŋ ndo, o chɛl mi bolola vesa nda le.
Mbo tosa mi mɛŋndaŋ ma fula o pouwo niŋ le nda.Mbo tɛnda pouwo nduyɛ mbo tosa mi mɛŋndaŋ ma fula ma hɔbɛi.”
22 Chɛhowa dimi aa: “Kɔl nyulu cho le wanaa dɛnɛ wɔɔŋnda le.”
Tɛɛsiaalaŋ
^ Ɔɔ naapum, “o pulale Chuda leŋ choo.”
^ Hibuluiye, “tasela ndɔ.”
^ Ɔɔ “kapaa.”
^ Ɔɔ “piɔm nda toosiaa a chiliŋii teeŋgiɛi yo.”
^ Ɔɔ “I piɔu bɛɛle nileŋ a wana o wana cheleŋ te.”
^ Ɔɔ “nduyɛ nyina ndɔɔ cho a ya latulu.”
^ Ɔɔ “le dɛnɛ num kɛndɔɔ.”
^ Hibuluiye, “Kulii numnde.”
