Aisaya 49:1-26
49 Nya cho o lɛŋii mɛŋndaŋ ma balu ve niŋnda, la yaŋ ya nilaŋ.Nduyɛ nya cho o lɛŋii cho landaŋ landaŋ nde niŋnda, la handu kɔllo o nyɛ ya cho dimioo wo choo.
Chɛhowa ndoo veelu ya niŋ fɛlɛŋ tuupa mi vialuŋ.*
Teleŋ ya wa kala nuu o dembe wo o veelu ya a diola nilaŋ ni,
2 Mbo tosa sondo nuu naŋ chaa muɛi faŋii luɛiyɛi ni,Mbo viaŋ ya o wundule ba ndɔɔ bɛŋgu,
Mbo bɛɛndiaa ya mɛɛ nda bɛɛndiaa nuaa chiŋɔleŋ nyɛkɛndɛi yɛ,Nduyɛ mbo viaŋ ya o bɔlɔ ndɔ machiŋɔɔ niŋ.
3 Mbo dimul la aa: “Num cho buɛi nuu ni Isɔluɛi.O num niŋ ya cho naŋɔɔ nuu chɔm ni.”
4 Kɛ mi dimi aa: “Fondo fuu ya saaŋgiaŋ ni.
I soliŋ yoomuma niaŋ kpeku le nyɛ cho kpeekpei le wo, mi saŋga nuu kuaŋnuŋ fondo fuu.
Kɛ a tonya, Chɛhowa cho ya yamɛi kilul ni,*Nduyɛ Mɛlɛka nuu cho ya paawa* ni.”
5 Lelaŋ Chɛhowa, num chɔu ya buɛi numndo o demboo niŋndo,Dimul la le mi miŋgi Chekɔpu pila o ndu lo,Le halikpeŋ mi Isɔluɛi miiŋgu naa ndu chua.
I cho bɛɛleŋ sɔla Chɛhowa o hɔl,Nduyɛ mi Mɛlɛka nuu simnuŋ yoomuma niaŋ.
6 Mbo dimi aa: “O cho letuu le ma wa buɛi ni,Le ma manda kaala Chekɔpu laŋ,Nduyɛ ma miŋgi wanaa lo yoomu Isɔluɛi ya le.
I siiŋguu num vɛlɛ maa nyɛ wawoŋ le lɛŋnde,Le halikpeŋ mi pioŋɔɔ nuu fuuluu o lɛŋndeŋ mɛɛlulaŋ.”
7 Nyɛ Chɛhowa, wana Pendu Isɔluɛi yo, Wana ndɔ Diandaa dimul wana nda pɛɛsa wo, wana nda che maa nyɛ wɔɔŋ o lɛŋnde niŋndo, wana cho buɛiyo le masaa waa wo cho hoo ni:
“Masaa waa cho chɔ ma chɛŋ isisi,Nduyɛ mi laŋgbaa kalla che ma baŋ wulaŋ,Le bɛɛle nda nɔ le Chɛhowa, o cho wana sakpoo wo,Wana Diandaa le Isɔluɛi, o hɛli num ndo.”
8 Nyɛ Chɛhowa dimi wo cho hoo ni:
“A teleŋ sɔɔŋ muŋ bɛnda wo,* mi muli num diom.Nduyɛ paale ŋ sɔla pioŋɔɔ leŋ bɛɛ, mi mala num.Mi hiau lachi a num mandaa le halikpeŋ ma wa kpemaa naa tɛɛŋ naa waŋnda,Le mi miŋgi lɛŋndeŋ bɛɛndiaa,Nduyɛ mi tosa nda ma sɔla nyɛm kɛŋ ndaŋ muŋ tambu woŋ,
9 Le ma dimul wanaa cho o chiɛila manyumndaŋ niŋnda aa, ‘La fula!’
Nduyɛ ma dimul wanaa cho o nyumndaŋ niŋnda aa, ‘La chɔɔmuŋ nyapila!’
A cho wa nyɛdiaa dioo o nɛilaŋ,Nduyɛ naa waŋnda hiau tau wa,* loŋ nda cho billo sɔla le dioo ni.
10 Yima nɛi niŋ nda le, bolola vesa niŋ nda le,Haŋgul tuu komal niŋ nda le, kɛlɛŋgaa niŋ te mi paaleŋ le lɔɔ nda.
Kanifuule wana tuiinuŋ nda inyiɛɛ yo cho nda isisi lachi,Nduyɛ mbo kuɛ a nda o fondaŋ mɛŋndaŋ ma cho wo.
11 I cho pembuŋ niŋ bɛndoŋ kpou miŋgi nɛilaŋ,Nduyɛ nɛila nila bɛndulaŋ kpou, mi heelu laŋ tema.
12 Nda kpou cho chɔnɔŋndo o fondaŋnda landaŋ ndaŋ.Haa cho fulaa ba luaŋ ndo, mi haa wa fulaa ba paaleŋ le del lo,Nduyɛ mi haa wa fulaa o lɛŋnde Sinim ndeŋ niŋ.
13 Nya cho o choo choo niŋnda, la deŋi choo choo a nyaaloo, nduyɛ nya cho o lɛŋndeŋ choo wa, la wa a kɔl kɛndɛ.
Pembuŋ bɛndoŋ deŋi choo choo a nyaaloo.
Kanifuule Chɛhowa dɛɛniaa wanaa nduaa kɔllo,Nduyɛ mbo tuiinuŋ wanaa nduaa nda tusi nyɛpalaa choo wa inyiɛɛ.
14 Kɛ mi Saayɔŋ hiau lachi a dimioo aa:
“Chɛhowa mal la, nduyɛ Chɛhowa puɛɛnuŋ a ya okɔɔ.”
15 Baa wana lanɔɔ puɛɛnuŋ pa hɔɔ ndɔ o cho wuɛsioo wo,Ɔɔ o chɔm inyiɛɛ le hɔɔ fula ndu o dembe wo le?
O yɔŋ bɛɛ mi wana lanɔɔ puɛɛnuŋ, fɛɛŋ bɛɛ I puɛɛnuŋ num te.
16 I poonyiaa diola numndaŋ o bala nila kɔltaŋ.
Kpakila numndaŋ la cho ya o hɔl teleŋ o teleŋ.
17 Puaa numnda miiŋgu chɔ chɔ.
Wanaa sɛɛsiaa num ma tɛɛmbuu numnda cho num nyaanɔŋ.
18 Heelu wɔ hɔlla ma mɛɛndaŋ ba o ba fee.
Nda kpou cho chuuŋgiaŋndo naapilɛ.
A cho hunɔɔ naa num chua.
Chɛhowa dimi aa, “I mɛnaŋ po maa te I cho yoomu pɛ,A cho nda wounɔŋ mɛɛ ŋ chuɛɛnuŋ nuaa nyɛm kɛvɛlɔŋ yɛ,Nduyɛ a cho nda baanɔŋ kpiŋ mɛɛ wana cho challe o nɔɔ wo wounuŋ nuaa yɔɔwaa o labolo yɛ.
19 Mi che bɛɛ fondaŋnda nyalaŋ la wa la tambɛi mi la lo pɔm, nduyɛ mi lɛŋnde nyaleŋ le tambu,Kɛ le cho hunɔɔ simnɔŋ le pɔmbuiinii le wanaa wa niŋ loŋ nda,Nduyɛ wanaa tusi num nyɛpalaa choo wa cho hunɔɔ wa landaŋ.
20 Chuauwaa ŋ velu teleŋ ŋ wa mɔnɛi biyɔɔ wo wa cho num wa dimullo aa,‘Fondɛi hei dɔɔnaŋ bɔɔ a naa.
Toosial naa lumuiyo le miŋ wa loŋ.’
21 Nduyɛ a cho dimi o kɔl niŋ aa,‘Nɛɛnɛ cho yɛ finyaa le chuauwaa ya sɔla haa wa?Kanifuule wana lanɔ viikuu chuauwa wo ya cho ni, I vilu lɛ le,Ma kua a ya o biyɔɔ niŋ, nduyɛ ma duau ya o chiɛi manyumndo niŋ.
Nɛɛnɛ manda yɛ chuauwa haa?
Kanifuule yapilɛ wa ni.Lelaŋ kuɛɛnɛ nda fula yɛ?’”
22 Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni:
“I cho lɛŋnde ba nuu heelul,Nduyɛ mi simi tamasi nuu le mi waŋnda kpou che.
A cho hunɔɔ a puaa num aa ŋ velu wa o laba,*Nduyɛ ma hiŋ a chuauwaa num aa laanduaa o lachoŋgu.
23 Masaa waa cho hunɔɔ wa wallo tosaa le num ni,Nduyɛ mi chuauwaa ndaa laanduaa manda chuauwaa numnda.
A cho hunɔɔ num wulaŋ beŋ okoŋ ma fuuluu hɔlla lɛŋ,Nduyɛ ma deembuu chundu cho wa num o ŋpelu wo.Teleŋ koŋ ŋ cho sina ni maa ya cho Chɛhowa ni.Wana o wana dɔu tiindaŋndo o ya niŋ pɛ, siɔmbula bii ndu le.
24 Te wana kpaaya bɛndoo bii pɛ waŋnda, baa wana nɔla pa ma poonda nda ndu o ba?Ɔɔ wana tusi waŋnda nyɛpalaa choo wo bii pɛ waŋnda, wana nɔla pa nda ndu poonda o ba?
25 Kɛ nyɛ Chɛhowa dimi wo cho hoo ni:
“O yɔŋ bɛɛ mi wana kpaaya bɛndoo bii waŋnda, a cho ndu nda poonda o ba.Nduyɛ o yɔŋ bɛɛ mi wana tusi waŋnda nyɛpalaa choo wo bii waŋnda, a cho ndu nda poonda o ba.
Wanaa cho num nyɛpalaa tusioo choo wa, I cho nda nyɛpalaa tusi choo,Nduyɛ I cho chuauwaa numnda piŋi.
26 Wanaa bii num biyɔɔ wɔɔŋndo wa, I cho tosa ma de dialuŋ ndaŋ.Nduyɛ a cho kooma ndaŋ kolɔɔ mi ma bii nda, naŋ chaa muɛima yeelɛiyaŋ nda kol ni.
Waŋnda kpou cho sina maa ya cho Chɛhowa ni,Wana num Piŋiaa, wana Pendu num ndo,Wana Kpaaya Bɛndoo le Chekɔpu.”
Tɛɛsiaalaŋ
^ Hibuluiye, “o demboo niŋ.”
^ Ɔɔ “Chɛhowa cho ya di nuu ke.”
^ Ɔɔ “fanda.”
^ Ɔɔ “wa nyɛkɛnɛi yo.”
^ Ɔɔ naapum, “pembuŋ nɔ tɔlɔɔ lechoo le woŋ.”
^ Hibuluiye, “o ibuŋ.”
