Aisaya 5:1-30
5 A yandii, I soli wɔɔ chondei o wana ya kaala wo lo.A wana ya kaala wo vɛlɛ a kpele ndɔ makilepiiyo okɔɔ chondei hei cho ni.
Wana ya kaala wo ndoo nɔ kpele makilepiiyo o pembii naŋ tɔlɔɔlaŋ nde holnɔŋndo.
2 Mbo tuau sooŋndo nduyɛ mbo duau ndu o kpakioo niŋ a poutaŋ.
Mbo tual kilepiima kɛndɛ kɛndɛma siaŋaŋ leniŋ,Mbo taŋgul bandoo o kpeloo hoo tɛɛŋ,Nduyɛ mbo tuau doola nda toosiaa muɛiyaŋ ndo leniŋ.
Ndoo nɔ tiindaŋndo maa kpeloo hoo cho wa kilepiima kɛndɛ kɛndiaŋ komɔɔ,Kɛ kilepiima wɔɔŋndaŋ o wa komɔɔ ni.
3 “Lelaŋ nya waŋnda Chulusalɛm a waŋnda Chuda,Yandii la kiolu naa yamɛi tɛɛŋ naa kpele ni makilepiiyo.
4 Yɛɛ cheleŋ ya nɔ yɛ vɛlɛ mi tosa le kpele ni makilepiiyo,O ya tosa wɔ le wo?
Yaa nɔ tiindaŋndo le mbo kom kilepiima kɛndɛ kɛndiaŋ,Kɛ le sabu yɛɛnɛ o kom yɛ kilepiima wɔɔŋndaŋ?
5 A yandii, I dimul lɔɔ numNyɛ ya cho tosa a kpele ni makilepiiyo wo:
I cho kuŋga balu ndu wo puusiaa,Nduyɛ mi mal ndu o yiŋ.
I cho kpaki ndɔ la pouwo pesi pesi,Okoŋ mi chuii laŋ mululu.
6 I cho tosa mbo simnuŋ lɛŋnde polteŋ.I cho kilepiima cho leniŋ ndaŋ wa kɛiyaa ɔɔ hɔɔnuu le.
O cho wa mɔndɔ mɔndɔ a yɔɔŋ vɛlɛ a billo,Nduyɛ I cho tosa piɔɔ cho wa sia loŋ te.
7 Waŋnda Isɔluɛi cho kpele makilepii Chɛhowa wo ni, Mɛlɛka puaa chɔuwa.Waŋnda Chuda cho tɔlɔɔ ndoo hɛnaŋ tau wo ni.
Ndoo nɔ tiindaŋndo maa sandei cho wa,Kɛ kafalaŋ kposoŋ la wa ni.Ndoo nɔ tiindaŋndo maa sakpoyɛi cho wa,Kɛ chaŋnda imɔnɔlaŋ kposoŋ la wa ni.”
8 Wanaa tomboliaa chiɛilaŋ,Nduyɛ ma lo yondolaŋ biu biuwo le ndapila,Haaa fondaŋ lo lɛ le acheleŋnda le wa, kpundɔɔ cho le nda.Nya kinɛi lɛŋndeŋ le cho niŋ o ba ni!
9 Mi tuɛi Chɛhowa Mɛlɛka puaa chɔuwa mɛnaŋndo maa,Mi che bɛɛ mi chiɛilaŋ la wa tau, nduyɛ mi la naŋ naŋɔɔ pila,La cho hunɔɔ tambei sɔla mi siooŋnde bii waŋnda a nyɛ cho laŋ yɔŋnɔŋndo,Nduyɛ wana o wana cho wa leniŋ te.
10 Kpele makilepiiyo hekɛilaŋ tɔ cho muɛiyaŋ soli bafuiyo o pilɛ,*Nduyɛ mi fondaŋ nda saŋ kulloŋ hɔmɛiyo cha wo* soli ɛfaa o pilɛ.*
11 Kpundɔɔ cho le wanaa pena chɔŋnɔŋ idii pum le muɛima nɛiyaa nɛiyaŋ kolɔɔ wa,Vɛlɛ a wanaa lo piuwo o maŋ choo pili pili haaa mi ma bii nda wa!
12 Ma nɔ towalaŋ a nyɛm chaaŋ iyooŋ,Dundula pɔmbɔlaŋ, sɛŋndeŋ, a muɛiyaŋ o dunyaŋ ndaŋ choo.Kɛ a chue pɛŋ sɔɔŋ cho a Chɛhowa okɔɔ woŋ ŋ sɔvɛ le,Nduyɛ a chi walta o tosa a bala ndɔlaŋ ndaŋ te.
13 Lelaŋ wanaa niaa cho lakɔ o biyɔɔ niŋ,Le kɔl kalu lepɛŋndo.Wanaa ndaa fula tɔɔ wa cho wa a yiaaŋ,Nduyɛ mi wanaa ndaa kpou wa a bolola vesɛilaŋ le mɛŋma lepɛŋndaŋ.
14 Le hei, Sɛiyo* chɔɔlu kumbiŋ o bɛndu bɛndu,Nduyɛ mbo kumbi sondoo wakpa o nɔ lamɛɛlu le.Naŋɔɔ bɛndu Chulusalɛm ndoo naŋ ndo,* tɔɔ bɛndu ndoo nɔ wo, vɛlɛ a iwɔkɔ wɔkuɛi wa loŋ a faŋga bɛndoo wo,O cho hunɔɔ lakɔ o sɛi koŋ niŋ.
15 Waŋnda cho wulaŋ baŋɔɔ,Ma tusiŋ toolo,Nduyɛ mi wanaa heeluŋ nda tol toolo.
16 Chɛhowa, Mɛlɛka puaa chɔuwa cho tɔɔ fula a yamaŋ o kialu woŋ.*Mɛlɛka tonyaa, Wana Diandaa cho ndupila dindi a sakpoyɛi.
17 Saa fɔŋnduaa cho wa billo dioo loŋ naŋ chaa naa ndaa diaa bil la nda cho ni,Nduyɛ fondaŋnda tambɛila visiaa ndaa dia nyɛdiaa laŋ, loŋ mialla cho niŋ wa nyɛdiaa dioo ni.
18 Kpundɔɔ cho le wanaa dimi choolaŋ nda. Kanifuule a cho a yiyaa poŋ o sɔɔŋ ndaŋ wɔɔŋndoŋ a o hakila ndalaŋ,Mɛɛ nda yii nuaa nyɛ nyaanaŋndo visioo kɔɔli mbo kua a ndu nanɔɔ yɛ.
19 Wanaa dimi aa: “O keleŋa chɔ chɔ,O keleŋa wali ndɔɔ tosa le miŋ che ndu.
Maa sabu* Wana Diandaa le Isɔluɛi yɔŋnuŋ,Le miŋ sina ndu!”
20 Kpundɔɔ cho le wanaa siiŋguu sɔɔŋ kɛndɔŋ sɔɔŋ wɔɔŋndoŋ, ma siiŋguu sɔɔŋ wɔɔŋndoŋ sɔɔŋ kɛndɔŋ nda.Kpundɔɔ cho le wanaa che nyumndaŋ maa nyɛ teŋgaa wa, a wanaa che nyɛ teŋgaa maa manyum nda.Kpundɔɔ cho le wanaa che nyɛ lolɛiyo maa nyɛ yeelɛi ya, a wanaa che nyɛ yeelɛiyo maa nyɛ lolɛi ya.
21 Kpundɔɔ cho le wanaa tiindaŋ o taasi ndaa niŋ nda,Vɛlɛ a wanaa tiindaŋ o sinapɛŋgu ndaa niŋ nda!
22 Kpundɔɔ cho le wanaa fula tɔɔ le muɛiyaŋ kolɔɔ bɛndu bɛndoo wa,A wanaa chaa muɛima nɛiyaama suu o suu muuliaŋndo ma hiau wana o wana wa.
23 Nduyɛ kpundɔɔ cho le wanaa bii luɛiyɔɔ niŋndo ma mal wanaa dɛnɛ wɔɔŋnda wa,A wanaa kɛɛ wanaa sakpuaa dila ndalaŋ kioo wa!
24 Lelaŋ, mɛɛ yiŋnde bɛnduleŋ le luam nuaa fueende,Mi bil vesɛiyo wa sandei o yiŋndeŋ niŋ wum wum yɛ,Mɛɛ puunduŋ yɔmndo ŋ sia nuaa,Nduyɛ mi peeŋgela ndɔlaŋ la saŋnuŋ maa kpeyaŋ yɛ, lende nda cho hunɔɔ tambei sɔla ni.Kanifuule a kɛɛ sawa* Chɛhowa wo, Mɛlɛka puaa chɔuwa,Nduyɛ a chɔm lebɛɛ le diom Wana Diandaa le Isɔluɛi le.
25 Le sabu koŋ Chɛhowa dɔɔnuŋ tumbe o kala kala a wanaa nduaa ni,Nduyɛ o cho ba ndɔɔ siɛndi le nda nyɛpalaa tusioo choo mbo tɛɛmbuu nda.
Pembuŋ bɛndoŋ cho hiilɔŋ,Nduyɛ mi dialuŋ ndaŋ vilɛiyoŋ tiu o nɛila bɛndu laŋ choo silɔ maa bil.
Le sɔɔŋ muŋ kpou kɔl ndɔ tuuwo cho wɔ hiouwɔɔ lachi ni,Mbo wa wɔ ba ndɔɔ siɛndioo le nda nyɛpalaa tusioo choo.
26 O simi nyɔɔ maa tamasi o lɛŋnde cho landaŋ ndeŋ niŋ.O hɔŋ huiye le ma chɛŋ naa nda cho o lɛŋndeŋ mɛɛlulaŋ nda ma hiŋ.Nduyɛ, a cho hunɔɔ kpeekpei a kiltaŋ.
27 Wana o wana cho nda tɛɛŋ mbo saŋga ɔɔ mbo boŋ te.
Lɔma hiŋ wana o wana o hɔl mbo lɔl te.
Yauvii cho nda o chaŋnde tiimbuŋ te,Kɛlɛŋgaa niŋ te mi yuei lakɔvɛiye* kioli kioli.
28 Chiŋɔma ndaŋ kpou ma cho siombu siombu,Nduyɛ mi chiɔula ndalaŋ la wa la tuunduɛi.*
Buukula suaa ndaa la cho ko naŋ chaa pou luɛiyaa ni.Nduyɛ te peluŋ nyɛm nyaanaŋ suaa ndaa naŋndoŋ wa pɛ kɔlaŋ, naŋ chaa hueiyii bɛndu bɛnduei cho hɔŋndo ni.
29 Ma pɛɛliaa naŋ chaa kpɔkuŋndo* ni,Ma pɛɛliaa naŋ chaa kpɔkuŋaa fɔŋnduaa ni.
A cho hunɔɔ pɛɛliaa ma bii yaamɔɔwaa ndaa ma kuɛŋnuŋ a nda,Wana o wana cho nda nɔla piŋi le.
30 O paale leŋ choo, a cho nda pɛɛliaa choo,Mɛɛ pee mɛŋma ihɛllo kuuliaa nuaa yɛ.
Wana o wana tofa lɛŋndeŋ pɛ, nyumndaŋ a nyɛpalaa kposoŋ o cho chɔ ni.Nduyɛ nyɛ teŋgaa bɛɛ cho simnɔŋ nyumndaŋ, kanifuule yumbu yumboo cho ndu kumbɔɔ.
Tɛɛsiaalaŋ
^ Tofa Tɛɛsiaa B14.
^ Tofa Tɛɛsiaa B14.
^ Tofa Tɛɛsiaa B14
^ Ɔɔ “Siɔl.” Koŋ cho ni, sɛila waŋnda chieeya kpou. Tofa Tɛɛsiaa.
^ Ɔɔ “Laŋgbaa kalla Chulusalɛm.”
^ Ɔɔ “sandei.”
^ Ɔɔ “kɛɛsiaa, sila.”
^ Ɔɔ “nɛi chɔmaa.”
^ Ɔɔ “lasamtɛi.”
^ Ɔɔ “la kindaa tuaŋ le wuuwo.”
^ Ɔɔ “yalakanaa.”
