Aisaya 51:1-23
51 “La yaŋ ya nilaŋ nya cho sakpoyɛi nuuviaa,Nduyɛ mi la wa Chɛhowa nuuviaa wa.
La tofawɔ o pou nya wa ma kialu nya wo,Vɛlɛ a sooŋ nya wa niŋ ma kala nya wo.
2 La loonuŋndɔ a Ebilaham finya nya okɔɔ,Vɛlɛ a Sela, o velu nya wo.*
Kanifuule ndupilɛ kpe wa ni mi veelu ndu,Nduyɛ mi duau ndu sala, mi tosa mi chuauwaa nduaa kui tau.
3 Chɛhowa cho Saayɔŋ kɔllo dɛɛniaa.
O cho fondaŋnda ndɔla tambu laŋ miŋgi bɛɛndiaa,*Mbo tosa mi lɛŋnde ndɔle polteŋ le simnuŋ maa Idɛŋ,Nduyɛ mbo tosa mi lɛŋnde ndɔle dɛŋgbɛleŋ le wa maa kpele Chɛhowa wo.
Nyaaloo a kɔl kɛndɔɔ cho wa loŋ,Mi balika melaa a chonduŋ kɔl kɛndɔŋ wa loŋ.
4 Wanaa niaa, la yaŋ ya nilaŋ.Kaale nileŋ, la ke ya nila nyala yaŋaalaŋ.
Kanifuule ya o ba sawalaŋ la cho wa fulaa ni,Nduyɛ mi tosa mi sandei wa maa nyɛ teŋgaa le waŋnda.
5 Sakpoyɛi nii sɔɔŋguu kpɛɛluŋ.
Pioŋɔɔ cho ya fula o ba wo cho o nɛi,Nduyɛ I cho waŋnda yamaŋ kilul a bala nilaŋ.
Wanaa cho o lɛŋii mɛŋndaŋ ma balu ve niŋnda cho tiindaŋ o ya niŋ,Okoŋ ma chum le kpaaya nuu.*
6 La heelu wɔ hɔlla choo choo,Nduyɛ mi la tofa o lɛŋndeŋ choo.
Kanifuule, choo choo cho puusiaŋ a buŋgaŋ mɛɛ kumnde wa nuaa yɛ.Lɛŋndeŋ le cho siɔŋ mɛɛ kolaa siɔŋ nuaa yɛ,Mi wanaa cho leniŋ nda vi maa nyaa kisiaa.
Kɛ piŋi nuu cho wa le fɛɛŋ a fɛɛŋ,Nduyɛ fɛɛŋ bɛɛ sakpoyɛi nii feŋaŋ lechoo le.
7 La yaŋ ya nilaŋ nya sina haa sakpoyɛi ya,Nya wanaa nɔ haa sawa* nuu o lakɔl la.
Siooŋii bii nya le mamɔɔ waŋnda chieeya cho nya wo le,Nduyɛ siooŋii bii nya le yioula nda cho nya laŋ te.
8 Kanifuule kaaŋguaa cho nda dio mɛɛ nda dia nuaa kolaa yɛ,Nduyɛ ma tɛɛmbuu nda mɛɛ kaaŋguaa* tɛɛmbuu nuaa kola nda toosiaa a yiiŋii saa wo yɛ.
Kɛ sakpoyɛi nii cho wa le fɛɛŋ a fɛɛŋ,Nduyɛ mi pioŋɔɔ nuu wa le teleŋ o teleŋ.”
9 Oo ba Chɛhowa wo,Tiondu! Tiondu! Chuɛɛnuŋ kpaayaa.
Maa o tosa isɔɔ mɛɛ o tosa ndi o paandoo niŋ yɛ.
O cho num te num aa yimi yimi Luehabi* a buŋgaŋ,Nduyɛ ma chuku visi biyaa o pee mɛŋma ihɛllo niŋ te?
10 Baa o cho num te num oo veesiaa pee mɛŋma ihɛllo, mɛŋma maa yiŋgila yiŋgila bɛndoo waŋ te?
Baa o cho num te num oo toosiaa nɛiyo o pee mɛŋma ihɛl yiŋgilɛi bɛndoo niŋ le mi wanaa ŋ pendu wa taŋ te?
11 Wanaa Chɛhowa baŋa wa cho miiŋgu.
A cho miiŋgu Saayɔŋ a kɔl kɛndɛ bɛndoo,Nduyɛ kɔl kɛndɛ nɔ lamɛɛlu le wo cho simnɔŋ nyɛ chuɛɛnaŋndo le nda.*
Nyaaloo a kɔl kɛndɔɔ cho wa le nda,Nduyɛ mi mɔnɛi a kɔl tambɛiyo kuɛŋnuŋ landaŋ a nda.
12 “Yapila cho nya kɔllo dɛɛniaa ni.
Le yɛɛnɛ mi siooŋnde bii ya le wanachiee cho piɔmndo sɔla wo,Wanachiee cho nyamala mɛɛ billo nyamala nuaa yɛ wo?
13 Le yɛɛnɛ nya puɛɛnuŋ yɛ a Chɛhowa, wana nya Toosiaa,O pɛŋgɛla choo choo nduyɛ mbo kila chiyii chieeŋndo wo?
Lepaa o lepaa la wa a siooŋnde le kɔl tuu wana wa nya nyɛpalaa tusioo choo wo,Naŋ chaa ndu ndoo tiuba ni mbo tɛɛmbuu nya.
Kuɛɛnɛ niko kɔl tuu wana wa nya nyɛpalaa tusioo choo wo cho yɛ?
14 Wana cho o tundaŋ o yɔlɔŋ ndo cho suŋ malɔɔ sɔla.O cho piɔm sɔla mbo kuɛ o sooŋndo niŋ te,Kɛlɛŋgaa niŋ te mbo bumba le nyɛdiaa* sɔlaa.
15 Kɛ ya cho Chɛhowa Mɛlɛka nyaa ni,O tosa mi pee mɛŋma ihɛllo kalaŋiaŋ nduyɛ mbo muuluŋ yokpaŋ yokpaŋ ndo,Diola nilaŋ la cho Chɛhowa, Mɛlɛka puaa chɔuwa ni.
16 I cho num diomnda nilaŋ wou o sondo,Nduyɛ mi kumbu num a wundule ba nuu,Le halikpeŋ mi tɔl choo choo, mi kila chiyii chieeŋndo,Mi dimul Saayɔŋ aa, ‘Nya cho wanaa niaa ni.’
17 Oo Chulusalɛm, Tiondu! Tiondu! Chɔŋ ma sim,Num kol hoo o taala kɔl tuu fula Chɛhowa o ba wo niŋndo.
Num kol hoo o taala mamuɛiyo niŋndo,A lo maŋ kolɔɔ haaa ma chii maŋ o taalaa niŋ fo nduyɛ ma yɔŋnuŋ yiŋgi yiŋgi.
18 Chuauwaa o velu wa kpou, o pilɛ bɛɛ cho loŋ le ndu nɛiyo chɔm te.Nduyɛ a o manda wa bɛɛ kpou, o pilɛ bɛɛ cho loŋ le ndu baa saa le.
19 Sɔɔŋ sala tiɔɔŋ ndoŋ muŋ komal num.
Nɛɛnɛ cho yɛ mɔnɛi biyɔɔ le num?
Tambei a kpundɛ bɛndoo, vɛlɛ a yiaaŋ a muɛi faŋnde.
Nɛɛnɛ cho yɛ num kɔllo dɛɛniaa?
20 Chuauwaa numnda wou kpandeŋ.
A cho ihini o sɔŋgi kɛ kɛ o nɛila bɛndulaŋ choo,Mɛɛ saa cho yondoo niŋndo hau nuaa o yaŋɔɔleŋ yɛ.
Chɛhowa tusi nda kɔl ndɔ tuuwo choo mbo fuuluu nda mɛɛ, mi Mɛlɛka nyaa miŋgi nda o nɛi.”
21 Lelaŋ yandii yaŋ nilaŋ o hei,Num wana lanɔ nyɛpalaa tol hoo choo ma wa yiŋgi yiŋgi, mi che bɛɛ o cho a mamuɛi le.
22 Nyɛ Chɛhowa, Masanɔɔ nyaa, Mɛlɛka nya suŋgu le wanaa nduaa wo dimi wo cho hoo ni:
“Taala tosa mi la yɔŋnuŋ yiŋgi yiŋgi wo, I cho nya ndu poonda o ba,Taala mamuɛiyo, taala kɔl tuu nuu.Fɛɛŋ bɛɛ la kol lɛ ndu le.
23 I cho wanaa wa nya nyɛpalaa tusioo choo wa ndu ke,Wanaa ndaa dimul nya aa, ‘La tunduŋ le miŋ kei nya choo’ wa!
Lelaŋ mi kɔɔla nyalaŋ la simnuŋ maa lelɛŋ,Mi la simnuŋ maa nɛi nda keeku choo wo.”
Tɛɛsiaalaŋ
^ Ɔɔ “o velu nya a nyɛ nɛiyaa pulii vialɛi yo.”
^ Hibuluiye, “kɔllo dɛɛniaa.”
^ Hibuluiye, “ba nuu.”
^ Ɔɔ “nɛi chɔmaa.”
^ Ɔɔ naapum, “dondopolla.”
^ Tofa Tɛɛsiaa.
^ Hibuluiye, “cho nda wa o lebol ni.”
^ Hibuluiye, “beediiyo ɔɔ buloo.”
