Aisaya 52:1-15
52 Oo Saayɔŋ, Tiondu! Tiondu! Chuɛɛnuŋ kpaayaa!
Oo Chulusalɛm chiee diandaa, wounuŋ nyɛla numnda kɛndɛ kɛndɛlaŋ!
Kanifuule, fɛɛŋ bɛɛ wanaa sɔla hivi chiɛi kɔɔli le wa a wanaa dindu le wa luei lɛ o num niŋ te.
2 Oo Chulusalɛm, koŋ chundu cho num lekɔɔ wo ma chɛŋ, okoŋ ma chal.
Oo chua laandoo Saayɔŋ o wa o biyɔɔ niŋndo, tiimbuu yɔlɔŋ ndaa baa num o labolo woŋ.
3 Kanifuule nyɛ Chɛhowa dimi wo cho hoo ni:
“O cho le ikani* le nda pisi nya le.Nduyɛ a cho nya vɛlɛ miŋgi piondɔɔ, kɛ o ve niŋ a ikani le.”
4 Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni:
“O tasela ndɔ, ma kuaŋnuŋ a wanaa niaa Ichipi, ma kɔ wa loŋ maa ŋmial.Okoŋ, mi Asiiliaa tusi nda nyɛpalaa choo o fondo fuuwo choo.”
5 Chɛhowa dimi aa, “Yɛɛnɛ ya tosa yɛ niko nanuŋ?
Kanifuule, ma kuaŋnuŋ a wanaa niaa o fondo fuuwo choo.”
Mi Chɛhowa dimi vɛlɛ aa, “Wanaa wa nda masaleŋ choo wa wa nda kuuliaa choo ma saŋgalaŋ.Nduyɛ lepaa o lepaa, a wa hiouwɔɔ lachi a kiɔɔ bɛɛleŋ chɔmndo le diola nilaŋ.
6 Le sabu koŋ wanaa niaa cho diola nilaŋ sina ni.Kanifuule, a cho sina o paale leŋ choo maa ya cho suɛi ni.
A tonya, ya kpeekpei!”
7 I cho bɔɔ suɛi kɛndɛ bɛndu le chɔɔ peluŋ wana huŋ a yooŋgu kɛndɔɔ o pembuŋ bɛndoŋ choo wo,Wana cho yondaa a kɔl nyuloo okɔɔ wo,Wana dimi yooŋgu kɛndɔɔ a sɔɔŋ kɛndɔŋ okɔɔ wo,Wana cho yondaa a pioŋɔɔ okɔɔ wo,Mbo wa Saayɔŋ dimullo aa: “Mɛlɛka numndo simnuŋ Masaa” wo!
8 Yaŋ nilaŋ! Wanaa num aa mɛŋgɛlaa heelu diomndo choo choo.
A cho deŋioo diompilɛ a nyaale,Kanifuule, a cho ndi chɔ kpendekele* te Chɛhowa huŋ chuuŋgiaa pɛ Saayɔŋ diompilɛ.
9 Nya bembelaŋ Chulusalɛm, la wa wuye wuye nduyɛ mi la deŋi choo choo a nyaale diompilɛ.Kanifuule Chɛhowa dɛɛniaa wanaa nduaa kɔltaŋ, mbo miŋgi Chulusalɛm piondɔɔ.
10 Chɛhowa tosa mi lɛŋnde kpou cha ba ndɔ diandaa.Wanaa cho o lɛŋndeŋ mɛɛlulaŋ nda kpou cho chɔ walta piŋiaala Mɛlɛka naa.*
11 La muliŋ, la muliŋ, la fula loŋ, la pilaŋ nyɛ o nyɛ nɔɔlɛi le!
La fula o fondaŋ koŋ niŋ, la kɛsi nyapila a diandaa,Nya cho kɔlaŋ a nyɛm waliŋ Chɛhowa woŋ nda.
12 La fula niŋ loŋ a isiooŋ te,Kɛlɛŋgaa niŋ te mi la nyaanuŋ.Kanifuule Chɛhowa cho wa kɔlaŋ nya lachi,Nduyɛ Mɛlɛka Isɔluɛiya cho wa nya kɔɔli le nya mandaa.
13 Buɛi nuu cho sɔɔŋ tosaa a sinapɛŋgoo.
O sɔla niŋ foofo sɔvɛ sɔviɔɔ,Mbo sɔla heeloo tema, nduyɛ mbo sɔla bɛɛleŋ.
14 Mɛɛ wanaa bɔɔbɔɔ tofa ndu, mi kɔndɔfillo bii nda.Kanifuule mi hɔlaa nduaa siŋgaŋ mbo hiau wanachiee kɛ kɛ,Nduyɛ mi dialuŋ ndɔŋ kɛndɔŋ bɛɛ siŋgaŋ miŋ hiau wanachiee kɛ kɛ.
15 Lende koni ndu bɛɛ cho tosa ni mi kɔndɔfillo bii lɛŋii bɔɔbɔɔ.
Masaa waa cho sondola ndalaŋ kinda ndu lachi,*Kanifuule a cha niŋ nyɛ nda tuiyɔ a ndu okɔɔ le wo,Nduyɛ ma yiyaŋ a nyɛ nda tuiyɔ a ndu okɔɔ le wo.
Tɛɛsiaalaŋ
^ Ɔɔ “i woli.”
^ Ɔɔ “a lehɔl pɛɛŋ.”
^ Ɔɔ “mɛɛ Mɛlɛka naa yem yɛ.”
^ Ɔɔ “a nɔla lɛ niŋ ma soo le.”
