Aisaya 53:1-12
53 Nɛɛnɛ dɔu yɛ laalaŋndo o nyɛ o tuei naa dimioo wo niŋ?
Nduyɛ nɛɛnɛ Chɛhowa chɔm yɛ ba ndɔɔ?
2 O cho simnɔŋ maa i lɛu ndu* lachi, vɛlɛ maa lepuundu o lɛŋnde vesɛileŋ niŋ.
Wana chi ndu niŋ wana teŋgeŋ, ɔɔ maa wana bɛndu le.Nduyɛ te ŋ che pɛ mɛɛ o cho wa yɛ, o yusa niŋ wana kɔl le ma sɔɔŋguu ndu ikɛi le.
3 Mi waŋnda tul ndu leyɛ, nduyɛ ma fafaŋ ndu.O cho sina nyɛ cho nyɛ nɛiyaa a naa wo.
I wa ko maa lepilɛ bɛɛ ŋ del ndu lehɔl te.*
Miŋ tul ndu leyɛ, nduyɛ miŋ bii ndu biyɔɔ wɔɔŋndo o fondo fuuwo choo.
4 A tonya, mbo soli naala wa naa o ŋdial taŋ,Nduyɛ mbo faŋa naa nyɛ nɛiyaa choo.
Kɛ miŋ cha ndu maa Mɛlɛka lɔɔ ndu, mbo tusi ndu nyɛpalaa choo, nduyɛ mbo saaŋgiaa ndu.
5 Kɛ ma chuku ndu le hakila naalaŋ.Ma tusi ndu nyɛpalaa kala kalaa choo le yɔŋnda naala wɔɔŋndaŋ.
Mbo sɔla nyɛpalaa le halikpeŋ miŋ sɔla kɔl nyuloo,Nduyɛ le boolɔŋnda ndɔlaŋ naŋ sɔla sioŋgɔɔ ni.
6 Naa kpou wa heeloo a tuusoo mɛɛ saa laasiaŋ nuaa yɛ.Wana o wana wa kɔŋndaŋ o nɛi ndɔɔ choo,Nduyɛ mi Chɛhowa handu yɔŋnda naala wɔɔŋndaŋ kpou ndu choo.
7 Ma tusi ndu nyɛpalaa choo nduyɛ mbo chɛl ma saaŋgiaa ndu,Kɛ o dimi nyɛ o nyɛ le.
Ma huŋ a ndu mɛɛ nda huŋ nuaa a saa le diyɔɔ yɛ,Vɛlɛ a mɛɛ nda huŋ nuaa a saa le ndu yiiŋnde kilioo mbo mei doŋ yɛ,Lende koni o mei ni, o dimi nyɛ o nyɛ le.
8 Le mɛɛ nda tusi ndu nyɛpalaa choo nduyɛ ma kilul ndu yamɛi lakafɛi yɛ, ma kua a ndu le ndu diyɔɔ.Nɛɛnɛ buulaŋ yɛ niŋ le sɔɔŋ sinaa kpou a pulale o fula choo leŋ?*
Ma faŋa ndu o lɛŋnde wanaa cho yoomu wa niŋ.Le hakila wanaa niaa o sɔla lɔɔ ni.*
9 Ma ke ndu fondaŋ nda kumbu waŋnda wo* a wanaa dɛnɛ wɔɔŋnda latulu.Kɛ mɛɛ o vi, ma kumbu ndu nda wanaa sulaa* latulu,Mi che bɛɛ ndoo tosa suɛi wɔɔŋ te,Nduyɛ lepilɛ bɛɛ o dimi lachoo le.
10 Kɛ hɛnaŋ Chɛhowa wo wa ni le ma tusi ndu nyɛpalaa kala kalaa choo, nduyɛ mbo chɛl ndu le mbo naa.
Mɛlɛka, te a yɔŋgu pɛ yoomu ndɔɔ maa sala yɔŋ wɔɔŋndo,O cho chuauwaa nduaa* chɔ, mi palɛi nduɛi bandu,Nduyɛ o ndu niŋ hɛnaŋ Chɛhowa wo cho yɔŋnɔŋ ni.
11 Te o keeku pɛ o saŋga bɛndu bɛndoo niŋ, o hini niŋ kɔl a nyɛ o cho chɔ wo.
Sanaa a kɔl kalu ndɔɔ wana cho sakpo wo, o cho buɛi nuu wo,Cho tosa ni mi wanaa bɔɔbɔɔ wa sakpo,Nduyɛ mbo biunuŋ yɔŋnda ndala wɔɔŋndaŋ.
12 Le sabu koŋ, I cho ndu fondaa ke wanaa bɔɔbɔɔ tɛɛŋ,Okoŋ ma piɔuwaŋ nyɛm nda puŋga o chɔuwo woŋ nda wanaa kpaayaa bɛnduaa.Kanifuule mbo yɔŋgu yoomu ndɔɔ haaa mbo sɔla piɔmndo,Nduyɛ ma chɔm ndu o wanaa yɔŋ wɔɔŋnda tɛɛŋ.Mbo kua a hakila wanaa bɔɔbɔɔ,Nduyɛ mbo nyɔɔlu le wanaa yɔŋ wɔɔŋnda.
Tɛɛsiaalaŋ
^ “Ndu” wo hoo sim le wana o wana wa niŋ tofaa ɔɔ le Mɛlɛka.
^ Ɔɔ naapum, “I wa ko maa wana waŋnda faŋa hɔlla choo wo.”
^ Ɔɔ “yoomu ndɔɔ okɔɔ?”
^ Ɔɔ “nda dii ndu ni.”
^ Ɔɔ “Waŋndo cho ndu ke fondaŋ ndɔ nda kumbu waŋnda wo.”
^ Hibuluiye, “wana sulaa.”
^ Hibuluiye, “kulii nduɛi.”
