Aisaya 55:1-13
55 Nya kolɔɔ bii wa kpou, la huŋ le mɛŋndaŋ!
Nya nɔ ikani* le wa, la huŋ piondu nyɛdiaa mi la de!
A tonya, la huŋ piondu muɛiyaŋ a milikiiyaŋ* o cho a ikani le, nduyɛ la luei niŋ bɔnɔ le.
2 Le yɛɛnɛ nya cho yɛ kaniei yɔŋgoo le nyɛ cho nyɛdiaa* le wo?Le yɛɛnɛ nya cho yɛ nyɛ nya sɔlaa* soliŋndo kpeku le nyɛ chuu nya tɔnɔ le wo?
La yaŋ ya nilaŋ nyɛkɛndɛi, mi la de nyɛdiaa kɛndɔɔ,Okoŋ mi la tuei nyɛdiaa sɔvɛ sɔviɔɔ* yeela.
3 La yaŋ nilaŋ mi la hiŋ naa ya chua.
La yaŋ nilaŋ mi la hiou lachi a waa yoomu.Nduyɛ I cho wa o bɛɛndiaŋ le mi yii kpema cho le fɛɛŋ a fɛɛŋ ndo a nya,Okoŋ mbo wa o chɛlaŋ a mɛɛ ya dimul Deeve le ndu kaala lo lechoo wo chɔmndo yɛ. Nduyɛ, diomnde ya mel ndu leŋ le feŋaŋ lechoo le.*
4 Mi siiŋguu ndu seiyo le kaalaŋ,Nduyɛ mi siiŋguu ndu simlachinɔɔ a wana bɛndoo le kaalaŋ.
5 A cho lɛŋnde ŋ sina le leŋ veelu,Nduyɛ mi lɛŋnde sina num te leŋ le nyaanuŋ o numndo.Kanifuule Chɛhowa Mɛlɛka numndo, Wana Diandaa le Isɔluɛi,Cho tosa ma sɔla bɛɛleŋ.
6 Nuuviaa Chɛhowa boondii ŋ nɔla ma saaluŋ ndu ve.
Veelu ndu teleŋ o cho kpɛɛluŋ ndo.
7 Wana dɛnɛ wɔɔŋndo mal nɛila ndɔla wɔɔŋndaŋ,Nduyɛ mi wana yɔŋ wɔɔŋndo mal yiyaŋnda ndɔla wɔɔŋndaŋ.O miiŋgu o Chɛhowa lo, o nɔla mbo tuiinuŋ ndu inyiɛɛ.O miiŋgu o Mɛlɛka naa lo, kanifuule o nɔla mbo mal ndu haki fasɛi.
8 Chɛhowa dimi aa: “Yiyaŋnda nilaŋ la cho maa yiyaŋnda nyalaŋ te,Nduyɛ nɛila nilaŋ la cho maa nɛila nyalaŋ te.”
9 “Mɛɛ choo choo cho filioŋ a lɛŋndeŋ yɛ,Lende nɛila nilaŋ la cho filioŋ a nɛila nyalaŋ ni,Nduyɛ lende yiyaŋnda nilaŋ la cho filioŋ a yiyaŋnda nyalaŋ ni.
10 Te piɔɔ a mɔmndo chɛŋ pɛ o choo choo niŋ,O miiŋgu lende le mɛɛ mbo pɔɔliaa lɛŋndeŋ, mbo tosa mi tɔlɔɔlaŋ la peŋ mi la yɔŋgu kɔmndeŋ,Mi wana wali ichiɔɔ sɔla kulloŋ a nyɛdiaa le dioo.
11 Lende koni diomnda fula ya o sondo laŋ la cho wa ni.
La miiŋgu ya o ibuŋ mi la kɛɛ peelɔŋ te.Kɛ, tosaa la tosa nyɛ ya yeema wo ni.Nduyɛ nyɛ o nyɛ ya vem ndaŋ pɛ le tosaa, tosaa la tosa ndu ni.
12 A cho fula a nyaaloo,Nduyɛ ma miiŋgu o kɔl nyulu niŋ.
Pembuŋ bɛndoŋ a pembuŋ pɔmbɔŋ duaunuŋ niŋ nyaale num lachi, okoŋ miŋ deŋi choo choo a nyaaloo.Nduyɛ, yɔmnde yondoo niŋ kpou cho balaŋ tiɔmɔɔ.
13 Yɔm chunipa wo cho wulɔɔ o fondaŋ bil ŋyɔɔ,Nduyɛ mi yɔm matɔɔ wo vil o fondaŋ bil nyumulɛiyo.
Hei cho tosa mi diola Chɛhowa laŋ la fula tɔɔ,Nduyɛ mi i wa tamasi tembu le fɛɛŋ a fɛɛŋ te wo.”
Tɛɛsiaalaŋ
^ Ɔɔ “i woli.”
^ Ɔɔ “nɔnɔɔ.”
^ Hibuluiye, “beedii ɔɔ bulu.”
^ Ɔɔ “nyɛ sɔlaa nya kelu lalle le sɔlaa wo.”
^ Hibuluiye, “nyɛdiaa machuɛiyo.”
^ Ɔɔ “wana nɔla ma tiindaŋ ndeŋ.”