Aisaya 58:1-14
58 “Veelu choo choo kpeleŋ, mei le!
Heelu diomndo choo choo kpeleŋ mɛɛ nda hɔŋ nuaa buloo yɛ.
Dimul wanaa niaa a nilakalula ndalaŋ okɔɔ,Ma dimul chiɛi Chekɔpu wo a hakila ndalaŋ okɔɔ.
2 Lepaa o lepaa a cho ya nuuviaa,Ma chɔm yeemɛi kpeekpeiye le nɛila nilaŋ sinaa,Naŋ chaa kaale cho sɔɔŋ tosaa o nɛi sakpoo choo leŋ,Le feŋaŋ o sandii Mɛlɛka ndaa choo le leŋ.
A cho ya nyunaa le yamaŋ kiolɔɔ o nɛi sakpoo choo,Nduyɛ ma chɔm yeemɛi le sɔɔŋguuwo Mɛlɛka ikɛi, ma dimi aa:
3 ‘Ŋ cho sumndo biyɔɔ, kɛ le yɛɛnɛ a cho chɔ le?
Tusiŋ naŋ cho o numndo wo, le yɛɛnɛ a cho ndu chɔ le?’
Kanifuule paale nya wa sumndo biyɔɔ leŋ, yeemaŋ nyaŋ* koni nya tual kɔɔli ni,Nduyɛ mi la tusi wanaa tosal nya waltaŋ nda nyɛpalaa choo.
4 O sɛɛŋgiaŋndaŋ a o sɔŋgɔlaŋ niŋ sumnda nya bii laŋ la mɛɛlu ni,Nduyɛ mi la luaa waŋnda a bɔtalaŋ o dɛnɛ wɔɔŋndo choo.
La bii sumndo o nɛi waa nuaa choo, mi la nɔ o kɔl le mi Mɛlɛka tuei piɛile nyaleŋ o choo choo niŋ te.
5 Baa nuaa sum nɛŋi ya kɔllo wo nɔ ni mbo wa?Baa le tusiŋndo koni paale nya bii sumndo leŋ le cho ni,Mi la nɛɛŋguu bolle mɛɛ bil vilɛiyo nɛɛŋguŋ nuaa yɛ,Nduyɛ mi la hini o nyɛla labɛkilaŋ choo vɛlɛ a o pultaŋ niŋ?
Baa la yiyaŋ pa maa mi Chɛhowa hini kɔl a palɛi nya bii hei sumndo ve?
6 Sako! Sum nɛŋi ya kɔllo wo cho hoo ni:
La tiimbuu yɔlɔŋ nya baa waŋnda o dɛnɛ wɔɔŋndo choo woŋ.La faŋa wolɔɔla lusulɛila nya handu waŋnda choo laŋ,Mi la mal wanaa nya cho nyɛpalaa tusioo choo wa,Nduyɛ mi la faŋa wolɔɔla lusulɛila suu o suu nya cho waŋnda handɔɔ choo.
7 La piɔu nyɛdiaa nyaa a wanaa yiaaŋ ma cho nɛiyo wa,Mi la hiŋ a wanaa bala fonduaa vɛlɛ a wanaa nɔ la chiɛi le wa o chiɛila nyalaŋ niŋ.Te la che pɛ wana nɔ nyɛ chuɛɛnaŋ te wo, la ke ndu nyɛ chuɛɛnaŋndo,Nduyɛ la mulul wanayaŋ nyaŋ kɔɔ le.
8 Okoŋ, paŋgele nyaa cho wa diondɔɔ mɛɛ paaleŋ le fula nuaa idii yɛ,Nduyɛ mi la sɔla sioŋgɔɔ chɔ chɔ.
Sakpoyɛi nyɛi cho wa nya kɔlaŋ lachi,Nduyɛ mi naŋɔɔ Chɛhowa wo wa nya kɔɔli le nya mandaa.
9 Okoŋ kɔɔli, la cho veelu mi Chɛhowa muli nya diom.La cho chaŋ o ndu lo le malaa, nduyɛ mbo dimul nya aa, ‘Nuaa ya nanuŋ!’
Te la mal pɛ waŋnda nyɛpalaa tusioo choo,Nduyɛ mi la pɛŋgi waŋnda sooŋ yulɔɔ kɔɔli a diomnda wɔɔŋndaŋ dimioo,
10 Te la ke pɛ wanaa cho a yiaaŋ nda nyɛdiaa nyapila hɛnaŋ ndo,Nduyɛ mi la tosa mi wanaa cho o saŋgaa niŋnda hini kɔl,Koŋ cho tosa mi paŋgele nyaa dendu o yɔŋ bɛɛ o nyumndaŋ niŋ,Nduyɛ mi nyumma nyama kpiŋgbiaŋ ma simnuŋ naŋ chaa paale kalaleŋ ni.
11 Chɛhowa cho nya wa nɛiyo chɔmndo teleŋ o teleŋ,Nduyɛ mbo tosa mi la hini kɔl o yɔŋ bɛɛ aa o lɛŋnde vesɛileŋ niŋ nya cho ni.O cho nya yoomuaŋ luei,*Nduyɛ la cho simnɔŋ mɛɛ kpele nda pɔɔliaa nyɛkɛndɛ kɛndɛ wo wa nuaa yɛ,Mɛɛ sooŋ mɛŋma nduaŋ ma vela le wo cho nuaa yɛ.
12 O sabu nyaa niŋ nda cho fondaŋnda masindɛla tambu laŋ miŋgi bɛɛndiaa ni,Nduyɛ la cho chiiyuŋ wanaa keeku nya lachi wa miŋgi kila.
A cho nya veelu aa wanaa miŋgi kpakila* piɔl taŋ bɛɛndiaa wa,Wanaa miŋgi nɛilaŋ bɛɛndiaa o fondaŋ waŋnda cho ichali wo wa.
13 Te la fafaŋ pɛ* yeemaŋ nyaŋ* tolɔɔ kɔɔli o Paale Pɛŋgiaaleŋ choo, paale nile diandaa leŋ,Nduyɛ mi la chua Paale Pɛŋgiaaleŋ maa paale teŋgeŋndeŋ le cho ni, paale diandaale Chɛhowa leŋ, paale o nɔ mbo sɔla saŋgalaa leŋ,Nduyɛ mi la biilu leŋ mbo hiou yeemaŋ nyaŋ tolɔɔ kɔɔli a sɔɔŋ fondoŋ dimioo,
14 La cho kɔl kɛndɛ bɛndoo saaluŋ o Chɛhowa niŋ,Nduyɛ mi tosa mi la kuɛ o fondaŋnda filioŋnda cho o lɛŋndeŋ choo laŋ.
I cho tosa mi la de nyɛm kɛŋ Chekɔpu finya nya mama woŋ,Kanifuule Chɛhowa dimi lende ni.”
Tɛɛsiaalaŋ
^ Ɔɔ “nyɛ nɛŋi nya kɔllo wo.”
^ Hibuluiye, “paalaŋ kindi.”
^ Hibuluiye, “talta.”
^ Hibuluiye, “muli px peluŋ nyaŋ amakɔɔ.”
^ Ɔɔ “nyɛ nɛŋi nya kɔllo wo.”
