Aisaya 6:1-13
6 O wɔsi Masaa Yusaya vi wo niŋ, mi cha Chɛhowa ichali o kpeŋgbei* ndɔ lemasa filioŋndo choo, nduyɛ mi doma ndɔ vilɛi bɛndu o wounuŋ ndo pia o chiɛi ndɔɔ niŋ cha.
2 Sɛluafiiya wa isisi ndu choo. O kɛ kɛ ndoo nɔ kumbaŋndaŋ la ŋɔmpum. Mi o kɛ kɛ kumbu hɔlaa nduaa a kumbaŋndaŋ la tiɔɔŋ, mbo kumbu vɛlɛ peluŋ ndɔŋ a kumbaŋndaŋ la tiɔɔŋ, nduyɛ mbo wa balɔɔ a la tiɔɔŋ ndaŋ.
3 A wa dimioo choo choo kpeleŋ vellaa velle aa:
“Wana diandaa, wana diandaa, wana diandaa Chɛhowa, Mɛlɛka puaa chɔuwa cho ni.
Naŋɔɔ ndɔ bɛndoo tiu o lɛŋndeŋ choo kpou.”
4 Mɛɛ nda wa deŋi koŋ, mi koŋjiiŋ wa o dioo woŋ hiiluŋ woku woku, nduyɛ mi kumnde pia o chiɛi koŋ niŋ cha.
5 Okoŋ mi dimi aa: “Kpundɔɔ cho le ya!
Sɔŋgɔ wana vilɛi ko ya cho niŋ nuaa ni.Kanifuule wana hakioo ya cho ni, nduyɛ sɔɔŋ nɔɔlɛiyoŋ fula ya o sondo ni.Wanaa ya cho tɛɛŋ nda bɛɛ, sɔɔŋ nɔɔlɛiyoŋ fula nda o sondo ni.I che Masaa, Chɛhowa, Mɛlɛka puaa chɔuwa!”
6 Okoŋ mi sɛluafiiya o pilɛ huŋ naa ya chua. Nduyɛ, dɛŋgulte o chua a kpanyaa o bandu luamaa lasalaa choo leŋ le wa ndu o ba.
7 Mbo pilaŋ ya sondoo, mbo dimi aa:
“Dɛŋgulteŋ ndeŋ le pilaŋ num chɔchɔŋ.
Yɔŋnda wɔɔŋnda numndaŋ la faŋaŋ,Nduyɛ Mɛlɛka mal num haki le hakila numndaŋ.”
8 Okoŋ mi tuɛi Chɛhowa diom. Mbo nyuna aa: “Nɛɛnɛ ya viom yɛ, nduyɛ nɛɛnɛ cho yɛ lakɔ le naa?” Mi muli aa: “A che ya! Viom ya!”
9 Okoŋ mbo dimi aa: “Kɔ ma kɔ dimul waŋnda haa aa:
‘La cho wa yooŋgoo tueiyɔɔ le diiŋ diiŋ,Kɛ la bii niŋ ndu bila le.Mi la wa ndu chɔɔ le diiŋ diiŋ,Kɛ la sɔla niŋ kɔl kalu o kɔl kalu le.’
10 Tosa mi waŋnda haa simnuŋ wanaa bolii kala,Ma simnuŋ wanaa nila kaluaa,Nduyɛ ma kiindiaa nda hɔltaŋ,Le halikpeŋ a tiuba ma che a hɔlta ndalaŋ,Ɔɔ ma tuei a nila ndalaŋ te,Ɔɔ mi kɔlta ndalaŋ la bii sɔɔŋ bila,Le ma mulul sɔɔŋ nda cho tosaa woŋ kɔɔ, okoŋ ma sɔla siŋgioo le.”
11 Okoŋ mi nyuna aa: “Oo Chɛhowa, vɛɛ kpɛ hei cho yɛ viouwɔɔ?” Mbo dimi aa:
“Hei cho lo haaa mi chieeŋ bɛndoŋ tambu, wana o wana cho wa o muŋ niŋ te,Mi chiɛilaŋ la lo fondo wana o wana ve leniŋ te,Nduyɛ mi lɛŋndeŋ le tambu mi le simnuŋ pɔmndo.
12 I cho lo haaa mi Chɛhowa tou waŋnda chieeya ma kuɛ landaŋ,Nduyɛ mi lɛŋndeŋ ndeŋ tambii nduɛi hiou ba a wɔuleŋ.
13 “Kɛ waŋnda Isɔluɛi, wana pilɛ o ŋwaŋ tɔ tɛɛŋ cho wɔ lo loŋ. Nduyɛ a cho vɛlɛ ndu lomɔɔ. Waŋnda Isɔluɛi cho ko maa yɔm bɛndoo a yɔm oki wo. Te a kelu ndu pɛ, chiyii nduɛi lo lɛŋ. Lɛvii* diandɛi cho pioŋɔɔ o chiyii keŋ.”
