Aisaya 60:1-22
60 “Num wana lanɔɔ hoo, chɔŋ ma chɔm paŋgeloo, kanifuule paŋgele numndo hiŋ.
Naŋɔɔ bɛndu Chɛhowa wo cho num diondɔɔ choo.
2 Kanifuule, nyumndaŋ ma cho lɛŋndeŋ kumbɔɔ kpu,Nduyɛ mi nyumma kpiŋgbima bɛnduaŋ ma kumbu kaalaŋ kpou.Kɛ paŋgele Chɛhowa wo cho wa num diondɔɔ choo,Nduyɛ waŋnda cho chɔ naŋɔɔ ndɔ bɛndoo num choo.
3 Lɛŋnde kpou cho lakɔ o paŋgele numndo bɛŋgu,Nduyɛ mi masaa waa kuɛ o naŋɔɔ num bɛndu cho wa diondɔɔ wo bɛŋgu.*
4 Heelu wɔ hɔlla ma mɛɛndiaŋ ba o ba fee!
A chuuŋgiaŋ naapilɛ kpou, ma wa hunɔɔ naa num chua.
Puaa numnda cho chɔnɔŋndo naa levil ma wa hunɔɔ,Nduyɛ ma bii chuauwaa num aa laanduaa o ba ma wa hunɔɔ a nda.
5 A teleŋ koŋ, a cho hei chɔ nduyɛ mi kɔllo naŋ num tau tau.A cho nyaale dɔɔnɔŋ nduyɛ ma hiou ba a kɔl kɛndɔɔ.Kanifuule, sul cho o pee mɛŋma ihɛllo niŋndo cho hunɔɔ naa num chua.Nyɛm kɛŋ cho o lɛŋnde niŋndoŋ kpou cho hunɔɔ naa num chua.
6 Nyɔɔmiaa kunda bɛndoo cho lɛŋnde numndeŋ* kumbɔɔ kpu,Nyɔɔmiaa piaanduaa fɔŋnduaa fulaa Midiaa a Efa.
A cho Siɛba wa bɛɛ kpou, a cho hunɔɔ.A cho hunɔɔ a kooliiyoŋ vɛlɛ a filaŋkiŋsɛŋ.
A cho wa Chɛhowa saŋgalaa choo choo kpeleŋ.
7 Chɔluaa Kidaa kpou cho chuuŋgiaŋ naa num chua.
Saa konduaa Nebayɔti cho wa le num, le ma soliŋ nda kpeku.
I cho chɛlɔɔ ma hiŋ a nda o bandu ni luamaa lasalaa choo,Nduyɛ I cho tosa mi chiɛi ni kɛndɛ kɛndɔɔ chɔɔlu naŋɔɔ.
8 A kuɛɛ cho yɛ haa balɔɔ choo choo maa yumbu yumbu,Mɛɛ piiŋnda wa nuaa balɔɔ o fondaŋ nda lɔlaa yɛ?*
9 O ya niŋ wanaa cho o lɛŋii mɛŋndaŋ ma balu ve niŋnda duau niŋ tiindaŋ ndaa ni.Dɛndɛla mamɛŋndaŋ Taasi la cho wa lachi,*Le hunɔɔ a puaa numnda, chɔnɔŋndo o fondaŋnda leviltaŋ.A cho hunɔɔ a kaniŋ humboŋ vɛlɛ a kooliiyoŋ,Le mi diola Chɛhowa Mɛlɛka numndo, Wana Diandaa le Isɔluɛi la sɔla saŋgalaa,Kanifuule naŋɔɔ ndɔɔ cho num wa choo.
10 Mialla cho hunɔɔ kpakila numndaŋ taŋgul,Nduyɛ masaa ndaa cho wallo tosa le num.Kanifuule mi suaŋ num a kɔl ni tuuwo,Kɛ le mɛɛ ya cho wana ikɛndɛ yɛ, I cho num inyiɛɛ tuiinɔŋ.
11 Diola kpakila numndaŋ la cho wa la kumbiaa teleŋ o teleŋ.Ipala ni, ichɔl ni, la cho wa la kindaa le,Le halikpeŋ ma chuu num sulta cho o lɛŋnde niŋndaŋ,Nduyɛ masaa ndaa cho wa chilaŋ chuaa ni.
12 Lɛŋnde kɛ kɛ ɔɔ masale kɛ kɛ kɛɛ pɛ le wallo tosaa le num, le cho tambei sɔla.Nduyɛ, lɛŋnde kpou cho tambei sɔla kpata kpata.
13 Naŋɔɔ cho Lebanɔŋ ndo cho hunɔɔ naa num chua.A cho hunɔɔ a yɔmii chunipa ve, yɔmii asi ve, latulu a yɔmii saipulɛsi ve,Le chiɛi nuu bɛɛndiaa nyɛkɛndɛi.I cho tosa mi fondaŋ ya kɛsi peloŋ ndo sɔla bɛɛleŋ.
14 Wanaa tusi num nyɛpalaa choo wa, chuauwaa ndaa cho num hunɔɔ wulaŋ beŋ.Wana o wana tusi num siɔmbulaŋ, a cho num hunɔɔ wulaŋ beŋ.Nduyɛ a cho num veelu aa Saayɔŋ, chiee bɛndu Chɛhowa wo,Wana Diandaa le Isɔluɛi.
15 Mi che bɛɛ mi mal num mi waŋnda tul num leyɛ, wana o wana ndoo kei o num niŋ te,Kɛ a koŋ kpou, I cho tosa mi waŋnda kelu yoŋgaa a num le fɛɛŋ a fɛɛŋ,Nduyɛ ma dɔɔnuŋ nyaale le num le fɛɛŋ a fɛɛŋ.
16 O kpeekpei niŋ, a cho milikiima cho o lɛŋnde niŋndaŋ kolɔɔ,Ma wɛi mɛɛma masaa waa.Okoŋ ŋ cho sina ni maa ya Chɛhowa, ya cho Wana num Piŋiaa ni,Nduyɛ maa Wana Kpaaya Bɛndu Chekɔpu Wo cho Wana num Piandaa ni.
17 I cho kooliiyoŋ miŋgi sɔŋgɔ kapaa,Kanii humbuei sɔŋgɔ chiliŋndoŋ,Kapaa sɔŋgɔ yɔmnde,Nduyɛ mi miŋgi chiliŋndoŋ sɔŋgɔ poutaŋ.I cho kɔl nyuloo suei yulɔɔ le mbo wa num chilaŋ,Nduyɛ mi yulu sakpoyɛi iso le num waltaŋ kioo.
18 Fɛɛŋ bɛɛ a tuii lɛ niŋ a sɔŋgɔɔ okɔɔ o lɛŋnde numndeŋ niŋ te,Kɛlɛŋgaa niŋ te ma tuei a dɛnɛ tambɛiyo okɔɔ o pɛŋgula lelɛŋnda numndaŋ.
A cho kpakila numndaŋ veelu aa Pioŋɔɔ, nduyɛ ma veelu diola kpakila numndaŋ aa Saŋgalaa.
19 A heu lɛ niŋ ba a nyɛ teŋgaa paaleŋ le yɔŋgu wo ipala le,Kɛlɛŋgaa niŋ te ma hauba a nyɛ teŋgaa paŋgei yɔŋgu ichɔl lo.Kanifuule Chɛhowa cho simnɔŋ nyɛ teŋgaa le num le fɛɛŋ a fɛɛŋ,Nduyɛ Mɛlɛka numndo cho wa naŋɔɔ num bɛndoo ni.
20 Fɛɛŋ bɛɛ paale numndeŋ le cho lɛ wa delɔɔ le,Kɛlɛŋgaa niŋ te mi paŋgii numnde nyum.Kanifuule Chɛhowa cho simnɔŋ nyɛ teŋgaa le num le fɛɛŋ a fɛɛŋ,Nduyɛ palɛi ŋ bii mɔnɛi ye cho fuuluu o mɛɛlulaŋ.
21 Wanaa numnda kpou cho simnɔŋ wanaa sakpuaa.A cho lɛŋndeŋ sɔla le fɛɛŋ a fɛɛŋ.
Nda cho lɛuvii yɔm ya tɔl le ni,Wali ya tosa a bala nilaŋ, le halikpeŋ mi sɔla saŋgalaa wo.
22 Waŋnda kunda pɔmbɔɔ cho simnɔŋ waapilɛ,Nduyɛ mi kunda taaniŋndo simnɔŋ kaale kpaaya bɛndu.
Ya Chɛhowa pila cho tosa ni mi i yɔŋnuŋ chɔ chɔ a teleŋ i nɔ le yɔŋnɔŋndo wo.”
Tɛɛsiaalaŋ
^ Ɔɔ “nyɛ teŋgaa paale siaa numndo bɛŋgu.”
^ Hibuluiye, “num.”
^ Ɔɔ “o chiɛila ndalaŋ sondoo yɛ?”
^ Ɔɔ “cho la taselaŋ ni.”
