Aisaya 62:1-12
-
Diola sɛnɛila Saayɔŋ ndaŋ (1-12)
62 Le mɛɛ ya kaala Saayɔŋ yɛ, I cho hiouwɔɔ lachi a meiyo le.Nduyɛ le mɛɛ ya kaala Chulusalɛm yɛ, I cho mei kposoŋ te,Haaa mi sakpoyɛi nduɛi dendu mɛɛ paŋgeloo diandu nuaa yɛ,Nduyɛ mi pioŋɔɔ ndɔɔ wa diondɔɔ mɛɛ tɛŋgɔɔ kua nuaa a ŋɔɔ yɛ.
2 “Num wana lanɔɔ hoo, waŋnda o lɛŋndeŋ niŋ kpou cho sakpoyɛi numnde chɔ,Nduyɛ mi masaa kpou che naŋɔɔ numndo.
A cho num veelu a diola sɛnɛilaŋ,La Chɛhowa pila cho num ke laŋ.
3 A cho simnɔŋ mɔsil lemasa kɛndɛ kɛndɔɔ Chɛhowa o ba,Mɔsil lemasa kɛndɛ kɛndɔɔ o ba kɔl Mɛlɛka numndo.
4 Fɛɛŋ bɛɛ a veelu lɛ num aa wana lanɔ nda mal lo le,Nduyɛ fɛɛŋ bɛɛ a veelu lɛ lɛŋnde numndeŋ aa pɔmndo le.
Kɛ a veelu niŋ num aa I Nɔ Yeemɛi o Ndu Niŋ,Okoŋ ma veelu lɛŋnde numndeŋ aa Wana Cho o Nɔɔ Wo.
Kanifuule Chɛhowa nɔ niŋ yeemɛi o num niŋ,Nduyɛ lɛŋnde numndeŋ le wa niŋ maa wana cho o nɔɔ wo.
5 Kanifuule mɛɛ po feleŋgɔnɔɔ chua nuaa yufuaanɔɔ o nɔɔ niŋ yɛ,Lende puaa numnda cho num chua o nɔɔ niŋ ni.
Nduyɛ mɛɛ po chua lanɔɔ wo duaunuŋ nyaale a laa ndɔ yɛ,Lende Mɛlɛka cho nyaale dɔɔnɔŋ a num ni.
6 Num Chulusalɛm, I handu wanaa mɛŋgɛlaa o kpakila numnda choo.
Paaleŋ a nyumndaŋ, a nɔ ma mei kposoŋ te.
Nduyɛ nya cho suɛi a Chɛhowa okɔɔ wa,La pɛŋgi le.
7 La ke Mɛlɛka nyaa fondaa mbo pɛŋgi le, haaa mbo tosa mi Chulusalɛm sim yi.A tonya, haaa mbo tosa mi Chulusalɛm simnuŋ fondaŋ waŋnda saŋgala o lɛŋndeŋ choo wo.
8 Chɛhowa heelu ba ndɔ kɛndɔɔ, ba ndɔ kpaaya bɛndoo, mbo mɛnaŋ po aa:
“Fɛɛŋ bɛɛ I ke lɛ yaamɔɔwaa numnda kuluŋ numndoŋ ma nyɛdiaa le dioo le,Kɛlɛŋgaa niŋ te mi mialla kol muɛima num ma sɛnɛiyaŋ, ma ŋ saŋga le maŋ ndaŋ.
9 Kɛ wanaa cho nyɔɔŋ muŋ diyɔɔ naapilɛ wa cho muŋ dio ni, okoŋ ma saŋgala Chɛhowa.Nduyɛ, wanaa cho maŋ chuuŋgiaa naapilɛ wa cho maŋ kolɔɔ o bɛɛ ni diandaa ni.”
10 La keeku, la keeku o diola kpakilaŋ.
La faaŋiaa waŋnda nyɔɔŋ o nɛi.
La bɛɛndiaa, la bɛɛndiaa nɛi bɛndoo.
La faaŋiaa poutaŋ o nɛi.
La handu tamasioo le waŋnda.
11 Chɛhowa yonda haaa o lɛŋndeŋ mɛɛlulaŋ aa:
“La dimul chua laandoo Saayɔŋ aa,‘Pioŋɔɔ numndo cho hunɔɔ.
Fanda ndɔɔ cho ndu o ba,Nduyɛ paawa* o yɔŋgu wo cho ndu lachi.’”
12 A cho nda veelu aa wanaa diandaa, wanaa Chɛhowa miŋgi piondɔɔ wa,Nduyɛ ma veelu nya aa Chiee Mɛlɛka Wa Nuuviaa Wo, Chiee Cho o Malnaŋ Te Wo.
Tɛɛsiaalaŋ
^ Ɔɔ “sala.”
