Aisaya 63:1-19
63 Nɛɛnɛ cho yɛ hoo fulaa Idɔm mbo wa hunɔɔ,Mbo wa chɔnɔŋndo Bɔsilua a nyɛla siaŋalaŋ ndu lekɔɔ,O doviaŋ o nyɛla kɛndɛ kɛndɛlaŋ niŋ,Mbo wa nɛiyo a kpaaya ndɔ bɛndoo?
“Ya cho wana koŋ ni, wana cho suɛi o nɛi sakpoo choo wo,O nɔ kpaaya bɛndoo le piŋioo wo.”
2 Le yɛɛ nyɛ chuɛɛnaŋ numndo cho yɛ o siaŋa,Nduyɛ mi nyɛla numnda la wa maa nyɛla wanaa nɛi kilepiiyaŋ o doola mamuɛiyo niŋnda?
3 “I nɛi kilepiiyaŋ o doolaa niŋ le muɛiyaŋ toosiaa yapilɛ,
Wana o wana ve a ya latulu le.
Mi hiau lachi a maŋ nɛiyo o kɔl ni tuuwo niŋ,Nduyɛ mi wa maŋ kpaatiaa a tumboo.
Mi kooma ndaŋ ma fasaŋiaŋ o nyɛla nilaŋ,Okoŋ mi ma mɛli sɔŋndaŋ o nyɛla nila chuɛɛnaŋndaŋ kpou.
4 Kanifuule paale miŋgiaa maa leŋ le cho ya o kɔl,Nduyɛ wɔsi ya cho wanaa niaa miŋgi piondɔɔ wo fuuluu.
5 Mi mɛɛndaŋ le wana malaa, kɛ wana bɛɛ I sɔla le.Mi kɔndɔfillo bii ya le mɛɛ wana o wana yɔŋguŋ le ya toolu le yɛ.
Le hei, mi ba nuu chuu ya pioŋɔɔ,*Nduyɛ mi kɔl ni tuuwo toolu ya.
6 Mi niɔu niɔu waŋnda o kɔl ni tuuwo niŋ.Mi tosa ma yɔŋnuŋ yiŋgi yiŋgi a kɔl ni tuuwo,Nduyɛ mi tala kooma ndaŋ lɛŋ.”
7 I cho isɔɔ a sɔɔŋ kaala lo lechoo Chɛhowa tosa woŋ okɔɔ,Walta chuu Chɛhowa saŋgalaa laŋ,Le sɔɔŋ Chɛhowa tosal naa woŋ kpou,Sɔɔŋ kɛndɛŋ bɔɔbɔɔ o tosa le yuŋgu Isɔluɛi yo woŋ.Nduyɛ, nyiɛɛyii nduɛi a kaala lo lechoo bɛndu o nɔ wo nyindu ndu ni le sɔɔŋ muŋ tosaa.
8 Kanifuule o dimi aa: “Wanaa niaa nda cho ni. Chuauwaa cho ya lo lechoo wo chɔm nda nda cho ni!”
Le hei, mbo simnuŋ wana nda piŋiaa.
9 Nyɛkindilaa kɛ kɛ wa nda choo, ndu bɛɛ o wa ndu kindilaa.
Nduyɛ wana ndɔ viamaa* piŋi nda ni.
Le mɛɛ o nɔ kaalaa a nyiɛɛye yɛ, mbo miŋgi nda piondɔɔ.Nduyɛ o wɔsila hiou laŋ niŋ kpou, mbo heelu nda tema, mbo wa kɔlaŋ a nda.
10 Kɛ ma tosa nilakalulaŋ, okoŋ ma simul nyina diandaa Mɛlɛkaa.
Le hei, mbo simnuŋ yaamɔɔnɔ ndaa,Mbo chiŋalaŋ nda a sɔŋgɔɔ.
11 Ma loonuŋ a palɛi paanduei okɔɔ,Palɛi Muuse buɛi ndɔ ve, ma wa nyunaa aa:
“Kuɛɛnɛ wana soli nda o pee mɛŋma ihɛllo niŋ a wanaa manda saa nduaa wa cho yɛ?
Kuɛɛnɛ wana ke ndu nyina ndɔ diandaa wo cho yɛ?
12 Kuɛɛnɛ wana tosa mi ba ndɔ kpaaya bɛndoo kua a ba kɛndɛ Muuse wo latulu wo cho yɛ?Kuɛɛnɛ wana piɔu mɛŋndaŋ tɛɛŋ nda lachi,Le mbo sɔla diolaŋ le fɛɛŋ a fɛɛŋ ndo cho yɛ?
13 Kuɛɛnɛ wana tosa ma keeku o mɛŋma kalaŋiaŋ ndaŋ* tɛɛŋ,Ma hiau mɛɛ soo baluŋ nuaa o pollo niŋ,Okoŋ a boŋ te wo cho yɛ?
14 Mi nyina Chɛhowa wo tosa ma pɛŋgi,Mɛɛ chɔluaa tual nuaa o lɛŋnde dɛŋgbɛleŋ niŋ yɛ.”
Lende ŋ kuɛ a wanaa numnda ni,Le mi diola numndaŋ la fula tɔɔ.*
15 Lo o choo choo niŋ,Naa ŋ cho o fondaŋ num diandaa lebɛɛ bɛndoo* wa ma tofa lɛŋ.
Kuɛɛnɛ sɛmbɛ numndo a kpaaya numndo cho yɛ?Nduyɛ, kuɛɛnɛ kaala yiŋgoloŋ numndo a nyiɛɛyii numnde cho yɛ?
Kanifuule, a tuŋ naa nyɔɔŋ muŋ.
16 Num cho Finya naa ni.Mi che bɛɛ Ebilaham sina naa le,Nduyɛ Isɔluɛi bɛɛ sina naa le,Kɛ num Chɛhowa, num cho Finya naa ni.
Kani masindɛ, num cho Wana Piandu naa wo ni.
17 Oo Chɛhowa, le yɛɛnɛ ŋ chɛllɛ* miŋ mal nɛila numndaŋ, miŋ wa heeloo a tuusoo?
Le yɛɛnɛ ŋ chɛllɛ* miŋ luɛi bolle kalaleŋ, ŋ nɔ lɛ isiooŋ le num te?
Yandii mulul naa hɔlla le sabu buɛiyaa numnda,Kanifuule nda cho kaale nyɛm kɛŋ numndoŋ ni.
18 Le teleŋ biŋgi koni wanaa num aa diandaa chal o lɛŋnde leŋ niŋ ni.
Okoŋ, mi yaamɔɔwaa naa huŋ tɛɛmbuu chiɛi numndo.
19 Le teleŋ vilɛi niŋ, ŋ simnuŋ niŋ maa wanaa ŋ ve masa choo kposoŋ te wa,Maa wanaa diola numnda ve choo kposoŋ te wa.
Tɛɛsiaalaŋ
^ Ɔɔ “tosa mi yam.”
^ Ɔɔ “maalikɛinɔ cho ndu ikɛi kpɛɛluŋ ndo.”
^ Ɔɔ “mɛŋma yiŋgilɛiyaŋ.”
^ Ɔɔ “la naŋ.”
^ Ɔɔ “kɛndɛ kɛndɔɔ.”
^ Ɔɔ “ŋ tosa yɛ.”
^ Ɔɔ “ŋ tosa yɛ.”
