Aisaya 64:1-12
64 Te num oo tɛnda pɛ choo choo ma tol lɛŋ nanuŋ,Nduyɛ mi pembuŋ bɛndoŋ muŋ hiiluŋ num lachi,
2 Mi num oo tol mɛɛ yiŋndeŋ le sandu nuaa o nyaandaŋ niŋ,Mi le tosa mi mɛŋndaŋ ma ŋol lɛ,Keŋ wa tosa mi yaamɔɔwaa numnda ndaa sina diola numndaŋ,Nduyɛ mi wanaa cho o lɛŋnde niŋnda ndaa nyiiya num lachi!
3 Mɛɛ ŋ wa sɔɔŋ kɔndɔfilloŋ tosaa ŋ naŋ ve bɛɛ kɔl te woŋ,Ma tual, nduyɛ mi pembuŋ bɛndoŋ nyiiya num lachi.
4 Chɔŋ o sindɔɔ niŋ, wana o wana yeŋ lani ɔɔ mbo tuei suɛi waa nuaa le,Kɛlɛŋgaa niŋ te mi wana o wana che Mɛlɛka cheleŋ o num kɔɔli.Num tosa sɔɔŋ le wanaa hiau lachi a tiindaŋndo dɔwɔɔ o num niŋnda* ni.
5 Ma sɔɔŋguu le waa latulu a wanaa tosa sɔɔŋ o nɛi sakpoo choo a kɔl kɛndɛ wa,Wanaa loonuŋ a num okɔɔ nduyɛ ma tol nɛila numndaŋ kɔɔli wa.
Ma tambu kɔl a naa mɛɛ naŋ wa hiouwɔɔ lachi a hakioo tosaa.Ŋ wa hei tosaa le teleŋ vilɛi.
Baa tiindaŋ cho pa le miŋ sɔla pioŋɔɔ?
6 Naa kpou, ŋ simnuŋ maa wana nɔɔlɛi.Nduyɛ sɔɔŋ sakpo naŋ tosa niŋndoŋ kpou, ŋ simnuŋ maa kola wana lanɔ wa o teleŋ ndɔɔ niŋndo.
Naa kpou, ŋ cho vesa maa lepee,Nduyɛ mi yɔŋnda naala wɔɔŋndaŋ la kuɛ a naa mɛɛ hueiye kuaŋnuŋ nuaa a nyɔɔ yɛ.
7 Wana pilɛ bɛɛ cho lɛ diola numndaŋ veelu le.Wana o wana cho lɛ kindiŋ le mala numndo nuuviaa le.Kanifuule, a viŋ naa hɔlaa numnda kpiŋ,Nduyɛ ma tosa miŋ wa nyauwo* isisi le* yɔŋnda naala wɔɔŋndaŋ.
8 Kɛ num Chɛhowa, num cho Finya naa ni.
Puulu chuauwaa ŋkpɛɛnɔɔ naŋ cho ni, nduyɛ num cho Wana Chuau naa Wo ni.Naa kpou, num toosiaa naa a bala numndaŋ ni.
9 Oo Chɛhowa, hiu kɔllo tuulu a naa le,Nduyɛ loonuŋ a yɔŋnda naala wɔɔŋndaŋ le fɛɛŋ a fɛɛŋ te.
Yandii loonuŋ maa naa kpou, wanaa numnda naŋ cho ni.
10 Chieeŋ bɛnduŋ num diandaŋ simnuŋ lɛŋnde polteŋ.
Saayɔŋ bɛɛ simnuŋ lɛŋnde polteŋ,Nduyɛ mi Chulusalɛm simnuŋ pɔmndo.
11 Chiɛi naa diandaa tɔɔma* bɛndoo,Naa finyaa naa mamaa ndaa saŋgala num nda,O cho niŋ o ŋualɛi chilikɔ a yiŋndeŋ.Nduyɛ, nyɛm naŋ sɔvɛ sɔviɔŋ kpou cho ŋ tambɛiyoŋ.
12 Oo Chɛhowa, baa a cho pa hiouwɔɔ lachi a chalnɔŋndo a tosa isɔɔ le naa malaa?
Baa a cho lo meiyo nduyɛ ma mal naa o nyɛpalaa kala kalaa hoo niŋ?
Tɛɛsiaalaŋ
^ Ɔɔ “wanaa biunuŋ num chumndo wa.”
^ Hibuluiye, “teŋgaa.”
^ Hibuluiye, “a bala.”
^ Ɔɔ “kɛndɛ kɛndɛ.”
