Aisaya 65:1-25
65 “Mi chɛl le waa latulu a wanaa ndaa nyuna le ya le wa.Mi chɛl le mi wanaa ve ya nuuviaa le wa saaluŋ ya.
Mi dimul wanaa ve diola nilaŋ veelu le wa aa, ‘La nuaa ya nanuŋ, la nuaa ya nanuŋ!’
2 Lepaa o lepaa, bala nilaŋ la wa la kumbiaa le wanaa bolii kalaa,A wa kɔlaŋ o nɛi wɔɔŋndo choo,Ma tual yiyaŋnda ndalaŋ kɔɔli wa.
3 Mi waŋnda haa ndaa tosa sɔɔŋ muŋ tɛɛmbuu ya kɔllo woŋ teleŋ o teleŋ,Ma soli salala ndalaŋ o kpelela ndalaŋ niŋ a salala ikumndaŋ o kpilikioŋ choo.
4 Ma chal o sɛilaŋ tɛɛŋ,Nduyɛ ma hivi nyumndaŋ o fondaŋnda sɔɔsɔɔ laŋ,*Ma dia visiŋ peuwoŋ.Nduyɛ, mbooya visiŋ nɔɔlɛiyoŋ cho o nyɛm ndaŋ laandoŋ niŋ.
5 Ma dimi aa, ‘Chal a ba num. Sɔɔŋguu ya ikɛi le.Kanifuule, I cho o diandaa mi hiau num.’*
Kumnde nyɔɔŋ muŋ cho ya o miliŋ ni, nduyɛ miŋ tosa mi tuulu kɔl mɛɛ yiŋndeŋ le niilu nuaa sandei yɛ.
6 I cho niŋ i poonyiaa ya lachi.I cho hiouwɔɔ lachi a meiyo le.Kɛ I cho nda miŋgi paawa,*I cho nda miŋgi paawa mɛɛ nda nɔ le sɔlaa yɛ,
7 Le yɔŋnda ndala wɔɔŋndaŋ, vɛlɛ a yɔŋnda wɔɔŋnda finyaa ndaa mamaa.” Chɛhowa dimi lende ni.
“Kanifuule a wa salala ikumndaŋ solioo o pembuŋ bɛndoŋ choo,Nduyɛ ma tɛɛmbuu ya tɔɔ o pembuŋ pɔmbɔŋ choo.Lelaŋ, I cho fɛlɛŋ paawa nda nɔ le sɔlaa wo tuu nyɛkɛndɛ kɛndɛ.”
8 Nyɛ Chɛhowa dimi wo cho hoo ni:
“Mɛɛ kilepiima nda toosiaa muɛima sɛnɛiyaŋ ndaŋ ma wa nuaa kpɔŋjɔɔ,Nduyɛ mi waŋndo dimi aa, ‘Tɛɛmbuu maŋ te, kanifuule ma kɛndiaŋ ma* cho leniŋ’ yɛ,
Lende ya cho tosa ni le sabu buɛiyaa niaa.I cho nda tɛɛmbuu kpou le.
9 I cho chuauwa* soli o Chekɔpu niŋ,Nduyɛ mi hɛli waŋndo o Chuda niŋ le mi pembuŋ niŋ bɛndoŋ wa nyɛm kɛŋ ndɔŋ.Wanaa ya hɛli wa cho nɔ lɛŋndeŋ ni,Nduyɛ buɛiyaa niaa cho wa ichali loŋ ni.
10 Sialɔŋ cho simnɔŋ fondaŋ saa dia wo,Nduyɛ mi Kpoloŋndo* Akɔɔ simnuŋ fondaŋ nauwa pɛŋgi wo.Hei cho yɔŋnɔŋ le wanaa niaa, a nuuviaa ya wa.
11 Kɛ nya bɛɛ cho o wanaa kɛɛ Chɛhowa wa tɛɛŋ.Wanaa cho pembii nii diandɛi puɛɛnɔŋndo wa,A cho tibiiyo kɛsioo le mɛlɛka Dɛnɛ Kɛndɔɔ wa,Vɛlɛ a wanaa pei muɛima muuliaŋ ndaŋ o taalalaŋ niŋ le mɛlɛka Kɛɛsiaa Chilaŋ Ndo wa.
12 Lelaŋ, I cho tosa ma diu diu nya a muɛi faŋnde,Nduyɛ nya kpou mi la baŋ wulaŋ ma kelu nya bololaŋ.Kanifuule mi veelu nya, kɛ la muli le.Mi suaa o nya lo, kɛ la yeŋ lani le.Mi la hiau lachi a nyɛ bɛnda ya o hɔl te wo tosaa,Nduyɛ mi la hɛli le tosaa nyɛ tɛɛmbuu ya kɔllo wo.”
13 Le hei, nyɛ Chɛhowa, Mɛlɛka Kpuluŋguma Bɛndoo dimi wo cho hoo ni:
“Buɛiyaa niaa cho wa nyɛdiaa dioo kɛ mi nya wa a yiaaŋ.
Buɛiyaa niaa cho wa kolɔɔ, kɛ mi nya wa a bolola vesɛilaŋ.
Buɛiyaa niaa cho wa nyaaloo, kɛ mi nya wa saŋgaa a siɔmbulaŋ.
14 Buɛiyaa niaa cho wa deŋioo a nyaaloo le mɛɛ sɔɔŋ kɛndɔŋ cho wa nda ŋ piaa o lakɔl cha yɛ.Kɛ nya cho wa chaŋndo le mɛɛ nyɛ nɛiyaa cho wa nya o lakɔl lɛ,Nduyɛ la cho wa chaŋndo le mɛɛ kɔltaŋ la cho o saŋgaa niŋ yɛ.
15 Wanaa niaa ya cho hɛli wa cho wa diola nilaŋ soliŋndo kpeku le sendioo wouwo.Nduyɛ Chɛhowa, Mɛlɛka Kpuluŋguma Bɛndoo cho tosa mi la sɔla piɔmndo a pilɛŋ pilɛŋnda.Kɛ buɛiyaa nduaa nda, o cho nda diola cheleŋ ke.
16 Okoŋ, wana o wana kindiŋ pɛ le salaa sɔlaa o lɛŋndeŋ choo,Mɛlɛka tonyaa* cho ndu salaa dɔwɔɔ.Nduyɛ wana o wana wa pɛ buŋgɛi chuaa mbo mɛnaŋ o lɛŋndeŋ choo,O cho mɛnaŋ o Mɛlɛka tonyaa* lo.
Kanifuule, a cho lɛ loonɔŋ a sɔɔŋ palaŋ* yɔŋnuŋ nda o paandoo niŋndoŋ te.I cho muŋ faŋa ya o hɔl bau.
17 Kanifuule, I cho choo choo sɛnɛiyo a chieeŋ sɛnɛiyo toosiaa.Nduyɛ wana o wana yiyaŋ* ndɛ niŋ a sɔɔŋ paandoŋ okɔɔ le,Kɛlɛŋgaa niŋ te miŋ hiŋ wana o kɔl.
18 Lelaŋ la wa a kɔl kɛndɛ, mi la dɔɔnuŋ nyaale le fɛɛŋ a fɛɛŋ le nyɛ ya cho toosiaa wo.
Kanifuule, I cho Chulusalɛm toosiaa le mbo wa fondaŋ kɔl kɛndɛ bɛndoo,Nduyɛ mi wanaa nduaa wa a nyaale.
19 I duaunuŋ niŋ nyaale le Chulusalɛm, nduyɛ mi wa a kɔl kɛndɛ le wanaa niaa.Fɛɛŋ bɛɛ wana tuii lɛ niŋ chaŋndaŋ o Chulusalɛm niŋ te, kɛlɛŋgaa niŋ te mi wana tuei chaŋnda nyɛpalaa.”
20 “Chɛlɛkpɛ o chɛlɛkpɛ ve lɛ niŋ loŋ mbo vi o palɛi biŋgi bɛŋgu le,Kɛlɛŋgaa niŋ te mi kaasoŋnɔɔ vi o chii palɛi nduɛi le.
Kanifuule wana o wana nɔ pɛ wɔsilaŋ kɛmɛ mbo vi, waŋnda cho ndu chua maa chɛlɛkpɔɔ o cho ni.Nduyɛ sendioo cho wa wana yɔŋ wɔɔŋndo choo, o yɔŋ bɛɛ mbo chii wɔsilaŋ kɛmɛ.*
21 A cho chiɛilaŋ taŋgul ma waŋnuŋ leniŋ,Nduyɛ ma tosa kpelela makilepiilaŋ, ma de kɔmnde ndɔleŋ.
22 A teŋgul niŋ chiɛilaŋ mi wana cheleŋ wa leniŋ te,Kɛlɛŋgaa niŋ te ma tɔl kpelelaŋ mi wanaa cheleŋ de.
Kanifuule wanaa niaa cho viouwɔɔ yoomu mɛɛ yɔmndo viau nuaa isisi yɛ,Nduyɛ wanaa niaa ya hɛli wa cho walta nda tosa a bala ndalaŋ ndaŋ tueiyɔɔ yeela nyɛkɛndɛi.
23 A tosa niŋ wali kala kalaa o fondo fuuwo choo le,Nduyɛ a vilu lɛ niŋ chuauwa mi dɛnɛ palaa komal nda le.Kanifuule wanaa Chɛhowa dɔu salaa wa, chuauwaa ndaa* nda wa niŋ ni,A wanaa fula o pulale ndaleŋ choo wa latulu.
24 Tuupa bɛɛ ma veelu ya, I cho nda mulul.Nduyɛ a cho lo suɛi, mi tuei nda diom.
25 Tiwollo a saa fɔŋndɔɔ cho wa nyɛdiaa dioo naapilɛ,Mi kpɔkuŋndo* de billo mɛɛ nau towaa dia ndu nuaa yɛ.Nduyɛ puuloo cho wa nyɛdiaa le kɛuwo ni.
A mel niŋ kpundɛ o kpundɛ le, kɛlɛŋgaa niŋ te ma tɛɛmbuu nyɛ o nyɛ o pembii nii diandɛi choo.” Chɛhowa dimi lende ni.
Tɛɛsiaalaŋ
^ Ɔɔ naapum, “o yɛkpɛlaŋ bɛŋgu.”
^ Ɔɔ naapum, “I cho num diondɔɔyɛi nii tɛɛŋguu.”
^ Ɔɔ “sala.”
^ Hibuluiye, “salaa.”
^ Hibuluiye, “kulle.”
^ Ɔɔ “Lɛŋnde Dɛŋgbɛleŋ.”
^ Ɔɔ “lo o lediom ndo.” Hibuluiye, “Amiina.”
^ Ɔɔ “lo o lediom ndo.” Hibuluiye, “Amiina.”
^ Ɔɔ “kpundɛla.”
^ Ɔɔ “loonuŋ.”
^ Ɔɔ naapum, “te waŋndo nɔ pɛ wɔsilaŋ kɛmɛ mbo vi, waŋnda cho ndu chua maa sendioo cho ndu choo ni.”
^ Hibuluiye, “kulii ndɛi.”
^ Ɔɔ “yalakanaa.”
