Aisaya 66:1-24
66 Nyɛ Chɛhowa dimi wo cho hoo ni:
“Choo choo cho kpeŋgbei* ni lemasaa ni, nduyɛ lɛŋndeŋ le cho naa niaa kɛsiaa ŋpeluaa ni.
Ɔɔ niko chiɛi nya nɔla mi la teŋgul la wo?Kuɛɛ fondaŋ ni pɛŋgiaa cho yɛ?”
2 Chɛhowa dimi aa: “Bala nilaŋ la toosiaa nyɔɔŋ muŋ kpou ni.Nduyɛ ya tosa ni mi muŋ kpou wa mɛɛ ŋ cho yɛ.
Wanaa tusiaŋnda ya cho hɔlla mulul ni,A cho a kɔlta tambɛilaŋ nduyɛ ma nɔ siooŋnde* le nyɛ ya dimi wo wa.
3 Wana cho nau towaa diyɔɔ wo, o cho ko maa wana cho waŋndo nyɛpalaa tusioo choo wo.
Wana cho saa salaa solioo wo cho ko maa wana cho tuŋndo kɛsei yomɔɔ wo.
Wana cho kioo yɔŋgoo wo cho ko maa wana cho kooma peuwaŋ salaa solioo wo.
Wana cho sala loonaŋndo yɔŋgoo a filaŋkiŋsɛŋ ndo cho ko maa wana saŋgala mɛlɛkaa lachoowaa wo.*
Ma kɛɛsiaa le kɔlaŋ o nɛila ndalaŋ choo,Nduyɛ ma nɔ yeemɛi o sɔɔŋ nɔɔlɛiyoŋ niŋ.”
4 I cho hɛli nɛila ya cho nda nyɛpalaa tusi choo laŋ.Nduyɛ sɔɔŋ nda nɔ siooŋnde le muŋ ndoŋ, muŋ kpeekpei ya cho nda tusi choo ni.
Kanifuule mɛɛ ya veelu, wana o wana muli ya diom te.Mɛɛ ya soo, wana o wana yeŋ ya lani le.
Ma hiau lachi a nyɛ bɛnda ya o hɔl te wo tosaa,Nduyɛ ma hɛli le tosaa nyɛ tɛɛmbuu ya kɔllo wo.
5 La tueiyɔ nyɛ Chɛhowa dimi wo, nya nɔ siooŋnde* le nyɛ o dimi wo wa:
“Wanayaŋ nyaŋ tul nya leyɛ, nduyɛ ma kɛɛ nya le diola nilaŋ nda cho dimioo o nɛi mamaa niŋ aa, ‘Maa Chɛhowa sɔla saŋgalaa fɔ!’
Kɛ Mɛlɛka cho vɛlɛ hunɔɔ mbo chuu nya kɔl kɛndɔɔ,Nduyɛ nda cho wanaa siɔmbulaŋ la cho biyɔɔ wa ni.”
6 Wooluŋ wooluŋndo cho fulaa o chiee bɛndoo niŋ, mi sɔɔlɛmɛiyo wa chɔnɔŋndo o chiɛi Mɛlɛkaa!
Chɛhowa cho yaamɔɔwaa nduaa paawa* nda nɔ le sɔlaa wo kioo ni.
7 Tuupa mi pulii vialɛi nɛi ndu, mbo vialu.
Nduyɛ tuupa mi pulii vialɛi kandu ndu nɛiyo, ndoo chii niŋ wana pɔnɔɔ violɔɔ.
8 Nɛɛnɛ tuei yɛ niŋ suɛi waa nuaa?
Nɛɛnɛ che yɛ niŋ suɛi waa nuaa?
Baa lɛŋndeŋ le nɔla pa mi le veluŋ o paaleŋ lepilɛ niŋ kpe?
Ɔɔ waŋnda o kaaleŋ niŋ kpou nɔla pa ma veluŋ o lepilɛ niŋ kpe?
Kɛ a koŋ kpou, dimioo nuaa mi pulii vialɛi kandu Saayɔŋ nɛiyo, mbo vialu puaa nduaa.
9 Chɛhowa Mɛlɛka nyaa dimi aa: “Baa I nɔla pa mi tosa mi boondei fuuluu le mi chɛlɛkpɔɔ veluŋ nduyɛ mi kuuna ndu violɔŋndo?
Ɔɔ I nɔla pa mi tosa mi chɛlɛkpɔɔ wa violɔŋndo mi kinda dembe ndɔ vialaa?” Mɛlɛka nyaa dimi lende ni.
10 Nya kaala Chulusalɛm nda kpou, la wa a kɔl kɛndɛ a ndu, nduyɛ mi la dɔɔnuŋ nyaale a ndu latulu.
Nya cho mɔnɛi biyɔɔ le Chulusalɛm nda kpou, la dɔɔnuŋ nyaale tau tau a ndu latulu.
11 La cho mɛɛma ndɔma kɔl dɛɛniaŋ wuɛi mi la hini kɔl.La cho mɛɛma nduaŋ wuɛi nduyɛ mi la wa a nyaale o naŋɔɔ ndɔ bɛndoo niŋ.
12 Kanifuule, nyɛ Chɛhowa dimi wo cho hoo ni:
“I cho ndu kɔl nyuloo kioo mɛɛ mɛŋndaŋ ma hiau nuaa o pee bɛndoo yɛ.Nduyɛ mi wa ndu naŋɔɔ cho o lɛŋnde niŋndo kioo mɛɛ ballo hiau nuaa yɛ.
La cho wuɛi nduyɛ ma kuɛ a nya o laba,Okoŋ ma yiiliaa nya o wulaŋ choo.
13 Mɛɛ kala chuaa dɛɛniaa nuaa po ndɔɔ yɛ,Lende ya cho nya wa nyɔɔloo ni.Sɔɔŋ kɛndɛŋ cho yɔŋnɔŋ Chulusalɛm ndoŋ cho nya kɔllo dɛɛniaa.
14 La cho hei chɔ pɛɛŋ mi la dɔɔnuŋ nyaale.Yoomu nyaa cho wa o piaa cha maa bil puiyaa.
Nduyɛ buɛiyaa Chɛhowa wa cho kpaaya ndɔɔ sina,Kɛ mbo pɛɛsa yaamɔɔwaa nduaa.”
15 “Kanifuule Chɛhowa cho hunɔɔ maa leyiŋ,Nduyɛ nyɛm ndɔŋ nyaanaŋ suaa naŋndoŋ cho ko mɛɛ hueiyii fuku fukuei wa nuaa yɛ,Le mbo miŋgi maa a kɔl tuu bɛndoo,Nduyɛ mbo tusi waŋnda nyɛpalaa choo a yiŋnde wule wule leŋ.
16 A yiŋndeŋ Chɛhowa cho waŋnda yamɛi kilul ni.A tonya, muɛi nduɛi faŋnde cho wana o wana chiŋalaŋ.Nduyɛ wanaa Chɛhowa cho diyɔɔ wa, a wa niŋ tau tau.
17 Chɛhowa dimi aa: “Wanaa cho bɛɛndiaŋndo ma wa ndapila dindioo nduyɛ ma tual wana cho tɛɛŋ ndo kɔɔli le luɛiyɔɔ o kpelelaŋ* niŋnda, wanaa cho visiŋ peuwoŋ, nyɛm nɔɔlɛi suu o suu vɛlɛ a bɛlla dioo wa, nda kpou cho fuuluu o mɛɛlulaŋ diompilɛ.
18 Mɛɛ ya sina niŋ walta ndalaŋ a yiyaŋnda ndalaŋ yɛ, I cho hunɔɔ waŋnda o lɛŋnde niŋ kpou a sɔɔŋ maŋgalaŋ suu o suu chuuŋgiaa, okoŋ ma huŋ chɔ naŋɔɔ ni bɛndoo.”
19 “I cho tamasioo kɛsi nda tɛɛŋ, mi yɔŋ a hɛluŋ nda a tiŋ o lɛŋnde niŋ. I cho nda yɔŋ Taasi, Pul, a Ludi o wanaa chaa chiɔuwo soliŋndo kpeku wa lo. Nduyɛ mi yɔŋ nda Tubaa, Chavaŋ, a o fondaŋnda leviltaŋ o lɛŋii mɛŋndaŋ ma balu ve niŋ, o wanaa tuiyɔ konaa a ya okɔɔ ɔɔ ma cha naŋɔɔ nuu le wa lo. Okoŋ, ma yonda a naŋɔɔ nuu okɔɔ o lɛŋnde niŋ.
20 A cho fula a wanayaŋ nyaŋ o lɛŋnde niŋ kpou ma hiŋ naa Chɛhowa chua maa ke. A cho hunɔɔ a nda o suaa choo, o nyɛm nyaanaŋ suaa naŋndoŋ niŋ, o nyɛla viliaa lawolɔɔla cho la kumbaa kpu laŋ niŋ, o chɔluaa yɛyii muuliaŋnda choo, a o nyɔɔmiaa kua chɔ chɔ wa choo, haaa o pembii nii diandɛi choo Chulusalɛm, mɛɛ waŋnda Isɔluɛi huŋ nuaa a kela ndalaŋ o nyɛm ndaŋ diandaŋ niŋ o chiɛi Chɛhowa wo niŋ yɛ.” Chɛhowa dimi lende ni.
21 Chɛhowa dimi aa: “I cho vɛlɛ a tiŋ chua le ma wa wanaa soliaa lasalaa vɛlɛ a Livaiya.”
22 Chɛhowa dimi aa: “Mɛɛ choo choo sɛnɛi a chieeŋ sɛnɛi ya cho toosiaa wo cho wa ya o hɔl le fɛɛŋ a fɛɛŋ yɛ, lende chuauwaa numnda* a diola numndaŋ la cho wa ya o hɔl le fɛɛŋ a fɛɛŋ ni.”
23 Chɛhowa dimi aa: “Chɔŋ paŋgii sɛnɛiye mbo kɔ bii a paŋgii sɛnɛiye, nduyɛ chɔŋ paale pɛŋgiaaleŋ mbo kɔ bii a paale pɛŋgiaaleŋ,Waŋnda kpou cho hunɔɔ wulaŋ baŋɔɔ ya lachi.*
24 A cho fula ma kɔ nua dialuŋ vilɛi wanaa tosa nilakalulaŋ ma simul la wa.Kanifuule chaa cho nda wa choo wa vi niŋ kposoŋ te,Nduyɛ yiŋnde cho nda wa choo leŋ le nyum niŋ kposoŋ te.A cho simnɔŋ nyɛ wɔɔŋ wɔɔŋndo le waŋnda kpou.”
Tɛɛsiaalaŋ
^ Ɔɔ “kpɛŋɛ.”
^ Ɔɔ “ma buulaŋ.”
^ Ɔɔ naapum, “wana saŋgala piɔmndo wo.”
^ Ɔɔ “buulaŋ.”
^ Ɔɔ “sala.”
^ Koŋ cho ni, kpelela teŋgeŋnda nda sooluu piɔmnda laŋ
^ Hibuluiye, “kulii numnde.”
^ Ɔɔ “ma piɛi ya.”
