Aisaya 7:1-25
7 O palɛi Ehaasi ve niŋ, mi Luɛsiŋ masaa le Siiliaa, a Pika po Luɛmaliaa wo, masaa le Isɔluɛi huŋ chiŋalaŋ Chulusalɛm a chɔuwo, kɛ o nɔla mbo* yem ndu le. Ehaasi yɛ, Chotam, po Yusaya wo, o wa masaa le Chuda wo velu ndu ni.
2 Ma kɔ dounuŋ wanaa wa o chiɛi lemasa Deeve wo niŋnda kona aa: “Puaa chɔuwa Siiliaa a haa Ifiluem dɔɔnuŋ naapilɛ le naa hunɔɔ chiŋalaŋndo a sɔŋgɔɔ.”
Le hei, mi Ehaasi a wanaa nduaa kpou laasiaŋ kɔltaŋ ma kandu nyiiyaa kpa kpa, mɛɛ mɛɛ hueiye wa nuaa hɔŋndo mi yɔmnde hiiluŋ o bundɔɔ niŋ yɛ.
3 Okoŋ mi Chɛhowa dimul Aisaya aa: “Num nya po numndo Sia-chasiubi,* yandii la chɔŋ mi la komal Ehaasi o mɛɛlula sooŋ nda tou le mi mɛŋndaŋ ma wa keelaŋ leniŋ ndo, o nɛi kuɛ o fondaŋ nda toosiaa kolalaŋ ndo.
4 La dimul ndu aa: ‘Kɛsi kɔllo, nduyɛ siooŋii bii num te. Kɔllo laasiaŋ num ma yɔŋnuŋ pulaŋ pulaŋ le kɔl tuu Luɛsiŋ ndo masaa le Siiliaa, a po Luɛmaliaa wo le. Kanifuule, a cho ko maa kiliŋ biŋgiŋ cho niŋ chuwɔɔ ŋɔɔ woŋ.
5 Siiliaa, Ifiluem, a po Luɛmaliaa wo yii num dumboo,* ma dimi aa:
6 “La ŋ kɔŋnuŋ Chuda miŋ kɔ chiŋalaŋ ndu a sɔŋgɔɔ, miŋ tɛɛmbuu ndu* nduyɛ miŋ bii ndu mbo wa le naa. Okoŋ, miŋ yulu po Tabiyɛɛ wo iso mbo wa masaa loŋ.”
7 “‘Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni:
“Kɛɛsiaa nda koŋ o sim niŋ te,Kɛlɛŋgaa niŋ te mi i yɔŋguŋ.
8 Chiee bɛndoo le Siiliaa cho Damasikɔɔ ni,Nduyɛ Luɛsiŋ cho masaa le Damasikɔɔ ni.
O wɔsilaŋ 65 bɛŋgu,Ifiluem cho tambɛi sɔla kpata kpata, nduyɛ wana pilɛ bɛɛ cho wa loŋ te.
9 Chiee bɛndoo le Ifiluem cho Sameeliaa ni,Nduyɛ Luɛmaliaa cho masaa le Sameeliaa ni.
Te la nɔ tiindaŋ kala kalaa le,La lo niŋ isisi yi le.”’”
10 Mi Chɛhowa hiau lachi a suɛi o Ehaasi lo aa:
11 “Nyuna Chɛhowa Mɛlɛka numndo le mbo chɔm num tamasioo. O yɔŋ bɛɛ mbo yiŋgila maa Sɛiyo* ɔɔ mbo wa filioŋ maa choo choo, I cho num ndu chɔm.”
12 Kɛ mi Ehaasi dimi aa: “I cho nyuna le, kɛlɛŋgaa niŋ te mi wou Chɛhowa o tɔɔndaŋndo niŋ.”
13 Okoŋ mi Aisaya dimi aa: “Nya cho o chiɛi lemasa Deeve wo niŋnda, yandii la yaŋ nilaŋ. La tosa mi waŋnda chieeya saŋga a biuwɔŋndo. Baa la yeema vɛlɛ mi Mɛlɛka bɛɛ saŋga a biuwɔŋndo?
14 Lelaŋ tamasioo hoo Chɛhowa pila cho nya chɔm ni: Chua laandoo cho hunɔɔ folioo* chua mbo velu poo, nduyɛ mbo ke ndu diolaŋ aa Imaanuɛɛ.*
15 Bɔtɛiyaŋ* a liaaŋ o cho wa dioo ni teleŋ o cho sina le i wɔɔŋnde fafaŋndo, nduyɛ mbo hɛli ikɛndɛi yo.
16 Tuupa mi poombɔɔ hoo sina le iwɔɔŋnde fafaŋndo nduyɛ mbo hɛli ikɛndɛi, lɛŋii masaa ŋiɔɔŋnda haa a siooŋii ndɛi bii nya ve, wana o wana ve lɛ niŋ leniŋ te.
17 Chɛhowa cho tosa mi sɔɔŋ kala kalaŋ komal num, wanaa numnda, a chiɛi finya numndo, mbo hiou bɛɛ ŋ bii niŋ yɔŋnɔŋndo chɔŋ a teleŋ Ifiluem faŋaŋ Chuda kɔɔli wo. Kanifuule Mɛlɛka cho tosa mi masaa le Asiiliaa huŋ del nya choo a sɔŋgɔɔ.
18 “O paale leŋ choo, Chɛhowa cho huiye hɔŋ le peŋgiaa cho o peela pɔmbɔla cho landaŋ mi la kɔ del o pioo Nail choo o Ichipi niŋ ndaŋ, a liaa cho o lɛŋnde Asiiliaa leŋ niŋ nda,
19 okoŋ ma hiŋ ma chal o kpoloŋnda yiŋgoloŋndaŋ,* o pouta feke feke laŋ, o yondo la ŋyɔlaŋ kpou, vɛlɛ a o fondaŋnda mamɛŋndaŋ kpou.
20 “O paale leŋ choo, sanaa a masaa le Asiiliaa, o cho o tanda cho o Pee Bɛndoo Leeloo* wo, Chɛhowa cho nda sendi bolle, yiiŋii cho nda o peloŋ nde, nduyɛ mbo sendi nda vɛlɛ siɛiyoŋ.
21 “O paale leŋ choo, waŋndo cho mɛi nau ndɔ fɔŋndɔɔ a saa nduaa a ŋiɔɔŋ yoomu.
22 Nduyɛ le mɛɛ milikiiyaŋ* ma cho wa tau yɛ, bɔtɛiyaŋ o cho wa dioo ni. Kanifuule, wana o wana cho lo o lɛŋndeŋ niŋ cho wa bɔtɛiyaŋ a liaaŋ dioo.
23 “O paale leŋ choo, fondaŋ waŋndo ndoo sɔla kilepiiyaŋ 1,000 nduyɛ mbo pisi maŋ le kaniŋ humboŋ 1,000 wo, yɔɔŋ a billo kposoŋ cho niŋ wa loŋ ni.
24 Waŋnda cho wa kɔlaŋ ndoŋ a chiɔulaŋ vɛlɛ a chiŋuaŋ o laba, kanifuule lɛŋndeŋ kpou le cho simnɔŋ yɔɔŋ vɛlɛ a billo.
25 Pembuŋ wanaa waa paandu a dɛndɔɔ woŋ, yɔɔŋ a billo cho tosa mi siooŋnde bii nya le kɔlaŋ muŋ ikɛi. Ŋ cho simnɔŋ fondaŋ nauwa kua diolaŋ ndo vɛlɛ a fondaŋ saa niɔu niɔu wo.”
Tɛɛsiaalaŋ
^ Ɔɔ naapum, “a nɔla ma.”
^ Diolaŋ ndaŋ la sim, “A Lo Niŋnda Kinɛi Cho Miiŋgu Ni.”
^ Ɔɔ “defoo.”
^ Ɔɔ naapum, “miŋ luei ndu siooŋnde.”
^ Ɔɔ “Siɔl.” Koŋ cho ni, sɛila waŋnda chieeya kpou. Tofa Tɛɛsiaa.
^ Ɔɔ “yollo.”
^ Diolaŋ ndaŋ la sim, “Mɛlɛka Cho a Naa Latulu.”
^ Ɔɔ “Bɛɛloo.”
^ Ɔɔ “fondaŋnda mɛŋndaŋ ma piɔl o kpoloŋndaŋ niŋndo.”
^ Koŋ cho ni, Yufiluaati.
^ Ɔɔ “nɔnɔɔ.”