Aisaya 8:1-22
8 Mi Chɛhowa dimul la aa: “Chua pou yɛndɛ bɛndu bɛndoo ma poonyiaa lechoo a kpɛkileŋ* aa, ‘Mahɛ-siala-hasi-baasi.’*
2 Nduyɛ I yeema mi seiyaa tonyaa haa timbi seileŋ maa a wa o hɔlndɔ ma cha mbo poonyiaŋ. Nda cho ni, Yuulaya wana soliaa lasalaa, a Sɛkalaya po Chɛbɛluɛkaya wo.”
3 Okoŋ mi hiviŋ wana lanɔ ndoo suaa le Mɛlɛka wo kɔɔli,* mbo chua folioo,* nduyɛ mbo vialu poo. Mi Chɛhowa dimul la aa: “Ke ndu diolaŋ aa Mahɛ-siala-hasi-baasi.
4 Kanifuule, tuupa mi poombɔɔ hoo chaa veeloo aa ‘Kɛkɛ!’ ɔɔ ‘Nde!’ nyɛm kɛŋ cho Damasikɔɔ a Sameeliaa woŋ, a cho muŋ puŋga masaa le Asiiliaa o hɔl ma kuɛŋnuŋ a muŋ.”
5 Mi Chɛhowa dimul la vɛlɛ aa:
6 “Le mɛɛ waŋnda haa kɛɛ mɛŋma cho Silowa* mi ma wa hiouwɔɔ bɛɛŋ bɛɛŋ,Okoŋ ma wa kɔl kɛndɔɔ latulu a Luɛsiŋ vɛlɛ a po Luɛmaliaa wo yɛ,
7 Chɛhowa cho tosa mi Pee Bɛndu* cho o kuaŋnaŋ kɛ kɛ,Nduyɛ mbo nɔ kpaayaa wo hinul nda,Ndu cho yɛ masaa le Asiiliaa ni, a kpaaya ndɔɔ kpou.
O cho hunɔɔ mɛɛ mɛŋndaŋ ma huŋ nuaa mi ma pɛ cha o peelo,Nduyɛ mi ma hel o kɔŋgɔlaŋ yɛ,
8 Mbo huŋ basu Chuda fɛl.
O cho hunɔɔ mbo keeku loŋ mɛɛ mɛŋma koŋgi bɛnduaŋ ma huŋ nuaa mi ma bii wana o bololaŋ yɛ.Oo Imaanuɛɛ!*O cho hunɔɔ maa you mbo pɛɛŋga kumbaŋnda ndɔlaŋ, mbo kumbu lɛŋnde numndeŋ kpou.”
9 Nya waŋnda haa, la kɔ mi la mal kpundɔɔ, kɛ la cho tambei sɔla.
La yaŋ nilaŋ, nya cho o fondaŋnda leviltaŋ kpou o lɛŋndeŋ choo wa!
La bɛɛndiaŋ le chɔuwo, kɛ la cho hunɔɔ tambei sɔla!
La bɛɛndiaŋ le chɔuwo, kɛ la cho hunɔɔ tambei sɔla!
10 La kɛɛsiaa, kɛ kɛɛsiaa koŋ cho tambu!
La dimi nyɛ nya yeema wo, kɛ la sɔla niŋ batiuwaa le.Kanifuule, Mɛlɛka cho a naa latulu!*
11 Chɛhowa ba ndɔ kpaaya bɛndoo wa ya choo. Nduyɛ, le mbo tosa I tul nɛi waŋnda haa kɔɔli le, mbo dimul la aa:
12 “Suɛi waŋnda haa chua pɛ maa dumboo* yiinuŋ ni, num chua ndi maa dumbu le yiinuŋ te.
Siooŋii bii num le nyɛ luei nda siooŋnde wo le,Nduyɛ nyiiya kpa kpa le nyɛ koŋ te.
13 Chɛhowa, Mɛlɛka puaa chɔuwa, ndu ŋ nɔ ni ma chua wana diandaa,Ma nɔ siooŋnde le ndu,Nduyɛ ndu nɔ ni mbo tosa num ma nyiiya.”
14 O cho simnɔŋ chiɛi Mɛlɛkaa,Kɛ mbo wa pou waŋnda kei boŋi boŋilaŋ ndo,Vɛlɛ a pou bɛndu waŋnda del lo,Le masɛi ŋiiŋnde Isɔluɛi,Nduyɛ mbo simnuŋ yaŋɔɔleŋ,Le wanaa cho Chulusalɛm nda.
15 A bɔɔbɔɔ cho boŋ ma del, nduyɛ ma yomi yomi.A cho delɔɔ o yaŋɔɔleŋ niŋ, nduyɛ ma hau.
16 Simbul nyɛ poonyiaŋ mbo wa maa lesei yo,Nduyɛ ma kinda sawaa* kpiŋ buɛiyaa niaa tɛɛŋ.
17 I cho hiouwɔɔ lachi a Chɛhowa, o cho hɔlaa nduaa yuŋgu Chekɔpu wo viŋndo wo chumndo, mi che nyɛ o cho hunɔɔ tosa wo. Nduyɛ, I cho dɔwɔɔ tiindaŋ nuu o ndu niŋ.
18 Ya a chuauwaa Chɛhowa ke ya wa, ŋ cho maa tamasi a kaamaalaŋ o Isɔluɛi niŋ, fulaa Chɛhowa, Mɛlɛka puaa chɔuwa o ba, o cho ichali o Pembii Saayɔŋ Nde choo wo.
19 Te waŋnda dimul num pɛ aa: “Nyunal naa wanaa suaa o waŋ vilɛiya lo wa diom ɔɔ wanaa dimi a chilaŋ okɔɔ wa, a tuula youwa o suɛi niŋ nduyɛ mbo wa ikala le biyɔɔ bila wa,” baa o cho Mɛlɛka ndaa le waŋnda nɔ ma nyuna le? Baa waŋ vilɛiya nda nɔ ni ma nyuna le wanaa cho yoomu wa malaa?
20 Yɔŋii nda tosa keŋ yɛ, a nɔ ma yaasiaa sawaa vɛlɛ a sɔɔŋ cho ŋ poonyiaa maa lesei yoŋ!
Nduyɛ te a dimi sɔɔŋ a mɛɛ diom Mɛlɛkaa dimi yɛ le, a nɔla ma che nyɛ teŋgaa le.*
21 Okoŋ, wana o wana cho keeku o lɛŋndeŋ niŋ o nyɛ nɛiyaa bɛndoo niŋ vɛlɛ a yiaaŋ. Nduyɛ, le mɛɛ yiaaŋ ma cho wa waŋndo nɛiyo mbo dɔɔnuŋ tumbe yɛ, o cho tofa choo choo mbo handu masanɔ ndɔɔ sendioo choo, vɛlɛ a Mɛlɛka ndɔɔ.
22 Okoŋ te o tusi pɛ hɔlla lɛŋ, nyɛ o cha niŋ kinɛiyo cho dɛnɛ palaa bɛndoo a nyumndaŋ ni, tiindaŋ ve niŋ te, sɔɔŋ kindilaŋ kposoŋ, nyumma kpiŋgbima bɛnduaŋ, nduyɛ nyɛ teŋgaa cho wa le.
Tɛɛsiaalaŋ
^ Hibuluiye, “a kpɛkile wanachioo toosiaa leŋ.”
^ Naapum diolaŋ ndaŋ la sim, “Nyaanɔŋndo Chɔ Chɔ le Nyɔɔŋ Puŋgaa.”
^ Koŋ cho ni, lanɔɔ Aisaya.
^ Ɔɔ “yollo.”
^ Fondaŋ mɛŋndaŋ ma hiau wo Silowa wa ni.
^ Koŋ cho ni, Yufiluaati.
^ Diolaŋ ndaŋ la sim, “Mɛlɛka Cho a Naa Latulu.”
^ Diom maHibuluiyo le “Mɛlɛka cho a naa latulu” cho ni, Imaanuɛɛ. Tofa Aisaya 7:14; 8:8
^ Ɔɔ “defoo.”
^ Ɔɔ “nɛi chɔmaa.”
^ Hibuluiye, “paale siaaleŋ te.”
