Aisaya 9:1-21
9 Kɛ nyumma kpiŋgbiaŋ maŋ ma ve niŋ maa teleŋ lɛŋndeŋ le wa o nyɛkindilaa niŋ, boondii nda bii lɛŋnde Sɛbulɔŋ ndeŋ a lɛŋnde Nafitalii leŋ biyɔɔ wɔɔŋndo wo le. Te teleŋ tiŋ hiou pɛ, Mɛlɛka cho tosa mi lɛŋndeŋ ndeŋ, wanaa cho o nɛi kuɛ o pee mɛŋma ihɛllo wa, wanaa cho o tanda Chɔɔdaŋ ndo niŋnda, a wanaa cho Kalili wa, ma sɔla vɛlɛ bɛɛleŋ.
2 Wanaa wa paandu balɔɔ o nyumndaŋ niŋnda,A che niŋ hau nyɛ teŋgaa bɛndoo.
Nduyɛ wanaa wa paandu o lɛŋnde nyumma kpiŋgbima bɛnduaŋ niŋnda,Nyɛ teŋgaa cho niŋ nda diondɔɔ choo.
3 A tosa mi waŋnda pia cha o lɛŋndeŋ niŋ,Nduyɛ ma tosa mi nyaale bɛndoo wa o lɛŋnde kala leŋ niŋ.
A cho num nyaaloo lachi,Mɛɛ waŋnda wa nuaa nyaaloo a teleŋ kuauwaa yɛ,Ɔɔ mɛɛ waŋnda wa nuaa a nyaaloo teleŋ nda wa nyɛm nda puŋga woŋ piɔuwaŋndo wo yɛ.
4 Kanifuule, a yimi yimi yɔm ndaa kua a wolɔɔla lusulɛilaŋ ndo,Ma yimi yimi vɛlɛ yɔm ndaa handuŋ o lachoŋgu wo, vɛlɛ a sioŋnde wanaa wa nda nyɛpalaa tusioo choo wa ndaa luaa nda leŋ,Mɛɛ ŋ tosa a boondii waŋnda Midiaŋ yɛ.
5 Kɔwɛila* kɛ kɛ puaa chɔuwa wounuŋ te a wa kɔlaŋ pɛ mi lɛŋndeŋ le hiiluŋ ndaŋ,Vɛlɛ a domala ndala cho la yiŋnaŋ o koowaŋ niŋndaŋ,La cho hunɔɔ tambei sɔla o yiŋndeŋ niŋ.
6 A vilul naa chɛlɛkpɔɔ,A ke naa poo.Nduyɛ masaleŋ le cho ndu wa o choŋgu,
Diola ndɔlaŋ la cho wa ni aa, Wana Silaa Kɔndɔfillo, Mɛlɛka Kpaaya Bɛndoo, Finya Fafɛɛŋndo, Masa Kɔl Nyuloo.
7 Masale ndɔleŋ le cho pɛŋgɛlaŋ ba o ba fee,Nduyɛ kɔl nyuloo nɔ niŋ lamɛɛlu le.O cho ichali o kpeŋgbei* lemasa Deeve wo choo o masale ndɔleŋ niŋ,Le halikpeŋ mi le sim yi nduyɛ mi le nɔ kpaayaa.Sandei a sakpoyɛi cho wa o masale ndɔleŋ bɛŋgu,Chɔŋ a hau mbo kuɛ le fɛɛŋ a fɛɛŋ.
Chɛhowa Mɛlɛka puaa chɔuwa cho hei tosa ni a dialuŋ fulaa.
8 Chɛhowa yɔŋ yooŋgoo le Chekɔpu yamɛi kilullo,Nduyɛ mi i yɔŋnuŋ a Isɔluɛi.
9 Waŋnda kpou cho sina a ndi okɔɔ,Haa Ifiluem a wanaa cho Sameeliaa wa.A nɔ lebɛɛ le, nduyɛ ma wa dimioo o kɔlta nda laŋ niŋ a yoŋga aa:
10 “Kpilikioŋ komba,Kɛ ŋ cho miŋgi taŋgul a pouta sialaa laŋ.
A kili kili yɔmii sikamɔɔ ve,Kɛ ŋ cho yɔmii sida ve miŋgi o foofola ndɔlaŋ.”
11 Chɛhowa cho tosa mi yaamɔɔwa Luɛsiŋ nda kɔ chiŋalaŋ ndu.Nduyɛ, o cho yaamɔɔwaa nduaa kɔltaŋ yusa le hunɔɔ sɔŋgɔɔ a ndu.
12 Siiliaŋnda cho fula ba paaleŋ le chaŋ ndo, mi Filitiaŋnda fula ba paaleŋ le del lo.*A cho sondola ndalaŋ kumbi, nduyɛ mi tɛɛmbuu Isɔluɛi.
Le sɔɔŋ muŋ kpou kɔl ndɔ tuuwo cho wɔ hiouwɔɔ lachi ni,Mbo wa wɔ ba ndɔɔ siɛndioo le ndu nyɛpalaa tusioo choo.
13 Kanifuule waŋnda kɛɛ le miiŋgoo wana cho nda nyɛpalaa tusioo choo wo o ibuŋ.A nuuviaa Chɛhowa, Mɛlɛka puaa chɔuwa le.
14 O paaleŋ le pilɛ niŋ kpe,Chɛhowa cho Isɔluɛi bolleŋ a puiileŋ kiolɔɔ. Koŋ cho ni, bil puiyaa sɛnɛiyo a bil vilɛiyo* o Isɔluɛi niŋ.
15 Wana bana waŋnda nɔ bɛɛle yiŋgoloŋndeŋ le ndu wo cho bolleŋ ni,Nduyɛ wana suaa le Mɛlɛka mbo pɛɛku waŋnda sɔɔŋ lachoowaŋ ndo cho puiileŋ ni.
16 Wanaa cho waŋnda haa chilaŋnda tosa nda ma wa heeloo a tuusoo,Nduyɛ mi wanaa nda wa chilaŋ chuaa choo wa hiŋnuŋ lahɔl.
17 Le sabu koŋ Chɛhowa doonuŋ niŋ nyaale le puaa ndaa feleŋguaa le,Nduyɛ o nɔ niŋ inyiɛɛ le chuauwaa nɔ ŋfinya le wa,* a wanaa vii piaanduaa wa le.Kanifuule nda kpou mal Mɛlɛka tonyaa, nduyɛ ma simnuŋ wanaa dɛnɛ wɔɔŋ,Okoŋ mi wana o wana wa sɔɔŋ ŋdiɔmndoŋ dimioo.
Le sɔɔŋ muŋ kpou kɔl ndɔ tuuwo cho wɔ hiouwɔɔ lachi ni,Mbo wa wɔ ba ndɔɔ siɛndioo le nda nyɛpalaa tusioo choo.
18 Dɛnɛ wɔɔŋndo luam ko mɛɛ yiŋndeŋ le luam nuaa yɛ.Mbo lom yondo cho mɔndɔ mɔndɔ a yɔɔŋ vɛlɛ a billo wo.
Mbo lom bundɛ bɛndu bɛndoo mɛɛ mɛɛ yɔmnde wa i piaa leniŋ cha.Nduyɛ i cho wa ŋɔɔ mi kumii tiŋiei kinduŋ choo choo tukpe tukpe.
19 Le mɛɛ Chɛhowa Mɛlɛka puaa chɔuwa dɔɔnuŋ tumbe yɛ,Lelaŋ lɛŋndeŋ le cho ŋɔɔ ni.Waŋnda chieeya cho simnɔŋ kilioŋ le yiŋnde leŋ.
Wana o wana nɔ niŋ inyiɛɛ, hali le wanayɛi nduɛi le.
20 Waŋndo cho kiolɔɔ kpeŋgii ba kɛndɛi mbo de,Kɛ yiaaŋ ma cho ndu wa nɛiyo.Nduyɛ mi waŋndo de vɛlɛ kpeŋgii ba mialle,Kɛ o hini niŋ kɔl te.
Wana o wana cho dialuŋ cho o ba ndɔɔ woŋ tɛɛmbuu.
21 Manaasɛ cho Ifiluem tɛɛmbuu,Nduyɛ mi Ifiluem tɛɛmbuu Manaasɛ.
Okoŋ ma dɔɔnuŋ vɛlɛ naapilɛ ma kɔ chiŋalaŋ Chuda.
Le sɔɔŋ muŋ kpou kɔl ndɔ tuuwo cho wɔ hiouwɔɔ lachi ni,Mbo wa wɔ ba ndɔɔ siɛndioo le nda nyɛpalaa tusioo choo.
Tɛɛsiaalaŋ
^ Ɔɔ “Samtala.”
^ Ɔɔ “kpɛŋɛ.”
^ Hibuluiye, “amakɔɔ.”
^ Ɔɔ naapum, “siɔɔla waulaŋ a bil vilɛi wa o mɛŋndaŋ ikɛiyo.”
^ Ɔɔ “viiya.”
