Chemisi 2:1-26
2 Puaapiliaa, i cho pa tonya maa la cho laalaŋ nya dɔu o Masanɔ naa Chiisu Kiliti niŋndo muuliaŋndo a kaa hɛliaa?
2 Te o wa yɛ mi waŋndo hiŋ o bɔŋaŋ nyaa a kelaŋ ŋkooliiyoŋ ndu o isu, nduyɛ mbo wa o doviaŋ o nyɛla kɛndɛ kɛndɛlaŋ niŋ, kɛ mi wana bala fondoo bɛɛ hiŋ a nyɛla nɔɔlɛilaŋ lekɔɔ,
3 baa la cho pa wana doviŋ koŋ o nyɛla kɛndɛ kɛndɛlaŋ niŋndo dimul aa, “Chal o kpeŋgbei kɛndɔɔ hoo choo,” okoŋ mi la dimul wana bala fondoo aa, “Num lo isisi loŋ” ɔɔ, “Chal o kpeŋgbei ni kɛsiaa ŋpeloo choo”?
4 Te la tosa lende pɛ, o cho yɛ yiɔɔ le nya cho koŋ chɔmndo nyapila tɛɛŋ te? Baa o cho wanaa kialu yamaŋ wɔɔŋndoŋ nda le nya simnuŋ kaŋ te?
5 La yaŋ nilaŋ puaapiliaa niaa kaalaa. Wanaa cho wanaa bala fonduaa chieeŋndo o hɔl la, nda Mɛlɛka hɛli ni le ma nɔ laalaŋndo tau, nduyɛ ma sɔla Masale o chuel wanaa kaala ndu wa buŋgɛi leŋ.
6 Kɛ mi nya tɛɛmbuu wanaa bala fonduaa labɛɛ. O cho wanaa sulaa le cho nya nyɛkindilaa handɔɔ choo, nduyɛ ma wa kɔlaŋ a nya o toŋgola kɔɔsɔ laŋ niŋ te?
7 Diola kɛndɛla Mɛlɛka ke nya laŋ, o cho nda le cho laŋ tɛɛmbuuwo le?
8 Te la bii pɛ nyɛ sawa Mɛlɛkaa dimi wo a mɛɛ i cho i poonyiaa yɛ aa, “A nɔ ma kaala wana nya chiɛɛliaŋ ndo* mɛɛ ŋ kaala numpila yɛ,” mɛɛ la tosa nyɛ bɛnda wo.
9 Kɛ te la hiou pɛ lachi a yɛ yiɔɔ chɔmndo, mɛɛ hakioo nya cho koŋ tosaa ni. Nduyɛ i cho kpendekele maa la tɛɛmbuu sawaa.
10 Kanifuule, te waŋndo wa pɛ Sawalaŋ* kpou biyɔɔ, kɛ mbo tɛɛmbuu opilɛ kpe, mɛɛ la tɔlaŋ kpou o tɛɛmbuu ni.
11 Wana dimi aa, “Wana suunda le wo,” ndu koni dimi vɛlɛ ni aa, “Wana dii wanachioo le.” Te a suunda le, kɛ ma dii wanachioo, mɛɛ a simnuŋ wana tɛɛmbaa sawaa.
12 Wanaa cho ŋchɛ le wa nya cho ni. Nduyɛ a cho nya hunɔɔ yamɛi kilul a mɛɛ sawaa dimi yɛ. Lelaŋ, la tosa sɔɔŋ, nduyɛ mi la soo mbo wa o chɛlaŋ a nyɛ sawaa dimi wo.
13 Wana o wana tuiinuŋ chaaŋ ndɔ wanachioo inyiɛɛ le, Mɛlɛka tuiinuŋ wana koŋ inyiɛɛ le. Nyiɛɛye chɔmndo bɛnda mbo hiau waŋnda yamaŋ kilullo.
14 Puaapiliaa niaa, tɔnɔ yɛɛ wa yɛ te waŋndo dimi pɛ maa o nɔ laalaŋndo, kɛ o chɔm ndu a nyɛ o tosa wo le? Laalaŋ waa lende nɔla ndu piŋi le, lende le?
15 Te puaapiliaa ɔɔ ndepiliaa wa pɛ a fɛlioo, nduyɛ ma nɔ nyɛdiaa bɔɔ le dioo lepaa o lepaa le,
16 kɛ mi wana pilɛ nya tɛɛŋ dimul nda aa, “La kɔ wa kɛndɛ. Maa la sɔla nyɛlaŋ a nyɛdiaa fɔ!” Kɛ nduyɛ mi la kɛɛ nda kioo nyɛm nda hau ba woŋ, tɔnɔ yɛɛ wa yɛ o keŋ niŋ?
17 Lende koni i cho a laalaŋndo ni. Te o tosa wallo le, mɛɛ laalaŋ vilɛiyo o cho ni.
18 Kɛ mi waŋndo dimi dɔɔ aa: “Num nɔ laalaŋndo, kɛ ya sɔɔŋ kɛndɔŋ ya tosa ni. Vɛɛ ŋ chɔm yɛ ya laalaŋ numndo te a tosa sɔɔŋ kɛndɛ le? Ya I cho num laalaŋ nuu chɔm a sɔɔŋ kɛndɛŋ ya tosa woŋ.”
19 La laalaŋ maa Mɛlɛka opilɛ kpe cho ni, lende le? O bɛnda mi la laalaŋ lende. Kɛ nyinaa wɔɔŋnda bɛɛ laalaŋ, nduyɛ ma nyiiya a siooŋnde.
20 Ee num diɔmndo hoo, mɛɛ a sina nuaa maa te laalaŋ waŋndo nɔ wo tosa wali le, laalaŋ fondoo le o cho le?
21 Baa o cho le nyɛ Ebilaham finya naa mamaa tosa wo le Mɛlɛka siiŋguu ndu wana sakpoo le? Mbo handu Aase po ndɔ o bandu luamaa lasalaa choo le mbo soli ndu sala.
22 A che maa laalaŋ ndɔɔ wa wallo latulu a sɔɔŋ o wa tosaa woŋ, nduyɛ mbo chɔm ndu kpendekele a sɔɔŋ o tosa woŋ.
23 Mi nyɛ Yau Mɛlɛkaa dimi wo peeluŋ. Mbo dimi aa: “Mi Ebilaham duau laalaŋndo o Chɛhowa* niŋ. Le hei, mbo chua ndu maa wana sakpoo o cho ni.” Okoŋ mi Chɛhowa* dimi maa chaaŋ ndɔ o cho ni.
24 La che maa le mi waŋndo simnuŋ wana sakpoo Mɛlɛka o hɔl, mɛɛ mbo tosa sɔɔŋ kɛndɔŋ. O cho ko laalaŋndo nɔɔ suee le.
25 Lende koni i wa a Luehabi chua suundɛiyo ni. Mbo yiya mialla, nduyɛ mbo bii nda nyɛkɛndɛi. Okoŋ kɔɔli, mbo miŋgi nda a nɛi cheleŋ. Le hei, mi Mɛlɛka siiŋguu ndu wana sakpoo le sɔɔŋ kɛndɛŋ o tosa woŋ.
26 Te yoomoo ve o dialloŋ niŋ te, ŋ vilɛi dialuŋ muŋ wa ni. Lende koni, te waŋndo tosa wali a laalaŋ o nɔ wo le, mɛɛ laalaŋ vilɛiyo o nɔ koŋ ni.
Tɛɛsiaalaŋ
^ Diom maKilikiiyo le “wana nya chiɛɛliaŋ ndo” sim le wanachiee kɛ kɛ.
^ Koŋ cho ni, Sawala Mɛlɛka ke Muuse laŋ.
^ Tofa Tɛɛsiaa.
^ Tofa Tɛɛsiaa.
