Chemisi 4:1-17
4 Kuɛɛnɛ sɛɛŋgiaŋndaŋ a chɔulabala cho nya tɛɛŋ ndaŋ la cho yɛ fulaa? O yeemaŋ cho nya chɔulabaa niŋ le miŋ nɔ nya kpaayaa choo woŋ niŋ la cho fulaa ni.
2 Mi la yeema nyɔɔŋ, kɛ la sɔla muŋ te. La cho waŋnda yɛleŋ tullo,* nduyɛ mi la luɛi hɔlteŋ o nyɛm ndaŋ, kɛ la nɔla muŋ sɔla le. La cho keiyo sɔŋgɔlaŋ a chɔulaŋ mɛlioo, kɛ la cho nyɛ o nyɛ sɔla le, kanifuule la cho nyuna le.
3 Te la nyuna yɛ pɛ, la sɔla muŋ te, kanifuule o cho le sabu kɛndɛ le nya cho nyunaa le. Le yeemaŋ nyaŋ ŋdialloŋ peeloo kinɛi nya cho nyunaa ni.
4 Nya wanaa suundɛiya haa,* la sina nuaa maa chaŋyɛi tosaa a chieeŋndo siiŋguu waŋndo yaamɔɔnɔ Mɛlɛkaa le? Lelaŋ, wana o wana yeema pɛ mbo tosa chaŋyɛi a chieeŋndo, mɛɛ o siiŋguu ndupila yaamɔɔnɔ Mɛlɛkaa.
5 Baa la yiyaŋ pa maa fondo fuu yau Mɛlɛkaa dimi ni aa: “Nyina paŋalɛi cho naa niŋndo cho a yeemɛi le mbo sɔla nyɛ o nyɛ”?
6 Kɛndɛi Mɛlɛka tosal naa ve cho bɔɔ. Lelaŋ yau Mɛlɛkaa dimi ni aa: “Mɛlɛka tul yoŋgaa leyɛ. Kɛ wanaa tusiŋ nda o tosal kɛndɛi nduɛi bɛnduei ni.”
7 Lelaŋ, la tusiŋ Mɛlɛka o ba bɛŋgu, mi la simul Setana.* Okoŋ, o cho nya nyaanɔŋ.
8 La sɔɔŋguu Mɛlɛka ikɛi, ndu bɛɛ cho nya sɔɔŋguu ikɛi. Nya wanaa yɔŋ wɔɔŋnda haa, la dindi bala nyalaŋ. Nduyɛ, mi la dindi kɔlta nyalaŋ, nya nɔ haa kiisaŋndo wa.
9 La sinaŋ kuɛi nyɛi. La bii mɔnɛi, nduyɛ mi la chaŋ. Mamɔɔ nyaa simnuŋ mɔnɛi, mi kɔl kɛndɛ nyaa simnuŋ kɔl tambɛiyo.
10 La tusiŋ Chɛhowa* o hɔl. O cho nya heelu tema.
11 Puaapiliaa, la pɛŋgi sɔɔŋ wɔɔŋndoŋ dimulaŋndo. Wana o wana dimi pɛ suɛi wɔɔŋnde a puaapilɛnɔ ndɔɔ okɔɔ, ɔɔ mbo kilul ndu yamɛi, mɛɛ o dimi suɛi wɔɔŋnde a sawaa okɔɔ, mbo kilul ndu yamɛi. Nduyɛ te a kilul pɛ sawaa yamɛi, mɛɛ a cho wana biyaa sawa le, kɛ wana kialaa ŋyamaa ŋ cho ni.
12 Mɛlɛka ndupilɛ kpe handu sawaa ni. Nduyɛ ndupilɛ kpe kialu yamɛi ni. Ndupilɛ nɔla ni mbo piŋi, nduyɛ mbo tɛɛmbuu. Lelaŋ, wana maavɛɛnɛ ŋ cho yɛ le ma kilul chaaŋ num wanachioo yamɛi?
13 Nya cho haa dimioo aa: “Hau ɔɔ siɔdii, ŋ cho lakɔ o chioo hoo nda, miŋ kɔ chii loŋ wɔsioo opilɛ, miŋ tosa yulaleŋ nduyɛ miŋ sɔla tɔnɔɔ” wa, la yaŋ ya nilaŋ.
14 La sina mɛɛ yoomula nyalaŋ la wa niŋ siɔdii yɛ le. La cho ko mɛɛ mɔmndo cho yɛ. Le teleŋ biŋgi koni o chuchu ni. Okoŋ kɔɔli, mbo lo bɛɛ pɛ.
15 Kɛ la nɔ mi la dimi aa: “Te Chɛhowa* chɛl pɛ, ŋ cho wa yoomu, okoŋ miŋ tosa hei ɔɔ hei.”
16 Kɛ la cho wɔ yoŋgaa kiolɔɔ a nyapila okɔɔ. Nduyɛ yoŋga waa lende niŋ kposoŋ te.
17 Lelaŋ, te waŋndo sina pɛ nyɛ cho o kɛndɔɔ le tosaa wo, kɛ mbo kɛɛ le ndu tosaa, mɛɛ o tosa hakioo.
Tɛɛsiaalaŋ
^ Kilikiiye, “diyɔɔ.”
^ Ɔɔ “Nya wanaa kɛɛ haa Mɛlɛka wa.”
^ Kilikiiye, diabolos. O sim le “wana tɛɛmbuu acheleŋnda tɔɔ wo.”
^ Tofa Tɛɛsiaa.
^ Tofa Tɛɛsiaa.
