Chona 1:1-17
1 Mi Chɛhowa suaa naa Chona* chua, po Amitai yo, mbo dimul ndu aa:
2 “Chɔŋ ma kɔ dimul waŋnda o chiee bɛndoo niŋ Ninivɛɛ maa, I cho nda hunɔɔ tɛɛmbuu, kanifuule I cho chɔɔ dɛnɛwɔɔŋ nda cho tosaa wo.”
3 Kɛ mi Chona nyaanuŋ Chɛhowa le kɔŋndaŋ Taasi. Okoŋ mbo kua Chopa, mbo saaluŋ dɛndɛ wa kɔlaŋ Taasi wo. Mbo yɔŋgu paawa* dɛndɔɔ, mbo luɛi le ma kuɛ nda wanaa wa kɔlaŋ Taasi wa, kanifuule o wa Chɛhowa nyaanɔŋndo.
4 Okoŋ, mi Chɛhowa yɔŋ hueiyii bɛndu bɛnduei o pee mɛŋma ihɛllo choo. I wa hɔŋndo fuku fuku o mɛŋndaŋ choo, nduyɛ ndoo lo niŋ chobe mi dɛndɔɔ ndoo mɔɔwa.*
5 Mi siooŋnde bii wanaa wa o dɛndɔɔ niŋ nda, okoŋ mi wana o wana kandu piɛileŋ o mɛlɛka ndɔɔ lo le malaa. Ma kandu wolɔɔla wa o dɛndɔɔ niŋ ndaŋ vii viiyo o peelo, le mi dɛndɔɔ yɔŋnuŋ fefele. Kɛ Chona waŋnuŋ amatou di o dɛndɔɔ niŋ, nduyɛ o waŋnuŋ o luaŋ yikpi.
6 Mi wana wa kɔlaŋ a dɛndɔɔ wo kua naa ndu chua, mbo nyuna ndu aa: “Le yɛɛnɛ ŋ cho yɛ luaŋ? Chɔŋ, ma piɛi o mɛlɛka numndo lo! Kɛlɛŋgaa ndɔɔ mi Mɛlɛka tonyaa tuiinuŋ naa inyiɛɛ, okoŋ ŋ vi le.”
7 Okoŋ kɔɔli ma dimulaŋ aa: “La huŋ ŋ wuunuŋ kooŋ le miŋ sina wana tosa mi kpundɔɔ hoo tual naa choo wo.” Mɛɛ nda wuu kooŋ, mi kooŋ bii Chona.
8 Ma nyuna ndu aa: “Yandii dimullɔ naa, o nɛɛnɛ tosa yɛ mi kpundɔɔ hoo tual naa choo? Wali yɛɛ ŋ tosa yɛ? Kuɛɛnɛ ŋ chɛŋ yɛ? Lɛŋnde kuɛɛ ŋ fula yɛ, nduyɛ ɔɔ kaale numndeŋ?”
9 Mbo muli aa: “Hibuluinɔɔ ya cho ni. Nduyɛ Chɛhowa, Mɛlɛka cho o choo choo niŋndo ya piɛi ni. Ndu toosiaa pee mɛŋma ihɛllo a lɛŋnde vesɛileŋ ni.”
10 Le hei, mi siooŋnde chɔɔlu puaa biyɔɔ. Okoŋ ma nyuna ndu aa: “Yɛɛnɛ ŋ tosa yɛ?” (Chona ndoo dimul nda niŋ maa Chɛhowa o wa nyaanɔŋndo ni.)
11 Ma nyuna ndu vɛlɛ aa: “Yɛɛnɛ naŋ tosa yɛ a num le mi mɛŋndaŋ ma pɛŋgi hiilɔŋndo?” Kanifuule, hueiyii fuku fukuei wa tuŋ hiouwɔɔ lachi a mɛŋndaŋ hiiluuwo yokpaŋ yokpaŋ.
12 Mbo dimul nda aa: “La chua ya mi la mal la o peelo, okoŋ mi mɛŋndaŋ ma pɛŋgi hiilɔŋndo. Kanifuule, I sina maa ya tosa ni mi hueiyii fuku fukuei hei wa hɔŋndo.”
13 Mi puaa kindi kindiŋ le kɔlaŋ a dɛndɔɔ o kɔŋgɔ kɛ a tiu ba le, kanifuule hueiye wa tuŋ hiouwɔɔ lachi a mɛŋndaŋ hiiluuwo yokpaŋ yokpaŋ.
14 Okoŋ, ma piɛi o Chɛhowa lo aa: “Oo Chɛhowa, yandii tosa miŋ sɔla piɔmndo le laŋunɔɔ* hoo le. Chɛhowa, bii naa tɔɔyaŋ le piɔm* laŋunɔ tɛɛmbuu hoo isɔɔ o isɔɔ le wo le, kanifuule nyɛ ŋ hɛnaŋ ndo, ndu tosaŋ hoo ni.”
15 Okoŋ ma chua Chona, ma mal ndu o peelo. Nduyɛ, mi mɛŋndaŋ ma pɛŋgi iyokpaŋ yokpaŋ nde.
16 Mi siooŋii bɛnduei bii puaa haa le Chɛhowa, okoŋ ma soli salaa o Chɛhowa lo, nduyɛ ma chuel ndu buŋgaŋ.
17 Mi Chɛhowa yɔŋ suu bɛndu bɛndoo mbo mial Chona. Nduyɛ, le palɛi i yaa a nyumndaŋ ma yaa, Chona wa suuwo hoo o dembe.
Tɛɛsiaalaŋ
^ Diolaŋ ndaŋ la sim, “Piiŋndo.”
^ Ɔɔ “sala.”
^ Ɔɔ “kɔɔlu.”
^ Ɔɔ “yoomu laŋunɔɔ.”
^ Hibuluiye, “kooma.”
