Chona 4:1-11
4 Kɛ mi hei tɛɛmbuu Chona kɔllo tau. Le hei, mbo duaunuŋ tumbe tau tau.
2 Okoŋ, mbo piɛi o Chɛhowa lo aa: “Oo Chɛhowa, hei kpeekpei wa ya o kɔl ni teleŋ ya wa o lɛŋnde nileŋ niŋndo. Nyɛ koŋ tosa ni mi wa kɔŋndaŋ Taasi o tasela ndɔ, kanifuule I sina maa Mɛlɛka nɔ kɛndɛi a nyiɛɛye wo ŋ cho ni. A dounuŋ tumbe chɔ chɔ le, nduyɛ kaala lo lechoo numndo cho bɔɔ. A nɔla ma siŋga yiyaŋ numndo, okoŋ a hiŋ lɛ a kpundɛ ŋ dimi le hunɔɔ wo le.
3 Oo Chɛhowa, yandii chua yoomu nuu, kanifuule o bɛnda mi vi mbo hiau waa yoomu.”
4 Mi Chɛhowa nyuna ndu aa: “Baa a nɔ pa di le ma dɔɔnuŋ tumbe?”
5 Okoŋ kɔɔli, mi Chona faŋaŋ chiee, mbo kɔ chal chiee lekɔɔ ba paaleŋ le chaŋ ndo. Mbo kɔ taŋgul bafɛiyo* loŋ, nduyɛ mbo chal o wunduleŋ bɛŋgu le chɔɔ nyɛ cho yɔŋnɔŋ a chioo wo.
6 Mi Chɛhowa tosa mi tɔlɔɔ saaniaa wo* wul le mbo ke Chona wunduleŋ, nduyɛ mbo pɔlul kɔllo. Mi Chona naŋ kɔl tau le tɔlɔɔ koŋ.
7 Kɛ diimandɔɔ a teleŋ paale siaaleŋ, mi Mɛlɛka tonyaa yɔŋ dɛloo, mbo kɔ dio tɔlɔɔ koŋ, okoŋ mbo nyamala.
8 Mɛɛ paaleŋ le kandu fulaa, mi Mɛlɛka yɔŋ vɛlɛ hueiyii tuu ve fulaa ba paaleŋ le chaŋ ndo. Mi paaleŋ le luaa Chona bolleŋ, nduyɛ ndoo lo chobe mi ndoo wou kpandeŋ. Okoŋ, mbo yeema piɔmndo sakpo. Mbo wa dimioo aa, “O bɛnda mi vi mbo hiau waa yoomu.”
9 Mi Mɛlɛka nyuna Chona aa: “Baa a nɔ pa di le ma dɔɔnuŋ tumbe le tɔlɔɔ vi hoo wo?”
Mbo muli aa: “I nɔ di mi dɔɔnuŋ tumbe. I dɔɔnuŋ bɔɔ tumbe, nduyɛ I yeema pɛŋ mi vi.”
10 Kɛ mi Chɛhowa dimi aa: “Nyiɛɛye bii num le tɔlɔɔ ŋ tol te wo, nduyɛ o cho yɛ num te tosa mbo wul te. O nyumndaŋ ma pilɛ bɛŋgu o vil ni, nduyɛ mbo wu o nyumndaŋ ma pilɛ bɛŋgu.
11 Waŋnda cho o chiee bɛndoo Ninivɛɛ niŋ hiouwɔɔ 120,000, nduyɛ a sina i kɛndɛi tɛɛŋ a i wɔɔŋnde le. Waŋnda haa nɔ chɔluaa tau. Baa ya bɛɛ nɔ mi tuiinuŋ nda inyiɛɛ le?”
