Choobu 1:1-22
1 Po pilɛ wa o lɛŋnde Ɔɔsi leŋ niŋ diolaŋ aa Choobu.* O wa sakpo, nduyɛ mbo chɔm lo lechoo wo o Mɛlɛka lo. Ndoo nɔ siooŋii Mɛlɛkɛi, nduyɛ ndoo tul o wɔɔŋndo leyɛ.
2 Ndoo velu puaa a ŋɔmmɛu a waŋ laanduaa a yaa.
3 Chɔluaa ndoo nɔ wa cho haa ni: saa 7,000, nyɔɔmiaa 3,000, nauwa 1,000,* a sofɛliaa* 500. Nduyɛ ndoo nɔ vɛlɛ buɛiya tau tau. Le hei, wanaa wa ba paaleŋ le chaŋ ndo wa kpou, mbo simnuŋ wana tɔɔ bɛndoo nda tɛɛŋ.
4 Puaa nduaa o kɛ kɛ ndoo nɔ paale o tosa bɔŋaŋ yelelaŋndo o ndu lo bɛɛ leŋ. Mi ndaa veelu yemaa ndaa yaawa le ma kɔ dio nyɛdiaa, nduyɛ ma kol nda ndaa latulu.
5 Te nda kpou ndaa balu pɛ bɔŋaŋnda yelelaŋndaŋ ndaŋ biyɔɔ, mi Choobu ndoo veelu nda naapilɛ le mbo dindi nda. Okoŋ, o chɛŋ idii puŋ o soli sala luamaa o Mɛlɛka lo le o kɛ kɛ. Mi Choobu ndoo dimiŋ o kɔl aa: “Naapum chuauwaa niaa tosa hakioo a Mɛlɛka, nduyɛ ma yei ndu o kɔlta ndalaŋ niŋ.” Lende ndoo tosa teleŋ o teleŋ ni.
6 Paale pilɛ, mi maalikɛiya* kɔ sim Chɛhowa lachi, nduyɛ mi Setana bɛɛ luɛi nda tɛɛŋ.
7 Okoŋ mi Chɛhowa nyuna Setana aa: “Kuɛɛnɛ ŋ wa yɛ?” Mi Setana mulul Chɛhowa aa: “I wa balɔɔ o lɛŋndeŋ choo, nduyɛ mi wa leŋ mɛɛndaŋndo.”
8 Mi Chɛhowa nyuna Setana aa: “Ma cha pa buɛi nuu Choobu?* Wana o wana cho o lɛŋndeŋ choo maa ndu le. O cho sakpo, nduyɛ mbo chɔm lo lechoo wo o ya lo. O nɔ siooŋnde le ya Mɛlɛka, nduyɛ o tul o wɔɔŋndo leyɛ.”
9 Mi Setana mulul Chɛhowa aa: “Baa le fondo fuu Choobu nɔ siooŋii numnde ni?
10 O cho num te cho ndu mandaa, a chiɛi ndɔɔ, vɛlɛ a nyɛ o nyɛ o nɔ mɛɛ kpaki kala kalaa balu nuaa nyɔɔ yɛ le? A bii ma duau walta ndɔlaŋ sala, nduyɛ chɔluaa nduaa cho a tiuwaa silɔ o lɛŋndeŋ niŋ.
11 Kɛ siɛndi wɔ baa, ma tɛɛmbuu nyɛ o nyɛ o nɔ. A cho chɔ mɛɛ sɔɔŋ cho siŋgaŋ yɛ. O cho lasisi num o hɔl mbo yei num.”
12 Okoŋ mi Chɛhowa dimul Setana aa: “Awa, nyɛ o nyɛ o nɔ, I mal num o ba. Ndupila kinɛi ŋ pilaŋ te ni!” Okoŋ kɔɔli, mi Setana faŋaŋ Chɛhowa o hɔl mbo kuaŋnuŋ.
13 Paale pilɛ, mɛɛ puaa nduaa a chuaa nduaa laanduaa wa nyɛdiaa dioo a muɛiyaŋ kolɔɔ o po ndɔ tasoo lo chiɛiniŋ,
14 mi buɛiyo huŋ dimul Choobu aa: “Nauwa wa waa o chiɛi niŋ, nduyɛ mi sofɛliaa wa nda diolaŋ ikɛi,
15 mi Saabiaŋnda huŋ del naa choo, ma kuaŋnuŋ a chɔluaa kpou. Nduyɛ ma diu diu buɛiyaa numnda a muɛi faŋnde. Yapilɛ kinɛi hɛluŋ ni le mi huŋ dimul num.”
16 O mei bɛɛ sondo le, mi buɛi cheleŋ huŋ dimul ndu vɛlɛ aa: “Yiŋndeŋ* le fula choo choo o Mɛlɛka lo, mi le huŋ diu diu saa a buɛiyaa numnda kpou. Yapilɛ kinɛi hɛluŋ ni le mi huŋ dimul num.”
17 Ndu bɛɛ mei sondo le, mi o cheleŋ huŋ dimul ndu vɛlɛ aa: “Kaadiaŋnda hiŋ kundala bɛndulaŋ la yaa, ma huŋ del naa choo ma kuaŋnuŋ a nyɔɔmiaa kpou. Nduyɛ, ma diu diu buɛiyaa numnda a muɛi faŋnde. Yapilɛ kinɛi hɛluŋ ni le mi huŋ dimul num.”
18 Ndu bɛɛ mei sondo le, mi o cheleŋ huŋ dimul ndu vɛlɛ aa: “Puaa numnda a chuauwaa num aa laanduaa wa nyɛdiaa dioo a muɛiyaŋ kolɔɔ o po num tasoo lo chiɛiniŋ.
19 Kɛ o lepilɛ niŋ kpe, mi hueiyii bɛnduei chaŋ o pollo niŋ, mi i huŋ lɔɔ chiɛiyo o kpeŋguŋ hiɔɔloŋ mbo del chuauwaa numnda choo, mbo diu diu nda kpou. Yapilɛ kinɛi hɛluŋ ni le mi huŋ dimul num.”
20 Okoŋ mi Choobu chaŋ mbo sɛɛsiaŋ nyɛlaŋ lekɔɔ, mbo kili yiinde ndu o lebol. Okoŋ mbo del lɛŋ, mbo beŋ Mɛlɛka wulaŋ.
21 Mbo dimi aa:
“Fondo ya fula kala nuu o dembe ni,Fondo ya cho vɛlɛ miiŋgu ni.
Chɛhowa ke ya ni, nduyɛ Chɛhowa koni chua vɛlɛ ni.
Maa diola Chɛhowa laŋ la hiou lachi a saŋgalaa sɔlaa fɔ!”
22 A sɔɔŋ palaŋ komal muŋ Choobu woŋ kpou, o tosa haki ɔɔ mbo bii Mɛlɛka tɔɔyaŋ maa ndu le tosal ndu sɔɔŋ wɔɔŋndoŋ muŋ te.
Tɛɛsiaalaŋ
^ Naapum diolaŋ ndaŋ la sim, “Nyɛ Nda Tul Leyɛ Wo.”
^ Hibuluiye, “a piaanduaa 500, a laanduaa 500.”
^ Hibuluiye, “sofɛliaa laanduaa.”
^ Hibuluiye, “chuauwaa Mɛlɛka tonyaa.”
^ Hibuluiye, “Ma handu pa buɛi nuu Choobu kɔllo choo?”
^ Ɔɔ naapum, “Taŋndeŋ.”
