Choobu 10:1-22
10 “I tul bɔɔ yoomu nuu leyɛ.
I cho chɔm ŋɔɔchiaŋ kɛ kɛ cho ya o kɔl.
Nduyɛ mi soo a nyɛkindilaa* bɛndu cho ya choo wo!
2 I cho Mɛlɛka dimul aa: ‘Yaala ya le.
Chɔm ya le sabu ŋ simnuŋ yaamɔɔnɔ nuu wo.
3 Tɔnɔ yɛɛ ŋ sɔla yɛ te a tusi ya pɛ nyɛpalaa choo,Ma tul wana ŋ toosiaa a bala numndaŋ ndo leyɛ?Le yɛɛ ŋ yaŋ yɛ nilaŋ o kɛɛsiaala wanaa dɛnɛ wɔɔŋnda?
4 Baa hɔlta wanachioo ŋ nɔ ni,Ɔɔ mɛɛ wanachioo cha sɔɔŋ yɛ ŋ cha muŋ ni?
5 Baa mɛɛ palɛi wanachioo cho i biŋgi yɛ palɛi numnde bɛɛ cho ni?Ɔɔ mɛɛ wanachioo wa yoomu le wɔsila biŋgi yɛ koni num bɛɛ wa yoomu ni,
6 Le ma wa biondɔŋnda nilaŋ mɛɛndiaŋndo,Nduyɛ ma handu kɔllo o hakila nilaŋ choo?
7 Numpila sina maa I tɛɛmbuu isɔɔ le,Nduyɛ wana o wana nɔla mbo chiindiaa ya num o ba le.
8 Numpila koni chɔu ya nduyɛ ma toosiaa ya a bala numndaŋ ni.Kɛ suŋ suŋ niŋ, a yeema ma tɛɛmbuu ya kpata kpata.
9 Loonuŋ maa a puuloo ŋ toosiaa ya ni,Kɛ a cho ya vɛlɛ miŋgioo o puuloo niŋ.
10 O cho num te tala ya maa ma milikii,*Nduyɛ ma toosiaa ya maa mɛɛma liimiɛiyaŋ te?
11 Ma holi holi visioŋ o dialuŋ nuŋ maa kola chuɛɛnaŋ,Nduyɛ ma mɔsɔŋa paala nilaŋ a nyɛsuma niaŋ naapilɛ.
12 A ke ya yoomoo, nduyɛ ma chɔm ya kaala lo lechoo wo.A cho ya* mandaa nyɛkɛndɛi, nduyɛ ma wa ya chaa biyɔɔ.
13 Kɛ ma kɛɛsiaa sɔɔsɔɔ le ya sɔɔŋ muŋ tosallo.*
I sina maa num cho ya sɔɔŋ muŋ tosallo ni.
14 Te I tosa pɛ hakioo, a cho ndu chɔ kpou.Nduyɛ a mel la le biondɔŋnda nilaŋ te.
15 Te I tosa pɛ hakioo, I wɔu niŋ bɔɔ a ya!
O yɔŋ bɛɛ mi tosa suɛi wɔɔŋ te, I nɔla mi chua bolleŋ te.Kanifuule siɔmbulaŋ la cho ya, nduyɛ nyɛpalaa cho ya bɔɔ choo.
16 Te I chua pɛ bolleŋ, a cho ya nuuviaa mɛɛ kpɔkuŋndo* nuuviaa nuaa nyɛdiaa yɛ.Nduyɛ ma soliŋ vɛlɛ kpaaya numndo kpeku le ya nyɛpalaa tusioo choo.
17 A cho hunɔɔ a seiyaa sɛnɛiya le ya chiŋalaŋndo,Nduyɛ ma wa hiouwɔɔ lachi a tumboo a ya.Sɔɔŋ palaŋ cho ya bɔɔ komallo o lepula.
18 Le yɛɛ ŋ tosa yɛ mi kala nuu vialu ya?
Ndoo bɛnda bɔɔ mi yaa vi wana o wana ndoo chi ya le.
19 I wa ko wa maa fɛɛŋ bɛɛ I ve o chieeŋndo hoo choo le.Ndoo bɛnda bɔɔ mɛɛ yaa fula nuaa kala nuu o dembe yɛ, mi yaa kuɛ sakpo o sɛiyo niŋ.’
20 Palɛi nii le waa yoomu lo lɛ i bɔɔ le. Mɛlɛka mal la o ba nuu choo.O faŋa ya hɔlte ndɔleŋ choo, le halikpeŋ mi pɛŋgi tiŋ nyɛɛmbɔ,*
21 Tuupa mi kuɛ o nyumma tiŋgisiiyaŋ niŋ,Fɛɛŋ bɛɛ I miiŋgu lɛ naŋ te.
22 Naa ya cho yɛ haa kɔlaŋ nda, nyumma bɛndu bɛnduaŋ ma cho loŋ ni.Fondaŋ laasi laasioo pila o cho ni,Nduyɛ nyɛ teŋgaa cho loŋ ndo cho ko maa nyumma bɛndu bɛnduaŋ.”
Tɛɛsiaalaŋ
^ Ɔɔ “nyɛ nɛiyaa.”
^ Ɔɔ “nɔnɔ.”
^ Ɔɔ “yoomu nuu.”
^ Hibuluiye, “Ma viaŋ sɔɔŋ muŋ kpiŋ o kɔl numndo niŋ.”
^ Ɔɔ “yalakanaa.”
^ Ɔɔ “mi wa tiŋ wuye wuye.”
