Choobu 11:1-20
11 Mi Sofaa Naamataitiinɔɔ dimi aa:
2 “A yiyaŋ pa maa diomnda ŋ cho laŋ dimioo laŋ kpou, wana mulul num niŋ te?Baa suɛi tau tosa ni mi waŋndo sɔla di?*
3 A yiyaŋ pa maa sɔɔŋ fondoŋ ŋ cho muŋ dimioo woŋ kuuna waŋnda suɛi ni?
Ɔɔ sɔɔŋ mamaŋ ŋ cho muŋ dimioo woŋ tosa ni wana miŋgi num o nɛi le?
4 Kanifuule a cho dimioo aa, ‘Pɛɛkula nilaŋ la cho walaŋ.Nduyɛ Mɛlɛka sina maa I cho o diandaa ndu o hɔl.’
5 Te ndoo yɔŋ pɛ maa Mɛlɛka suaa o num ndo,O wa num dimul.
6 O wa num sɔɔŋ viaŋnaŋndoŋ chɔm a taasi ndɔɔ okɔɔ.Kanifuule, taasi Mɛlɛkaa nɔ la mɛɛlu le.
Okoŋ, a wa sina maa Mɛlɛka yeema mbo loonuŋ biondɔŋnda numndaŋ te.
7 A nɔla pa ma sina sɔɔŋ yiŋgoloŋ cho a Mɛlɛka okɔɔ woŋ?Ɔɔ a nɔla pa ma sina nyɛ o nyɛ* a Mɛlɛka Kpaaya Kpou Kpou Wo okɔɔ?
8 Taasi Mɛlɛkaa cho filioŋ o hiou choo choo. A nɔla pa ma sina ndu lapɛŋgu?
Nduyɛ o yiŋgila o hiou Sɛiyo.* Yɛɛ kpeekpei ŋ nɔla yɛ ma sina a ndu okɔɔ?
9 O hiou lɛŋndeŋ bandei,Nduyɛ o toŋgu o hiou pee mɛŋma ihɛllo.
10 Te Mɛlɛka bii pɛ waŋndo mbo kuɛ a ndu o chiɛi kialaa ŋyamaa niŋ,Nɛɛ nɔla yɛ mbo kuuna ndu?
11 Te waŋndo luɛi pɛ kaŋgalaa, mbo sina.
Te o che pɛ suɛi dɛnɛ wɔɔŋnde, baa o bii ndi bila le?
12 Te sofɛlɛ yondoo kuam pɛ wanachioo,Mɛɛ diɔmndo cho kiondɔɔ kɔl.
13 Ndoo bɛnda bɔɔ ma bɛɛndiaa kɔl numndo,Nduyɛ ma piɛi* o Mɛlɛka lo.
14 Te yɔŋ wɔɔŋndo ŋ cho tosaa ni, mɛɛ soli balaŋ leniŋ,Nduyɛ ma chɛl mi sandei luɛi o tɛndii numndo niŋ.
15 Okoŋ, a tiuba ma chua bolleŋ siɔmbula bii num te.A tiu niŋ ba ma sim yi ma waŋnuŋ fɛɛsɛŋ, siooŋii bii num te.
16 Koŋ cho tosa ma puɛɛnuŋ dɛnɛ palaa cho num choo wo.A cho bahawɛila numndaŋ puɛɛnɔŋ, mɛɛ mɛŋndaŋ ma hiaunuŋ nuaa a sina le yɛ.
17 Sɔɔŋ cho hiouwɔɔ lachi a teŋgaa o yoomu numndo niŋ mbo hiou paale kalaleŋ,Nduyɛ nyumndaŋ o yoomu numndo niŋ bɛɛ ma cho wa maa nyɛ teŋgaa paale siaa.
18 A cho wa a kɔl kɛndɛ, kanifuule a nɔ tiindaŋndo.A mɛɛndaŋ niŋ kɔɔli kɔɔli, nduyɛ ma hiniŋ hɛnɛkɛ.
19 A hiniŋ niŋ, wana o wana luei num niŋ isiooŋ te.Nduyɛ, wanaa bɔɔbɔɔ cho num hunɔɔ nuuviaa le ma mala nda.
20 Kɛ hɔlta wanaa dɛnɛ wɔɔŋnda la cho simnɔŋ yim yim,Nduyɛ a seeluŋ niŋ ba o ba nda nyaanuŋ te.Tiindaŋ nda nɔ niŋ kinɛiyo cho piɔmndo ni.”
Tɛɛsiaalaŋ
^ Ɔɔ “Baa wana heelaŋndo sɔla pa di.”
^ Ɔɔ “pɛŋgulaŋ.”
^ Ɔɔ “Siɔl.” Koŋ cho ni, sɛila waŋnda chieeya kpou. Tofa Tɛɛsiaa.
^ Hibuluiye, “ma siɛndi bala numnda.”
