Choobu 12:1-25
12 Okoŋ mi Choobu dimi aa:
2 “O kpeekpei niŋ, nya sina nyɛ o nyɛ ni.*Nduyɛ, a taasioo latulu nya cho wu ni!
3 Kɛ ya bɛɛ nɔ sinapɛŋgoo.*
La hiu ya le.
Nɛɛ kpeekpei sina yɛ sɔɔŋ muŋ te?
4 Ya yaa veelu Mɛlɛka mbo tuei ya diom ndo,I simnuŋ nyɛ mamaa le chaaŋaa niaa.
Wana cho sakpo nduyɛ o nɔ sɔŋ o sɔŋ te wo simnuŋ niŋ nyɛ mamaa.
5 Wana buulaŋ te wo tul dɛnɛ palaa leyɛ,Kanifuule, o yiyaŋ maa wanaa cho niŋ o nyɛkindilaa niŋnda* sɔɔŋ palaŋ komal ni.
6 Wanaa dɛnɛ wɔɔŋnda choŋnuŋ o kɔl nyulu niŋ o tɛndiila ndalaŋ niŋ,Nduyɛ wanaa mam Mɛlɛka wa choŋnuŋ hɛnɛkɛ.Waŋnda haa, mɛlɛkaa ndaa choŋnuŋ nda o laba.
7 Kɛ a yandii, nyuna wɔ visiaa, a cho num isɔɔ pɛɛku,Ɔɔ youwaa balu o choo choo niŋnda, a cho num isɔɔ dimul.
8 Mɛɛndaŋ ndɔ nyɛm cho o lɛŋndeŋ choo woŋ, ŋ cho num isɔɔ pɛɛku,Nduyɛ ma mɛɛndaŋ suuwa o pee mɛŋma ihɛllo niŋ, a cho isɔɔ pɛɛku.
9 O nyɛm Mɛlɛka toosiaa muŋ ndoŋ tɛɛŋ kpou,O kuɛɛ cho yɛ o sina te Chɛhowa le toosiaa ndu a bala ndɔlaŋ te?
10 Ndu o ba nyɛ o nyɛ yoomaa cho ni,Vɛlɛ a yoomu wanachiee* kɛ kɛ.
11 Mɛɛ diɔɔmuleŋ le dembi nuaa nyɛdiaa yɛ,Lende koni nileŋ le tuɛi suɛi ni mi le sina ndi pɛŋgu.
12 Taasioo pila bɛnduaa yuuwa nɔ ni,Nduyɛ sinapɛŋgoo pila wanaa viou niŋ yoomu wa nɔ ni.
13 Mɛlɛka nɔ taasioo, nduyɛ o cho wana kpaaya bɛndu.O nɔ sinapɛŋgoo, nduyɛ mbo tosa nyɛ o dimi wo.
14 Te o tɛɛmbuu nyɔɔ pɛ, wana o wana nɔla mbo miŋgi ndu toosiaa le.Nduyɛ te o kinda nyɔɔ pɛ, wana nɔla ndu kumbi le.
15 Te o bii mɛŋndaŋ pɛ, nyɛ o nyɛ vesa sɛɛŋ.Nduyɛ te o mal maŋ pɛ, ma pɛ o lɛŋndeŋ choo.
16 O nɔ dialuŋ kalaŋ a taasioo.Wanaa waŋnda hui ya a wanaa hui waŋnda wa, ndu o ba nda cho ni.
17 Mbo tosa mi wanaa silaa balu peluŋ fondo,*Nduyɛ mbo siiŋguu wanaa kialaa ŋyamaa diɔmnda.
18 Mbo puu masaa waa kpaayalaŋ o ba,Nduyɛ mbo baa nda yauleŋ o chaŋ.
19 Mbo tosa mi wanaa soliaa lasalaa balu peluŋ fondo.Nduyɛ mbo faŋa wanaa cho o kpaayalaŋ choo wa, mbo miŋgi wanaa cheleŋ o foofola ndalaŋ.
20 Mbo tosa wanaa waŋnda tiindaŋ le nda silaa wa chiee lɛ suɛi le,Mbo tosa vɛlɛ mi falaa* nɔ taasioo wa simnuŋ diɔmnda.
21 Mbo tusi laŋgbaa kalla siɔmbulaŋ,Nduyɛ mbo tosa wanaa nɔ kpaayaa wa ma vi ŋdial.*
22 Mbo chɔɔmuu sɔɔŋ yiŋgoloŋ yɔŋnuŋ o nyumndaŋ niŋndoŋ,Nduyɛ mbo tusi nyɛ teŋgaa le nyumma kpiŋgbiaŋ teeŋgiaa.
23 Mbo tosa mi waŋnda kui tau o lɛŋndeŋ niŋ le nda tɛɛmbuuwo,Nduyɛ mbo tosa vɛlɛ mi waŋnda kui tau o lɛŋnde niŋ, le mbo kuɛ a nda o biyɔɔ niŋ.
24 Mbo tosa wanaa sim waŋnda lachi wa nɔ lɛ kɔl kalu le,*Nduyɛ mbo tosa ma wa heeloo a tuusoo o pollo niŋ.
25 A cho wa balaŋ keeliaa o nyumndaŋ niŋ,Nduyɛ, mbo tosa ma wa balɔŋndo mɛɛ muɛiyaŋ ma bii nuaa wanaa kolaa yɛ.
Tɛɛsiaalaŋ
^ Hibuluiye, “nya cho wanaa kaŋ ni.”
^ Hibuluiye, “kɔllo.”
^ Hibuluiye, “wanaa sim yi le wa.”
^ Hibuluiye, “dialuŋ wanachiee.”
^ Ɔɔ “Mbo yuŋga wanaa silaa.”
^ Ɔɔ “waŋ banaa.”
^ Hibuluiye, “mbo timbi wanaa nɔ kpaayaa wa yauleŋ o chaŋ.”
^ Hibuluiye, “nɔ lɛ kɔl niŋ te.”
