Choobu 13:1-28
13 “A tonya, hɔlta nilaŋ la che niŋ sɔɔŋ muŋ kpou,Mi nila nilaŋ la tuɛi, nduyɛ mi bii muŋ bila.
2 Nyɛ nya sina wo, ya bɛɛ sina.La hiu ya le.
3 Le ya, o cho fisa le mi suukaŋ a Mɛlɛka Kpaaya Kpou Kpou Wo pila.Ndu ya yeema ni mi chɔm bahawɛi nuu.
4 Kɛ choolaŋ kposoŋ nya cho ya dimullo ni.Nya kpou, wanaa chiɔuwaa fonduaa nya cho ni.
5 Te nyaa meinuŋ pɛ doŋ,Keŋ wa chɔm kɛsɛ maa wanaa taasiaa nya cho ni.
6 Yandii, la yaŋ nilaŋ o nyɛ ya cho dimioo wo,Nduyɛ, mi la tuei sɔɔŋ cho ya wa fulaa o sondo woŋ.
7 Baa diola Mɛlɛka laŋ nya yeema soliŋndo kpeku ni le choolaŋ dimioo,Nduyɛ mi la dimi diomnda huiyaa laŋ le ndu?
8 Baa kumbuii Mɛlɛkɛi nya cho ni,Ɔɔ la yeema mi la kɔɔsa le Mɛlɛka tonyaa?
9 Te o mɛɛndaŋ nya pɛ nyɛkɛndɛi, baa sɔɔŋ bɛnda niŋ pa a nya?
La nɔla pa mi la hui ndu mɛɛ nya hui wanachioo yɛ?
10 Te la chɔm pɛ o lahɔl maa le Mɛlɛka nya cho ni kɛ la cho le ndu le,O cho nya nyɛpalaa tusi choo.
11 Baa tɔɔmayɛi nduɛi tosa mi la nyiiya,Nduyɛ mi siooŋii bɛnduei bii nya le ndu le?
12 Sɔɔŋ fondoŋ sɔɔŋ taasiŋ* nya dimi woŋ cho ni.Sɔɔŋ nya dimi le fulaŋndo leniŋndoŋ cho ko maa kpaki nda taŋgul a puuloo wo.
13 La mei doŋ mi soo.
Nyɛ o nyɛ nɔ pɛ le ya yɔŋnɔŋndo, o yɔŋnuŋ.
14 Le yɛɛnɛ mi lueinuŋ yapila o kpundɔɔ niŋ,*Nduyɛ mi pisul a yoomu nuu?
15 O yɔŋ bɛɛ mbo dii ya, I cho chum.I cho ndu lasisi o hɔl mi chɔm ndu maa I tɛɛmbuu isɔɔ le.*
16 O cho simnɔŋ wana ni piŋiaa.Kanifuule, wanaa sina Mɛlɛka le wa hiŋ naa ndu chua le.
17 La yaŋ nilaŋ nyɛkɛndɛi o diomnda ya cho dimioo laŋ,Nduyɛ mi la tuei diomnda cho ya wa fulaa o sondo laŋ.
18 I bɛɛndiaŋ niko le mi chɔm ndu bahawɛi nuu.Kanifuule, I sina maa I tɛɛmbuu isɔɔ le.
19 Nɛɛnɛ nɔla yɛ mbo chiŋalaŋ ya?
Te I meinuŋ pɛ, I cho wu.*
20 Oo Mɛlɛka, sɔɔŋ ŋ muuŋ ya yeema ni ma tosal la,*Le halikpeŋ I nɔla mi veŋnuŋ num te.
21 Faŋa ya ba num lusulɛi bɛndoo choo,Nduyɛ tosa mi siooŋii numnde bii ya le.
22 Veelu ya mi muli num diom,Ɔɔ te I soo pɛ, num muli ya diom.
23 Ɔɔ biondɔŋnda nilaŋ a hakila nilaŋ?
Chɔm ya naa ya benduŋ mi tosa hakioo wa.
24 Le yɛɛ ŋ viŋ yɛ ya hɔlaa numnda,Nduyɛ ma siiŋguu ya yaamɔɔnɔ numndo?
25 Ya cho hoo maa peele vesɛile hueiye kuaŋnuŋ, nduyɛ mi wa vɛlɛ maa ifueeŋ ndo,Le yɛɛ ŋ cho yɛ ya siooŋnde lueiyo ma nyaanuŋ ya kɔɔli?
26 A cho sɔɔŋ wɔɔŋ ŋ cho ya hɛɛnduuwo choo woŋ poonyiaa o yau choo,Nduyɛ ma tosa mi wa saŋgaa le hakila ya tosa o feleŋgɔyɛi nii niŋndaŋ.
27 A baŋ ya peloŋ o kpiɔɔ,Ma wa ya hɔlteŋ keeliaa kɔɔli le biondɔŋnda nilaŋ saalɔŋndo.Nduyɛ ba o ba ya hiou pɛ, a mɛɛndaŋ peluŋ nuŋ.
28 Mɛɛ nyɔɔ sia nuaa yɛ wanachioo* sia ni,Nduyɛ mɛɛ kaaŋguaa dia nuaa kolaa ma siɔŋi ndu yɛ, lende o sia ni.
Tɛɛsiaalaŋ
^ Ɔɔ “loonaŋ.”
^ Hibuluiye, “Le yɛɛnɛ mi kuɛ a dialuŋ nuŋ o ŋchiŋ.”
^ Ɔɔ “mi soo le di nuu.”
^ Ɔɔ naapum, “Te waŋndo chiŋalaŋ ya pɛ, I cho meinuŋ nduyɛ mi vi.”
^ Hibuluiye, “Sɔɔŋ ŋ muuŋ kinɛi ŋ tosal la le ni.”
^ Hibuluiye, “o,” naapum Choobu.
