Choobu 15:1-35
15 Mi Ɛlifaasi Tɛmanaitiinɔɔ dimi aa:
2 “Baa wana taasioo muli pa suɛi maa diɔm?Baa o pei pa dembe ndɔɔ a hueiyii fula ba paaleŋ le chaŋ ndo ve?
3 Waŋndo silaa a diomnda yɔŋaalaŋ, la mala ndu le.Nduyɛ suɛi o ndu lo kinɛi chuu ndu tɔnɔ le.
4 A nɔ lɛ isiooŋ le Mɛlɛka le,Nduyɛ a buulaŋ ndɛ a sɔɔŋ cho a Mɛlɛka okɔɔ woŋ te.
5 Nyɛ ŋ dimi wo bɛɛ cho chɔmndo biondɔŋnda numndaŋ,Nduyɛ, sɔɔŋ kaŋgalaŋ ŋ cho hɛlioo ni le dimioo.
6 Numpila pɛɛsaŋ ni, kɛ o cho ya le.Numpila kiluluŋ yamɛi ni.
7 Baa num cho wana tase veluŋ o chieeŋndo choo wo ni?Ɔɔ a veluŋ fɛlɛŋ tuupa mi pemboŋ wa?
8 Baa ma yaŋ pa sɔɔŋ sɔɔsɔɔ Mɛlɛka woŋ nilaŋ?Ɔɔ baa num koni nɔ taasioo ni?
9 Yɛɛnɛ ŋ sina yɛ naŋ sina le?
Yɛɛnɛ ŋ bii yɛ bila naŋ bii ndu bila le?
10 Wanaa yuuwa nduyɛ ma nɔ yuluŋnde wa cho naa tɛɛŋ,Puaa chuu finya num o kɔɔ wa.
11 Baa diomnda kɔl dɛɛniaala Mɛlɛka laŋ,La naŋ cho num ndaŋ dimullo laŋ la cho letuu le num te?
12 Le yɛɛ kɔl numndo cho yɛ num huiyo,Nduyɛ mi hɔlla wa num nuaa ŋama ŋama?
13 A dɔɔnuŋ tumbe a Mɛlɛka pila,Nduyɛ ma wa diomnda wɔɔŋndaŋ soliŋndo o sondo.
14 Yɛɛ wanachioo cho yɛ le mbo chɔm maa o cho o diandaa?Baa wanachioo nɔla pa mbo dimi maa o cho sakpo?
15 Mɛlɛka laalaŋ maalikɛiyaa nduaa le,Nduyɛ choo choo bɛɛ dindu ndu o hɔl te.
16 Vɛɛ o tiindaŋ yɛ niko wana dɛnɛ wɔɔŋ tosa sɔɔŋ nɔɔlɛiyoŋ ndo,Wana nɔ yeemɛi le suɛi wɔɔŋnde tosaa, mɛɛ kolɔɔ bii nuaa waŋndo yɛ?
17 Yaŋ ya nilaŋ mi chɔm num,
Nduyɛ mi dimul num sɔɔŋ ya che niŋ ndoŋ!
18 Sɔɔŋ wanaa kɔl kaluaa pɛɛku finyaa ndaa o ba woŋ,A viŋ muŋ te.
19 Nda kinɛi wa ichali o lɛŋii ndɛi choo ni,Miallo bɛɛ ndoo kei nda tɛɛŋ te.
20 Wana dɛnɛ wɔɔŋndo ndu, teleŋ o teleŋ nyɛpalaa wa ndu choo.Yoomu ndɔɔ kpou o saŋgaa niŋ o wa ni.
21 Sɔɔŋ ŋsiooŋndoŋ chuu ndu o lani le.Nduyɛ a teleŋ kɔl nyuloo, mi wanaa dɛnɛ wɔɔŋnda del ndu choo.
22 O laalaŋ pɛŋ maa o hialuŋ niŋ o nyɛpalaa* niŋ te.Nduyɛ a cho ndu diyɔɔ a muɛi faŋnde.
23 Mbo keeliaa balaŋ le nyɛdiaa,* kɛ o sɔla ndu le.
Kanifuule, o sina niŋ maa paale nyɛpalaa nɔ le ndu komallo leŋ le cho niŋ kpɛɛluŋ.
24 Siooŋnde cho hiouwɔɔ lachi a ndu biyɔɔ le sɔɔŋ kɔl tambɛiyoŋ vɛlɛ a saŋga cho ndu wa choo wo.Siooŋii bɛnduii wa ndu niŋnde wa niŋ ko mɛɛ masa kpaaya bɛndoo huŋ nuaa waŋnda chiŋalaŋndo a sɔŋgɔɔ yɛ.
25 O heelu ba ndɔɔ le Mɛlɛka simullo,Nduyɛ mbo kindiŋ le Mɛlɛka Kpaaya Kpou Kpou Wo chiŋalaŋndo.*
26 Mbo kuel ndu a bolle kala sululu,A boo bɛndu kala kala puaa chɔuwa.
27 O luɛi yoŋgaa,Nduyɛ mi sul ndɔɔ tosa mbo chelul.
28 O chieeŋ bɛnduŋ nɔ le tambei sɔlaa woŋ niŋ chalta ndɔlaŋ la cho ni,O chiɛila wana o wana ve niŋ te laŋ niŋ.La cho hunɔɔ simnɔŋ bembelaŋ, mɛɛ nda dii nuaa poutaŋ naapilɛ yɛ.
29 O simnuŋ niŋ wana sulaa le, nduyɛ nyɛ ndɔ sɔlaa henduŋ niŋ lechoo le,Kɛlɛŋgaa niŋ te mi nyɛm ndɔŋ kiɔɔŋ pɛŋgɛlaŋ o lɛŋndeŋ choo.
30 O heluŋ niŋ o nyɛpalaa niŋ te.O wa niŋ ko mɛɛ yiŋndeŋ le veesiaa nuaa lɛuvii kandu niŋ puiyo ve yɛ.*Nduyɛ te Mɛlɛka* yoomu pɛ fuu, o cho lo pɛ.
31 O hui ndupila, mbo dɔu tiindaŋ ndɔɔ o nyɛm fondoŋ niŋ te.Kanifuule, fulamakɔɔli o cho sɔla wo cho sɔɔŋ fondoŋ ni.
32 I cho ndu suŋ yɔŋnɔŋ,Nduyɛ fɛɛŋ bɛɛ lɛuwuŋ ndɔŋ pui lɛ le.
33 Mɛɛ yɔm makilepiiyo hiiluŋ nuaa mi kilepiima piiyaŋ ma deli yɛ, lende o cho wa ni.Nduyɛ mbo wa vɛlɛ mɛɛ peeŋgelaŋ la deli nuaa o yɔm ɔlifiiyo yɛ.
34 Wanaa sina Mɛlɛka le wa sɔla fulamakɔɔli kɛndɛ le,Nduyɛ mi yiŋndeŋ le tɛɛmbuu tɛndiila wanaa bii luɛiyɔɔ niŋndo wa.
35 Sɔɔŋ wɔɔŋndoŋ nda yiyaŋ choo lɔɔlɔɔ ni, nduyɛ ma tosal acheleŋnda dɛnɛ wɔɔŋndo.Sɔɔŋ lakafaŋ nda tuunuŋ o lakɔl teleŋ o teleŋ ni.”
Tɛɛsiaalaŋ
^ Hibuluiye, “nyumndaŋ.”
^ Hibuluiye, “beediiyo ɔɔ buloo.”
^ Ɔɔ “yomɔɔ.”
^ Koŋ cho ni, tiindaŋ kɛ kɛ o nɔ le pioŋɔɔ sɔlaa.
^ Hibuluiye, “O.”
