Choobu 16:1-22
16 Mi Choobu dimi aa:
2 “I tuei niŋ sɔɔŋ waa nuaa paandu teleŋnda bɔɔbɔɔ.
Kɛ yɔŋii nya dɛɛniaa ya kɔllo yɛ, mi la wa ya chɔɔloo nyɛpalaa tusioo choo!
3 Diomnda fondolaŋ dimioo la cho hunɔɔ mɛɛlu.
Lelaŋ, yɛɛ nyindu yɛ num ma wa suɛi o ya lo o nɛi waa nuaa choo?
4 Ya bɛɛ yaa tiuba mi soo o nya lo mɛɛ nya cho suɛi nuaa yɛ.
Te nyaa wa pɛ o nyɛkindilaa* ya cho niŋndo,Ya bɛɛ I wa sɔɔŋ wɔɔŋndoŋ dimi a nya okɔɔ,Nduyɛ mi yaa lɔɔ bolleŋ dɛ dɛ.
5 Kɛ, I wa nya yoomuaŋ luei a diomnda ya wa nya dimul taŋ.Nduyɛ diomnda nilaŋ la wa nya kɔllo dɛɛniaa, mi nyaa sɔla malaa.
6 Te I soo pɛ, nyɛ ni nɛiyaa feŋaŋ niŋ lechoo le.Nduyɛ te I meinuŋ pɛ, baa keŋ faŋa niŋ nyɛ ni nɛiyaa?
7 Mɛlɛka mal la o saŋgaa niŋ,Nduyɛ mbo tusi yuŋgu nuu* nyɛpalaa choo.
8 Nyɛpalaa o tusi ya choo wo, acheleŋnda bɛɛ cho ndu chɔɔ.Nduyɛ nyau ya nyau sɛɛŋ ndo bɛɛ cho seileŋ timbioo a ya okɔɔ.
9 Kɔl ndɔ tuuwo chuii ya mululu, nduyɛ mbo kɛsiŋ sɔɔŋ nuŋ o kɔl.
Te o che ya pɛ, o sɔm chiŋndoŋ a tumboo,
Okoŋ mbo tofa ya siaŋalaŋ naŋ chaa yaamɔɔnɔ ndɔɔ ni.
10 A cho sondola ndalaŋ kumbioo le ya miolɔɔ.A simul la kunda bɛndoo,Ma wa ya kpaŋndoŋ lɔɔ.
11 Mɛlɛka mal la puaa feleŋguaa o ba,Nduyɛ o mal la wanaa dɛnɛ wɔɔŋnda o ba.
12 Kpundɛ o kpundɛ ve ya choo le, kɛ mbo tusi ya ndu choo, mbo chuii ya mululu.O saa ya kɛsei mbo wɔɔchiaa ya,Okoŋ mbo handu ya hɔlteŋ kɔɔli le ya nyɛpalaa tusioo choo.
13 Puaa nduaa wuu chiŋuaŋ nda balu ya silɔ.O buuluu ya kɔl keluŋ nuŋ, nduyɛ mɔnɛi bii ndu le.O pɛl la loloo niŋ, mbo vaiyiaa ndu lɛŋ siaa.
14 O cho ya buuluuwo teleŋ o teleŋ mɛɛ nda buuluu nuaa kpakioo yɛ.O cho ya hinullo sululu maa kuubanɔ chɔu.
15 I sɔndu nyɛla labɛkilaŋ le paala nilaŋ kumbɔɔ,Nduyɛ mi kumbu bɛɛle nileŋ* o chundoo niŋ.
16 Hɔltaŋ la diu ya yɔɔ a chaŋndo,Nduyɛ mi nyumndaŋ* ma tual la o hɔl kpiŋgbi,
17 Mi che bɛɛ bala nilaŋ la cho o sɔŋgɔ niŋ te,Nduyɛ piɛile nileŋ le cho walaŋ.
18 Oo lɛŋndeŋ, yandii viaŋ kooma niaŋ te!
Tosa mi ma chaŋ le ya!
19 Suŋ suŋ bɛɛ, sei nuu cho o choo choo niŋ.O fondaŋ filioŋndo wana timbi seileŋ a ya okɔɔ wo cho ni.
20 Mi chaaŋaa niaa mam ya,Te I wa pɛ chaŋndo o Mɛlɛka lo mi mɛmiaŋ ma tol la.*
21 Maa waŋndo luɛi naa tɛɛŋ naa Mɛlɛka,Mɛɛ waŋndo luɛi nuaa waŋndo tɛɛŋ nda chaaŋ ndɔ yɛ.
22 Wɔsila nilaŋ la lo lɛ la bɔɔ le,Nduyɛ I cho lakɔŋnɔŋ naa wana kua a miiŋgu lɛ le wa.
Tɛɛsiaalaŋ
^ Ɔɔ “yoomu.”
^ Ɔɔ “wanaa cho a ya latulu wa.”
^ Ɔɔ “yoomuma niaŋ.” Hibuluiye, “lioo.”
^ Ɔɔ “nyumma piɔmndaŋ.”
^ Ɔɔ naapum, “mi luaŋ ma kiolu ya o hɔl.”
