Choobu 17:1-16
17 “I nɔ lɛ mayoomu kposoŋ te. Sɔŋgɔ wana vilɛi ko ya cho niŋ ni.Sɛiyo kinɛi cho ya niŋ chumndo ni.
2 Wanaa mamaa balu ya silɔ.Nduyɛ lepaa o lepaa, I cho nda chɔɔ sɔɔŋ nila kaloŋ tosaa.
3 Yandii chuel la buŋgɛi maa a cho ya toolu.
Mi nɛɛnɛ cheleŋ ya tiindaŋ yɛ le ya malaa?
4 A soli nda sinapɛŋgoo o kɔl.Le sabu koŋ ŋ tosa ni a fula tɔɔ le.
5 Mi waŋnda haa yɔŋguŋ le chaaŋaa ndaa nyɛm ndaŋ kioo,Kɛ mi hɔltaŋ la yɔŋnuŋ chuauwaa ndaa yifidii a yiaaŋ.
6 Mɛlɛka siiŋguu ya nyɛ mamaa* waŋnda tɛɛŋ,Nduyɛ mi simnuŋ wana nda tufu lɔluaŋ choo wo.
7 Hɔltaŋ la yɔŋnuŋ ya yifidii a nyɛpalaa.Bala nilaŋ a peluŋ nuŋ cho ko maa lewundu.
8 Te wanaa cho sakpo wa che hei pɛ, mi kɔndɔfillo bii nda,Nduyɛ mi wana tɛɛmbuu isɔɔ le wo tambu kɔl a wana sina Mɛlɛka le wo.
9 Wana cho sakpo wo feŋaŋ o sandii nduɛi choo le,Nduyɛ mi wanaa bala ndalaŋ la cho o sɔɔŋ wɔɔŋ niŋ te wa kindiŋ kpoke le hiouwɔɔ lachi a sɔɔŋ kɛndɔŋ tosaa.
10 Kɛ nya kpou, la huŋ mi la hiou lachi a ya chiŋalaŋndo a sɔɔŋ nyaŋ.Kanifuule, I seeluŋ ndɔ wana taasioo o pilɛ bɛɛ nya tɛɛŋ te.
11 I nɔ lɛ teleŋ bɔɔ le waa yoomu le.Tuula nilaŋ, a yeemaŋ cho ya o kɔl loŋ kpou chuu laasiaŋ.
12 A cho hiouwɔɔ lachi a nyumndaŋ siiŋguuwo paaleŋ,Nduyɛ ma wa dimioo aa, ‘Nyɛ teŋgaa cho niŋ kpɛɛluŋ, kanifuule nyumndaŋ ma cho.’
13 I cho chum le teleŋ biŋgi, okoŋ mi Sɛiyo* wa niŋ chalta nilaŋ.I cho fondaa bɛɛndiaa loŋ le waa luaŋ o nyumndaŋ niŋ.
14 I cho sɛiyo* dimul aa, ‘Num cho finya nuu ni!’
Nduyɛ mi dimul chaa aa, ‘Nya cho kala nuu a yema nuu ni!’
15 Mɛɛ kuɛɛnɛ tiindaŋ nuu cho yɛ?
Nɛɛnɛ nɔla yɛ mbo yiyaŋ maa I nɔ wɔ tiindaŋndo?
16 Tiindaŋ ni koŋ cho lakɔ o Sɛiyo* niŋ,Boondii naŋ kua niŋ latulu o chundoo niŋnde.”
Tɛɛsiaalaŋ
^ Hibuluiye, “taloo.”
^ Ɔɔ “Siɔl.” Koŋ cho ni, sɛila waŋnda chieeya kpou. Tofa Tɛɛsiaa.
^ Ɔɔ “sooŋndo.”
^ Ɔɔ “Siɔl.” Koŋ cho ni, sɛila waŋnda chieeya kpou. Tofa Tɛɛsiaa.
