Choobu 19:1-29
19 Mi Choobu dimi aa:
2 “Le vɛɛ kpɛ nya cho yɛ hiouwɔɔ lachi a ya* kɔllo tɛɛmbuuwo,Mi la dimul la diomnda wɔɔŋndaŋ?
3 Le bɛmbɔɔ niŋ tɔ la cho ya yioulaŋ,Nduyɛ siɔmbula cho nya le biyɔɔ wɔɔŋ nya cho ya wo le.
4 Te o yɔŋ pɛ maa biondɔŋndo ya tosa ni,Mɛɛ haki nuu waŋnuŋ ya choo.
5 Te la hiou pɛ lachi a chɔmndo maa la cho a sɔvɛ mbo hiau ya,Nduyɛ mi la wa dimioo maa nyɛpalaa cho ya choo wo chaa ya komal,
6 Mɛɛ la sina pɛŋgu maa Mɛlɛka tosal la kafalaŋ ni,Nduyɛ mi hau o yaŋɔɔle ndɔleŋ niŋ.
7 I cho hiouwɔɔ lachi a chaŋndo le nyɛ nɛiyaa cho ya choo wo, kɛ wana cho ya saalaŋ te.Nduyɛ mi wa hiouwɔɔ lachi a chaŋndo le malaa, kɛ a cho ya chaa biyɔɔ le.
8 O kinda nɛi nuu a kpaki lapouwo, nduyɛ I tiu lɛ ba le hiouwɔɔ le.O tusi nyumndaŋ kpiŋgbi o nɛila ya kei laŋ.
9 O tosa waŋnda nɔ lɛ lebɛɛ le ya le,Nduyɛ mbo faŋa ya mɔsil lemasaa o lebol.
10 O lo ya yimi yimioo haaa mi wu pɛ,Nduyɛ mbo suŋgu tiindaŋ nuu mɛɛ nda suŋgu nuaa yɔmndo yɛ.
11 O tuulu kɔl a ya,Nduyɛ mbo chua ya maa yaamɔɔnɔ ndɔ.
12 Puaa nduaa chɔuwa chuuŋgiaŋ ma huŋ balu tɛndii nuu,Okoŋ ma bii ya.
13 O tosa mi puaapiliaa niaa kuaŋnuŋ landaŋ a ya,Nduyɛ mi wanaa sina ya wa mulul la kɔɔ.
14 Chaaŋaa niaa kpɛɛluŋnda* holnuŋ lɛ ya le,Nduyɛ wanaa yaa sina nyɛkɛndɛi ya bɛɛ puɛɛnuŋ a ya.
15 Wanaa ya yiya o ya lo chiɛiniŋ nda a buɛiyaa niaa laanduaa bɛɛ chua ya niŋ maa mial,Maa wana lekaa wo koni ya cho niŋ nda o hɔl ni.
16 Mi veelu buɛi nuu, nduyɛ mi nyɔɔlu ndu le mbo tuiinuŋ ya inyiɛɛ,Kɛ o mulul la le.
17 Mi hueiyii ya yoomu ve bɛɛ paaliaŋ niŋ laa nuu.Puaapiliaa niaa* bɛɛ yeema lɛ ma sɔɔŋguu ya ikɛi le, kanifuule I cho chuŋ wɔɔŋndo.
18 Chuaambuaa pɔmbuaa bɛɛ tul la niŋ leyɛ.Te I chɛŋ pɛ, a kandu ya mamɔɔ.
19 Chaaŋaa niaa kpɛɛluŋnda bɛɛ tul la leyɛ,Nduyɛ wanaa yaa kaala tau wa mulul la kɔɔ.
20 I nɔ lɛ ŋdial te. I simnuŋ niŋ paalaŋ kposoŋ.Ndoo lo niŋ chobe mi yaa sɔla piɔmndo.
21 La tuiinuŋ ya inyiɛɛ chaaŋaa niaa, la tuiinuŋ ya inyiɛɛ.Kanifuule, Mɛlɛka pila tusi ya nyɛpalaa choo ni.*
22 Le yɛɛ nya cho yɛ hiouwɔɔ lachi a ya nyɛpalaa tusioo choo, mɛɛ Mɛlɛka tusi ya ndu choo yɛ,Nduyɛ mi la wa tuŋ hiouwɔɔ lachi a ya chiŋalaŋndo?*
23 Ndoo bɛnda bɔɔ mi ndaa poonyiaa diomnda ya dimi laŋ,Nduyɛ mi ndaa dɔu laŋ o yau choo.
24 Ndoo bɛnda bɔɔ ma tuuliaa laŋ o pouwo choo le mi la wa loŋ lefafɛɛŋ,Ma poonyiaa laŋ a kpɛkile ichiliŋndeŋ, vɛlɛ a liiye.
25 I sina walaŋ maa wana ni piŋiaa* cho yoomu.O mɛɛlulaŋ kpɔŋ, o cho hunɔɔ mbo huŋ sim o lɛŋndeŋ choo.*
26 Mi che bɛɛ mi dialloŋ tambu ya ni,Kɛ I cho lo a dialloŋ muŋ mi che Mɛlɛka.
27 Yapila kɛsɛ cho ndu chɔ ni.I cho ndu chɔ a lehɔl pɛɛŋ, o cho wana cheleŋ te cho ndu chɔ le ya le.
Kɛ dialuŋ nuŋ kpou yɔkpa niŋ bɔɔ.*
28 Kanifuule la cho dimioo aa, ‘O nɛi kuɛɛ choo naŋ cho yɛ ndu nyɛpalaa tusioo choo?’
Naŋ chaa yapila kɛsɛ tosa ni mi wa o bahawɛiyo hoo niŋ.
29 O bɛnda mi la nɔ siooŋnde le muɛi faŋnde,Kanifuule, mi muɛi faŋnde tusi wanaa tosa sɔɔŋ wɔɔŋndoŋ nda nyɛpalaa choo.La sina maa wana kialaa ŋyamaa cho.”
Tɛɛsiaalaŋ
^ Tofa Tɛɛsiaa.
^ Ɔɔ “Wanayaŋ nuŋ.”
^ Hibuluiye, “Puaa dembe nuu.” Koŋ cho ni, dembe velu ya wo (dembe kala nuu)
^ Hibuluiye, “Mɛlɛka pila pilaŋ ya a bala ndɔlaŋ ni.”
^ Hibuluiye, “Nduyɛ la hini kɔl a dialuŋ nuŋ te.”
^ Ɔɔ “baŋaa.”
^ Hibuluiye, “o chundoo choo.”
^ Ɔɔ “kɔl keluŋ nuŋ tambu ya niŋ.”
