Choobu 2:1-13
2 Okoŋ kɔɔli, paale pilɛ vɛlɛ, mi maalikɛiya* kɔ sim Chɛhowa lachi, nduyɛ mi Setana bɛɛ luɛi nda tɛɛŋ mbo kɔ sim Chɛhowa lachi.
2 Okoŋ mi Chɛhowa nyuna Setana aa: “Kuɛɛnɛ ŋ wa yɛ?” Mi Setana mulul Chɛhowa aa: “I wa balɔɔ o lɛŋndeŋ choo, nduyɛ mi wa leŋ mɛɛndaŋndo.”
3 Mi Chɛhowa nyuna Setana aa: “Ma cha pa buɛi nuu Choobu?* Wana o wana cho o lɛŋndeŋ choo maa ndu le. O cho sakpo, nduyɛ mbo chɔm lo lechoo wo o ya lo. O nɔ siooŋnde le ya Mɛlɛka, nduyɛ o tul o wɔɔŋndo leyɛ. O cho wɔ hiouwɔɔ lachi a lo lechoo ndɔɔ chɔmndo, mi che bɛɛ ma kindiŋ le ya nyindɔɔ le mi tɛɛmbuu* ndu o fondo fuuwo choo.”
4 Mi Setana mulul Chɛhowa aa: “Wana o wana buulaŋ a ndupila okɔɔ.* Mi waŋndo yɔŋgu nyɛ o nyɛ o nɔ, le yoomu ndɔɔ baŋaa.
5 Kɛ siɛndi wɔ baa ma tusi ndu naa choo, a cho chɔ mɛɛ sɔɔŋ cho siŋgaŋ yɛ. O cho lasisi num o hɔl mbo yei num.”
6 Okoŋ, mi Chɛhowa dimul Setana aa: “Awa, I mal num ndu o ba! Yoomu ndɔɔ kinɛi ŋ pilaŋ te ni!”
7 Mi Setana faŋaŋ Chɛhowa o hɔl mbo kuaŋnuŋ. Mbo tosa mi hindɔɔla wɔɔŋ wɔɔŋndaŋ la fula Choobu, chɔŋ o peluŋ kɔlloŋ haaa o bolleŋ.
8 Mi Choobu chal o pultaŋ niŋ, nduyɛ mbo chua tɛndu kpɛɛnɛi piɔlɛi nda toosiaa a puuloo ve le nyɛɛsɔŋndo.
9 O mɛɛlulaŋ kpɔŋ, mi laa ndɔ nyuna ndu aa: “A cho wɔ hiouwɔɔ lachi a lo lechoo wo chɔmndo o Mɛlɛka lo? Yei niŋ Mɛlɛka ma vi!”
10 Kɛ mbo dimul laa ndɔ aa: “A cho ko suɛi mɛɛ waŋ laanduaa diomnda suaa yɛ. Baa sɔɔŋ kɛndɔŋ koni naŋ nɔ ni miŋ wa kɔl le mi Mɛlɛka tonyaa tosal naa, ŋ ve vɛlɛ ŋ wɔɔŋndo kɔl te?” A sɔɔŋ komal muŋ Choobu woŋ kpou, o dimi isɔɔ mbo tosa haki le.
11 Mɛɛ chaaŋaa yaawaa Choobu wa tuei a sɔɔŋ palaŋ komal ndu woŋ kpou, ma kɛɛsiaa le mi o kɛ kɛ mal fondaŋ ndɔɔ ma bɔɔŋiaŋ le ndu kɔllo dɛɛniaa. Chaaŋaa nduaa yaawaa kaŋ cho haa ni: Ɛlifaasi Tɛmanaitiinɔɔ, Bilidadi Siohaatiinɔɔ, a Sofaa Naamataitiinɔɔ.
12 A lo landaŋ ma cha ndu, kɛ a sina ndu le. Ma kandu chaŋndo choo choo kpeleŋ, nduyɛ ma sɛɛsiaŋ nyɛlaŋ lekɔɔ. A wa chundoo kɔndɔɔ ma wuu choo choo o hueiye niŋ nduyɛ ma duaunuŋ vɛlɛ o lebol.
13 Ma chal lɛŋ ndu ikɛi le palɛi i ŋɔmmɛu a nyumndaŋ ma ŋɔmmɛu. Nduyɛ waŋndo o pilɛ bɛɛ suu naa ndu chua le, kanifuule ma cha maa o wa bɔɔ o nyɛ nɛiyaa niŋ.
Tɛɛsiaalaŋ
^ Hibuluiye, “chuauwaa Mɛlɛka tonya.”
^ Hibuluiye, “Ma handu pa buɛi nuu Choobu kɔllo choo?”
^ Hibuluiye, “mel.”
^ Hibuluiye, “Yauwo le sɔŋgu yauwo.”
