Choobu 20:1-29
20 Mi Sofaa Naamataitiinɔɔ dimi aa:
2 “Suɛi cho ya bɔɔ palaa, nduyɛ I saŋga niŋ a biuwɔŋndo,Le sabu koŋ ya cho suɛi ni.
3 A yei ya o sɔɔŋ ŋ dimi woŋ niŋ,Nduyɛ nyɛ ŋ dimi mi bii bila wo tosa ni mi wa num mulullo.
4 I sina kɛsɛ maa numpila bɛɛ a sina a hei okɔɔ maa,Chɔŋ a teleŋ Mɛlɛka toosiaa wanachioo* o lɛŋndeŋ choo wo,
5 Kɔl kɛndɛ wana dɛnɛ wɔɔŋndo ndu, le teleŋ biŋgi koni o cho ni,Nduyɛ kɔl kɛndɛ wana sina Mɛlɛka le wo* bɛɛ bendu le.
6 O wa bɛɛ o bɛndu mbo fuuluu o choo choo niŋ,Nduyɛ mi bolle ndɔleŋ le fuuluu o halaa niŋ,
7 O cho hunɔɔ tambei sɔla lefafɛɛŋ, mɛɛ poola ndɔlaŋ la sia nuaa mi la lo yɛ.Nduyɛ wanaa ndaa cha ndu paandu wa cho wa nyunaa aa, ‘Kuɛɛnɛ o cho yɛ niŋ?’
8 A cho keleŋa puɛɛnɔŋ a ndu okɔɔ, mɛɛ wana sɔl nuaa luaŋ yɛ.O kuaŋnuŋ niŋ, mɛɛ wana cha nuaa yilaŋnde ichɔl lɛ.
9 Wanaa ndaa cha ndu paandu wa ve lɛ niŋ ndu chɔ le,Nduyɛ fɛɛŋ bɛɛ o miiŋgu lɛ niŋ o ndu lo chiɛiniŋ te.
10 Chuauwaa nduaa nyuna niŋ wanaa bala fonduaa le malaa.Ndupila cho chua nyɛsɔlaa o bii waŋnda o ba wo mbo miŋgi nda o ba.
11 Paala ndɔlaŋ la cho la kala poŋ mɛɛ o wa o feleŋgɔyɛi nduɛi niŋ yɛ.Kɛ a kalu koŋ kpou, o cho wu ma yambu ndu o sɛiyo* niŋ.
12 Te nyɛ wɔɔŋndo yeela pɛ ndu o sondo,Nduyɛ mbo veŋ nyɛ koŋ o diɔɔmule ndɔleŋ bɛŋgu.
13 Te o manda ndu pɛ o sondo mbo mil te,Nduyɛ mbo kɛsiŋ ndu o sondo kpiŋ,
14 Nyɛdiaa ndɔɔ cho ndu vaala o sondo.O cho simnɔŋ maa lolo yɛlɔɔ ndu o ŋdial.
15 O mel sullo, kɛ o cho ndu kuisi.Mɛlɛka cho ndu ndu soli o dembe.
16 Lolo yɛlɔɔ o cho wa kolɔɔ ni,Nduyɛ diɔɔmule hɔɔlɔɔ le cho ndu diyɔɔ ni.
17 Liaaŋ a milikiima* choŋnuŋ ma hɔbɛi maa mamɛŋ ndaŋ,Fɛɛŋ bɛɛ o tui lɛ maŋ yeela le.
18 Nyɛm kɛndɛŋ o chuuŋgiaa woŋ, o cho muŋ miŋgi, o di muŋ niŋ te.*Nduyɛ sul o sɔla o yulale ndɔleŋ niŋndo, o di ndu niŋ tɔnɔ le.
19 Kanifuule, o saaŋgiaa wanaa bala fonduaa, nduyɛ mbo mal nda.Mbo poonda chiɛi o teŋgul te wo.
20 Kɔl nyulu bɛɛ o nɔ niŋ te,Nduyɛ sul ndɔɔ mala ndu niŋ mbo hɛluŋ te.
21 Nyɛ o nyɛ lo le mbo kɛɛ ndu tɛɛmbuu le.Le sabu koŋ sul ndɔɔ viu kposoŋ te.
22 Teleŋ sul ndɔɔ cho deŋgelaŋ ndo, buulaŋ bɛndoo cho ndu piɔ o kɔllo niŋ cha,Nduyɛ mi sɔɔŋ wɔɔŋ o ve kɔl te woŋ wa ndu komallo.
23 Teleŋ o dia nuaa mbo pim cha wo,Mɛlɛka* cho ndu kɔl ndɔ tuuwo tusi choo.Sɔɔŋ wɔɔŋndoŋ cho ndu wa komallo mɛɛ piɔɔ sia nuaa yɛ.
24 Te o nyaanuŋ pɛ nyɛm chɔu ŋchiliŋndoŋ,Chiŋɔma nda toosiaa a chiliŋii siaŋɛi yaŋ* ma cho ndu viɔ ni.
25 Te o suŋgu pɛ chiŋɔle cho ndu leŋ baŋnɔŋ o kɔɔ leŋ,Chiŋɔle siɛɛmbiaa leŋ le cho ndu loloo buli,Nduyɛ mi siooŋii bɛnduei bii ndu.
26 Sulta ndɔlaŋ kpou la cho wa o nyumma bɛnduaŋ niŋ,Nduyɛ mi yiŋnde wana sɛndi le leŋ le tɛɛmbuu ndu.Kpundɔɔ cho wanaa cho lo o tɛndii ndɔɔ niŋnda chum.
27 Choo choo cho hakila ndɔlaŋ chɔɔmuu,Mi lɛŋndeŋ le simul ndu.
28 Paale Mɛlɛka cho dɔɔnɔŋ tumbe leŋ,O cho tosa mi mɛŋma koŋgi bɛnduaŋ ma hiŋ, nduyɛ mi ma hiou a chiɛi ndɔɔ.
29 Nyɛ Mɛlɛka paawa* wana dɛnɛ wɔɔŋndo wo cho hoo ni.Nyɛm kɛŋ Mɛlɛka kɛɛsiaa le ndu woŋ cho muŋ ni.”
Tɛɛsiaalaŋ
^ Ɔɔ “Adam.”
^ Ɔɔ “wana simul Mɛlɛka wo.”
^ Hibuluiye, “chundoo.”
^ Ɔɔ “nɔnɔ.”
^ Hibuluiye, “o mil muŋ te.”
^ Hibuluiye, “O.”
^ Ɔɔ “kapaa waŋ.”
^ Ɔɔ “sala.”
