Choobu 21:1-34
21 Mi Choobu dimi aa:
2 “La yaŋ nilaŋ nyɛkɛndɛi o nyɛ ya cho dimi wo.Hei tosaa nɔla mi i dɛɛniaa ya kɔllo.
3 La biunuŋ ya mi soo.Te I chii pɛ suɛi, la mam ya niko.
4 Baa o wanachioo lo ya cho ŋɔɔchiaŋndo ni?
Te ndoo wa lende pɛ, yaa nɔla pa mi yaa biunuŋ?
5 La mɛɛndaŋ ndɔ ya, kɔndɔfillo cho nya biyɔɔ,Okoŋ mi la handuŋ balaŋ o sondo.
6 Te I yiyaŋ pɛ a ndi okɔɔ, mi tambu kɔl,Nduyɛ mi dialloŋ kpou nyiiya ya.
7 Le yɛɛ wanaa dɛnɛ wɔɔŋnda viau yɛ yoomu,Ma yuuwa, nduyɛ ma sul* tau tau?
8 Chuauwaa ndaa chuu lɔɔlɔɔ le,Nduyɛ ma che chuauwaa mamaa o chuauwaa mamaa kɔɔli.
9 A choŋnuŋ hɛnɛkɛ o chiɛila ndalaŋ niŋ, siooŋii cho nda le.Nduyɛ, Mɛlɛka tusi nda nyɛpalaa choo a siooŋnde ndɔleŋ te.
10 Nauwaa ndaa towaa hel nauwaa ndaa laanduaa ma kɛɛ yoltaŋ chua le,Nduyɛ nauwaa ndaa laanduaa viikuu le.
11 Mi chuauwaa ndaa piaanduaa nyaanuŋ o bɛɛ, naŋ chaa saa kundaa ni,Nduyɛ mi chuauwaa ndaa wa pisultaŋ a kɔl kɛndɛ.
12 Ma soli chondoŋ, nduyɛ ma wa dundu pɔmbɔɔ lɔɔ vɛlɛ a towaa.Ma naŋ kɔl te a tuei pɛ waŋnda sɛŋndeŋ hɔŋndo.
13 Ma waŋnuŋ a kɔl kɛndɛ o yoomu ndaa niŋ,Nduyɛ ma kuɛ o Sɛiyo* niŋ o kɔl nyulu niŋ.
14 Kɛ ma dimul Mɛlɛka tonyaa aa, ‘Mal naa o ba naa choo!
Ŋ nɔ i yeema le miŋ sina nɛila numndaŋ te.
15 Nɛɛnɛ cho yɛ Mɛlɛka Kpaaya Kpou Kpou Wo le miŋ piɛi ndu?
Nduyɛ te ŋ sina ndu pɛ, tɔnɔ yɛɛ naŋ cho yɛ sɔla?’
16 Kɛ I sina maa a nɔ kpaaya sulta ndalaŋ choo le.
Yiyaŋ nuu choŋnuŋ teŋgeŋ a yiyaŋ* wana dɛnɛ wɔɔŋndo.
17 Le vɛɛnɛ bɛmbɔɔ lambui wana dɛnɛ wɔɔŋndo nyum yɛ?
Le vɛɛnɛ bɛmbɔɔ nyɛpalaa komal lɛ ndu?
Nduyɛ, le vɛɛnɛ bɛmbɔɔ Mɛlɛka tɛɛmbuu yɛ nda te o dɔɔnuŋ tumbe pɛ?
18 Baa a nɔla pa ma simnuŋ mɛɛ hueiye kuaŋnuŋ nuaa a billo,Vɛlɛ a mɛɛ hueiyii fuku fukuei kuaŋnuŋ nuaa a tɛfɛlaŋ yɛ?
19 Mɛlɛka cho chuauwaa wana dɛnɛ wɔɔŋndo nyɛpalaa tusi choo le sɔɔŋ wɔɔŋ finya nda tosa woŋ.
Maa Mɛlɛka tusi ndu dɛnɛ palaa choo, le mbo sina maa sɔɔŋ wɔɔŋndoŋ o tosa ni.
20 Maa ndupila chɔ tambii nduɛi a lehɔl pɛɛŋ,Nduyɛ mi Mɛlɛka Kpaaya Kpou Kpou Wo dɔɔnuŋ tumbe a ndu.
21 Te paŋguŋ ndɔŋ o nɔ le waa yoomu woŋ faŋaŋ pɛ lechoo,*Baa mbo buulaŋ pa le nyɛ cho koma yɔŋnɔŋ a yuŋgu ndɔɔ wo?
22 Wana o wana nɔla mbo pɛɛku Mɛlɛka taasioo le,*Kanifuule, ndu cho yamanɔɔ le wanaa cho filioŋ nda ni.
23 Mi waŋndo opum nɔ wɔ yoomuaŋ nyɛkɛndɛi,Mbo vi nyɛ o nyɛ ve ndu lepɛŋ te, nduyɛ siooŋii ve ndu le.
24 Mi lɔlula ndɔlaŋ la pɛ cha a chuɛiyaŋ,Nduyɛ mi paala ndɔlaŋ la kendu poŋ.*
25 Kɛ mi wana cheleŋ vi o nyɛpalaa bɛndoo niŋ,Nyɛɛmbuiinii bɛɛ o tui yoomoo yeela le.
26 Nda ŋiɔɔŋ kpou cho wu ma kumbu nda o sɛiyo* niŋ,Okoŋ mi chaa de nda.
27 I sina kɛsɛ sɔɔŋ nya cho yiyaŋndo a muŋ okɔɔ woŋ,A sɔɔŋ kaŋgalaŋ nya cho kɛɛsiaa le ya dɛnɛ wɔɔŋndo tosallo woŋ.
28 Mi la nyuna aa, ‘Kuɛɛnɛ chiɛi wana sulaa cho yɛ?Nduyɛ, kuɛɛnɛ tɛndii wana dɛnɛ wɔɔŋndo wa niŋndo cho yɛ?’
29 Baa kani bɛɛ la nyuna wɔ wanaa kela wa le?
Baa la pɛɛku wɔ nyɛkɛndɛi a nyɛ nda dimi wo okɔɔ,*
30 Maa te dɛnɛ palaa del pɛ, o piiliaŋ wana dɛnɛ wɔɔŋndo le,Nduyɛ mbo hɛluŋ o paale kpundɛ leŋ choo le?
31 Nɛɛnɛ nɔla yɛ mbo dimul ndu maa kaa ndɔɔ niŋ te?Nduyɛ nɛɛnɛ nɔla yɛ mbo paawa* ndu le sɔɔŋ o tosa woŋ?
32 Te a kuɛ pɛ a ndu o fondaŋ nda kumbu waŋvilɛiya wo,Waŋndo cho wa loŋ le waa sɛi ndɔɔ tofaa.
33 Puulu nda kumbu ndu wo cho ndu yelal,Nduyɛ mi waŋnda chieeya kpou tol ndu kɔɔli,Mɛɛ wanaa bɔɔbɔɔ vi ndu tase wa chuu chɔm te yɛ.
34 Mɛɛ le yɛɛ nya cho yɛ ya sɔɔŋ dɛɛniaa ya kɔl te woŋ dimullo?
Nyɛ o nyɛ nya cho ya dimullo, choolaŋ o cho ni!”
Tɛɛsiaalaŋ
^ Ɔɔ “sɔla kpaayaa.”
^ Ɔɔ “Siɔl.” Koŋ cho ni, sɛila waŋnda chieeya kpou. Tofa Tɛɛsiaa.
^ Ɔɔ “sila.”
^ Ɔɔ “tɛndaŋ pɛ tɛɛŋ.”
^ Ɔɔ “pɛɛku Mɛlɛka nyɛ o nyɛ le.”
^ Hibuluiye, “yoyoowaŋ o paala ndɔlaŋ niŋ ma cho hili hili.”
^ Hibuluiye, “chundoo.”
^ Hibuluiye, “tamaseliilaŋ.”
^ Ɔɔ “sala.”
