Choobu 22:1-30
22 Mi Ɛlifaasi Tɛmanaitiinɔɔ dimi aa:
2 “Mako yɛɛ Mɛlɛka nɔ yɛ a wanachioo?
Tɔnɔ yɛɛ o sɔla yɛ wana nɔ taasioo wo o ba?
3 Baa Mɛlɛka Kpaaya Kpou Kpou Wo buulaŋ pa* a sakpoyɛi numnde?Ɔɔ o sɔla pa tɔnɔɔ le mɛɛ ŋ cho lo lechoo wo chɔmndo yɛ?
4 Baa o cho num nyɛpalaa tusi choo,Nduyɛ mbo kuɛ a num o lemasa le mɛɛ ŋ nɔ siooŋii nduɛi yɛ?
5 Baa o cho le mɛɛ ŋ cho wana dɛnɛ wɔɔŋ bɛndu,Nduyɛ hakila numndaŋ la chuu chɔm te yɛ le?
6 A wa puaapiliaa numnda landoŋ biyɔɔ o ba o fondo fuuwo choo,Nduyɛ ma yuŋga waŋnda nyɛlaŋ lekɔɔ, ma mɛi nda kɔɔle fondo.
7 Wanaa wa o saŋgaa niŋnda, a ke nda mamɛŋ le kolɔɔ le.Nduyɛ wanaa wa a yiaaŋ nda, ma tuŋ nda nyɛdiaa.
8 Wanaa ndaa nɔ kpaayaa maa num nda sɔla lɛŋndeŋ tau ni,Nduyɛ nda koni sɔla dioo le waa lechoo ni.
9 Kɛ ma mal wanaa vii piaanduaa wa miiŋgoo bala fondo,Nduyɛ ma yimi yimi chuauwaa nɔ ŋ finya le wa* balaŋ.
10 Le sabu koŋ kpeekpei yaŋɔɔlaŋ* la cho num la balaa silɔ ni,Nduyɛ mi kpundɛla ŋ ve kɔl te laŋ la luei num siooŋnde.
11 Lelaŋ nyumndaŋ ma tol num nuaa o hɔl ni a nɔla ma che le,Nduyɛ mi mɛŋma koŋgi bɛnduaŋ ma kumbu num kpu.
12 Mɛlɛka cho filioŋ mbo hiau choo choo, lende le?
Looŋ o choo choo niŋ bɛɛ choŋnuŋ filioŋ.
13 Kɛ ma dimi aa: ‘Yɛɛ kpeekpei Mɛlɛka sina yɛ?
Baa o nɔla pa mbo kelu yamɛi o nyumma kpiŋgbiaŋ niŋ?
14 Te o wa pɛ balɔɔ o fondaŋ tiilaŋndo o choo choo niŋ,Yumbu yumboo cho ndu hɔlla kumbɔɔ o nɔla mbo che le.’
15 Baa a cho pa nɛi masindɔɔ tolɔɔ kɔɔli,O wanaa dɛnɛ wɔɔŋnda ndaa kua choo wo?
16 Waŋnda haa teleŋ ndaa nɔ le piɔmndo sɔlaa wo fuuluu le, ma basu nda tɛɛ,Mɛɛ mɛŋma koŋgi bɛnduaŋ ma* basu nuaa chiyii chiɛiyo, mi ma hiounuŋ a chiɛi kalaa yɛ.
17 A wa Mɛlɛka tonyaa dimullo aa: ‘Mal naa o ba naa choo!’
Nduyɛ ma dimi vɛlɛ aa, ‘Yɛɛ Mɛlɛka Kpaaya Kpou Kpou Wo tiu yɛ ba mbo tosal naa?’
18 Kɛ, ndu Mɛlɛka koŋ koni pei chiɛila ndalaŋ a nyɛm kɛndɔŋ ni.
(Ya I nɔ yiyaŋ dɛnɛ wɔɔŋ nda nɔ koŋ ndo le.)
19 Wanaa sakpuaa cho hei chɔ nduyɛ ma dɔɔnuŋ nyaale,Mi wanaa tɛɛmbuu isɔɔ le wa mam nda, okoŋ ma dimi aa:
20 ‘Yaamɔɔwaa naa sɔla tambei,Nduyɛ yiŋndeŋ le cho lomɔɔ nyɛm nda mɛi yoŋ.’
21 Kindiŋ ma sina Mɛlɛka, le ma wa o kɔl nyulu niŋ.Okoŋ, sɔɔŋ kɛndɔŋ kposoŋ cho num wa komallo ni.
22 Chɛl sawala ndɔlaŋ,Nduyɛ ma kɛsiŋ nyɛ sawalaŋ ndaŋ la dimi wo o kɔl.
23 Te a miiŋgu pɛ Mɛlɛka Kpaaya Kpou Kpou Wo o ibuŋ, a cho miiŋgu maa paandu.Te a soli pɛ sɔɔŋ wɔɔŋndoŋ o tɛndii numndo niŋ,
24 Ma viou kooliŋ numndoŋ o chundoo niŋ,Nduyɛ ma viou vɛlɛ kooliŋ fula Ofii woŋ o kpoloŋ cho o poutaŋ tɛɛŋndo niŋ,
25 Mɛɛ Mɛlɛka Kpaaya Kpou Kpou Wo cho simnɔŋ kooliiyoŋ,Vɛlɛ a kaniŋ humbuŋ kɛndɛ kɛndɔŋ le num.
26 Okoŋ, a cho hini kɔl a Mɛlɛka Kpaaya Kpou Kpou Wo.Hei cho num mala ma sɔɔŋguu* Mɛlɛka ikɛi, siooŋii bii num te.
27 A cho piɛi o ndu lo, mbo tuei num diom.Nduyɛ, ma peelu buŋgaŋ ŋ chua woŋ.
28 Nyɛ o nyɛ ŋ kɛɛsiaa le tosaa pɛ, a cho batiuwaa sɔla.Nduyɛ paŋgeloo cho wa diondɔɔ o nɛi numndo choo.
29 Te a soo pɛ a yoŋgaa, o cho num nyɛpalaa tusi choo.Kɛ mbo piŋi wanaa tusiaŋnda.
30 Mɛlɛka cho wanaa tɛɛmbuu isɔɔ le wa baŋa.Lelaŋ te bala numnda ve o sɔɔŋ wɔɔŋ niŋ te, mɛɛ a cho baŋaa sɔla.”
Tɛɛsiaalaŋ
^ Ɔɔ “nɔ pa yeemɛi.”
^ Ɔɔ “viiya.”
^ Hibuluiye, “yaŋɔɔla youwa.”
^ Hibuluiye, “pioo.”
^ Hibuluiye, “heelu hɔlla.”
