Choobu 23:1-17
23 Mi Choobu dimi aa:
2 “Hau bɛɛ, I cho wɔ hiouwɔɔ lachi a ŋɔɔchiaŋndo.Yoomuaŋ ma chuu ya fo a kɔl tambɛiyo.
3 Te yaa sina pɛ naa Mɛlɛka cho wa,
I wa lakɔ loŋ.
4 I wa lakɔ ndu bahawɛi nuu chɔm,Mi yaa dimul ndu maa I tɛɛmbuu isɔɔ le.
5 I wa nilaŋ yaŋɔɔ o nyɛ o wa ya dimul lo,Nduyɛ mi yaa kɛsiŋ suɛi o wa ya dimul le o kɔl.
6 Baa o wa pa kpaaya ndɔ bɛndoo soliŋ kpeku le ya chiŋalaŋndo?
Sako, o wa ya nilaŋ yaŋɔɔ.
7 O ndu lo wanaa sakpuaa kua a sɔɔŋ ndaŋ ni.Nduyɛ, wana ni kialaa ŋyamaa wa ya malɔɔ le mɛɛ ya tɛɛmbuu isɔɔ le yɛ.
8 Te I kuɛ pɛ ba paaleŋ le chaŋ ndo, I komal ndu loŋ te.Nduyɛ te I miiŋgu pɛ, I seeluŋ ndu le.
9 Te I kuɛ pɛ naa o cho wallo o ba miallo choo wa, I seeluŋ ndu loŋ te.Nduyɛ te I muliŋ pɛ o ba kɛndɔɔ choo, I chi ndu vɛlɛ loŋ te.
10 Kɛ o sina maa o nɛi kɛndɔɔ choo ya cho kɔlaŋ ni.
Te o chii ya pɛ tofa, I cho waŋnɔŋ maa koolii kɛndɛ kɛndɛi.
11 I cho nɛila ndɔlaŋ tolɔɔ kɔɔli nyɛkɛndɛi,Nduyɛ mi wa hiouwɔɔ lachi a kɔlaŋ lechoo.
12 I feŋaŋ o sawala o ke ya laŋ choo le.
I cho sawala ndɔlaŋ biyɔɔ mbo hiau bɛɛ mɛɛ o wa ya kɔl lɛ.
13 Te o kɛɛsiaa pɛ le isɔɔ tosa, nɛɛnɛ simul lɛ ndu?
Nyɛ o nyɛ o yeema pɛ le tosaa, tosaa o tosa ndu ni.
14 Nyɛ o nyɛ o kɛɛsiaa pɛ le tosaa a ya okɔɔ, o cho ndu tosa kpou.Nduyɛ, sɔɔŋ waa nuaa cho ndu o kɔl tau le tosaa.
15 Le sabu koŋ ya buulaŋ tau a ndu okɔɔ ni.Te I yiyaŋ pɛ a ndu okɔɔ, mi siooŋnde chɔɔlu ya biyɔɔ.
16 Mɛlɛka tosa mi kɔllo yɔŋnuŋ ya niŋ pulaŋ pulaŋ,Nduyɛ mi Mɛlɛka Kpaaya Kpou Kpou Wo luei ya siooŋnde.
17 Kɛ a koŋ kpou, I pɛŋgi suɛi le mɛɛ nyumndaŋ ma tol lɛ le,Mi che bɛɛ mi nyumma kpiŋgbiaŋ ma kumbu ya hɔlla kpu.
