Choobu 24:1-25
24 “Le yɛɛ Mɛlɛka Kpaaya Kpou Kpou Wo kɛsi paale ndɔle kɔɔsɔleŋ te?
Le yɛɛ wanaa sina ndu wa chi paaleŋ ndeŋ* te?
2 Mi waŋnda faŋa pɛŋgula lelɛŋndaŋ ma hivi laŋ lachi.Ma chiimbuu saa ma kuɛ a nda o bil nda puiyaa.
3 Chuauwaa nɔ lɛ ŋfinya le wa, ma poondiaa sofɛliaa ndaa a kaka,Nduyɛ ma bii nau wana lanɔ vii pɔnɔɔ wo o landei niŋ.
4 Ma kei wana bala fondoo nyindɔɔ le mbo faŋaŋ nda o nɛi,Mi wanaa nɔ wanaa malaa o lɛŋndeŋ choo le wa veŋnuŋ nda.
5 Mi wanaa bala fonduaa nuuviaa nyɛdiaa le dioo, mɛɛ sofɛliaa yonduaa nuuviaa nuaa nyɛdiaa yɛ.Mi waŋnda haa nuuviaa nyɛdiaa o pollo niŋ le chuauwaa ndaa.
6 Ma kuɛ nyɛdiaa* nuuviaa o chiɛi wana cheleŋ niŋ,Nduyɛ ma chɔuviaa kilepiima nda mɛi kɔɔli o kpele wana dɛnɛ wɔɔŋndo niŋndaŋ.
7 Kɔɔle fondo nda lɔl ni,Nduyɛ a sɔla kola kuumbaŋ le hueiye le.
8 Mi piɔɔ bɛndu sia o pemboŋ choo wo liviaa nda,Ma kɔ vioŋnuŋ o poutaŋ bɛŋgu, kanifuule a nɔ la chiɛi le.
9 Ma faŋa chua nɔ finya le wo o mɛɛle kala ndɔ leŋ bɛŋgu,Nduyɛ, ma bii nyɛla wana bala fondoo wounuŋ ndaŋ o landei niŋ.
10 Mi hei tosa mbo wa balɔɔ kɔɔle fondo, o nɔ lɛ lanyɛ le wounɔŋ te,Nduyɛ mbo wa kɔlaŋ a nyɛm nda kuau woŋ o lebol a yiaaŋ.
11 Ma wa balɔɔ o pembuŋ bɛndoŋ choo o poutaŋ tɛɛŋ a paale kalaleŋ.Ma toosiaa muɛiyaŋ o doolala* ndalaŋ, kɛ mi kolɔɔ bii nda.
12 Wanaa cho niŋ piɔmndo wa cho hiouwɔɔ lachi a chaŋndo o chioo niŋ,Mi wanaa boliŋ tau wa wa chaŋndo le malaa,Kɛ Mɛlɛka chi ndi pɛŋ suɛi wɔɔŋ te.
13 Waŋnda apum tul nyɛ teŋgaa leyɛ.A sina nɛila ndɔlaŋ te,Nduyɛ a tul nɛila ndɔlaŋ kɔɔli le.
14 Mi wana diyaa chɛŋ idii puŋ,Mbo dii wana nɔ wana malaa le wo a wana bala fondoo,Nduyɛ te nyumndaŋ ma tol pɛ o kuɛ viileŋ.
15 Mi wana suundɛiyo chal paale delaaleŋ chumndo,Mbo dimi aa, ‘Wana o wana cho ya chɔ le!’
Nduyɛ mbo kumbu hɔlaa nduaa.
16 Mi wanaa dɛnɛ wɔɔŋnda haa pɛl chiɛila pilalaŋ ichɔl ma luɛi,Nduyɛ ipala a kindaŋ diolaŋ kɔɔli.
A chɛl nyɛ teŋgaa le.
17 Mi siooŋnde bii nda le paale siaa leŋ, mɛɛ siooŋnde bii waŋnda le nyumndaŋ yɛ.A nɔ isiooŋ le nyɛ luei waŋnda siooŋnde o nyumndaŋ niŋndo le.
18 Kɛ haupa mi mɛŋndaŋ ma hiounuŋ a nda.
Mi sendioo wa o lɛŋnde ndaleŋ choo,
Nduyɛ a miiŋgu lɛ o kpelela ndala makilepiilaŋ niŋ te.
19 Mɛɛ mɔmndo lo nuaa pɛ a wɔɔleŋ te paaleŋ le fula pɛ yɛ,Lende koni wanaa dɛnɛ wɔɔŋnda lo pɛ ni ma kuɛ o Sɛiyo* niŋ.
20 Kalaa ndaa cho puɛɛnɔŋ a nda, nduyɛ mi chaa de nda.
Wana o wana loonuŋ ndɛ a nda okɔɔ le.
Nduyɛ, a cho wanaa dɛnɛ wɔɔŋnda kiolɔɔ mɛɛ nda kialu nuaa yɔmndo yɛ.
21 Ma tosal wana lanɔ vilu le wo dɛnɛ wɔɔŋndo,Nduyɛ ma bii wana vii pɔnɔɔ wo biyɔɔ wɔɔŋndo.
22 Mi che bɛɛ wanaa kpaayaa bɛnduaa cho isisi, kɛ a hiu niŋ lachi a waa yoomu le.Kanifuule, Mɛlɛka* cho kpaaya ndɔɔ soliŋ kpeku mbo tɛɛmbuu nda.
23 Mɛlɛka* mal nda o ba ndaa choo ma yiyaŋ maa a nɔ tiindaŋndo, nduyɛ maa a choŋnuŋ hɛnɛkɛ.Kɛ o cho chɔɔ nyɛ o nyɛ nda cho tosaa.*
24 Ma fula tɔɔ le teleŋ biŋgi, okoŋ ma lo pɛ.
Ma sɔla bɛɛla tambɛilaŋ, nduyɛ ma vi mɛɛ wana o wana wu yɛ koni.A cho ko mɛɛ waŋnda kialu nuaa tɔlɔɔ ma yii ndu kpɔŋndaŋ yɛ.
25 Nɛɛnɛ nɔla yɛ mbo dimi maa wana lachoowaa ya cho ni,Ɔɔ mbo sɛɛŋgiaa ya?”
Tɛɛsiaalaŋ
^ Koŋ cho ni, paale ndɔle kɔɔsɔleŋ.
^ Ɔɔ naapum, “nyɛdiaa chɔluaa dia wo.”
^ Ɔɔ “yindɛila.”
^ Ɔɔ “Siɔl.” Koŋ cho ni, sɛila waŋnda chieeya kpou. Tofa Tɛɛsiaa.
^ Hibuluiye, “O.”
^ Hibuluiye, “O.”
^ Hibuluiye, “nɛila ndalaŋ.”
