Choobu 27:1-23
27 Mi Choobu hiau lachi a suɛi,* mbo dimi aa:
2 “I mɛnaŋ po o Mɛlɛka cho yoomu wo lo, o kilul la yamɛi lakafɛi,Mɛlɛka Kpaaya Kpou Kpou Wo, o tusi ya nyɛpalaa choo wo maa,
3 Te hueiyii Mɛlɛka wou ya o miliŋ nde cho wɔ pɛ ya niŋ,Nduyɛ mi wa wɔ yoomu,
4 I cho suɛi wɔɔŋ soliŋ o sondo le,Kɛlɛŋgaa niŋ te mi dimi choolaŋ!
5 Fɛɛŋ bɛɛ I dimi maa wanaa sakpuaa le nya cho le!
Nduyɛ haaa mi vi, I feŋaŋ o lo lechoo nuu choo le!*
6 I cho lo o sakpoyɛi nii choo, nduyɛ fɛɛŋ bɛɛ I feŋaŋ lechoo le.Te I cho wɔ pɛ yoomu,* kɔl nuu yaala* ya le.
7 Maa nyɛpalaa tol yaamɔɔwaa niaa choo maa wanaa dɛnɛ wɔɔŋnda,Mi nyɛpalaa tol wanaa chiŋalaŋ ya wa choo maa wanaa sendu le wa.
8 Tiindaŋ yɛɛ wana sina Mɛlɛka le wo nɔ yɛ te o sɔla pɛ tambei,Nduyɛ mi Mɛlɛka chua yoomu ndɔɔ?
9 Te dɛnɛ palaa komal ndu pɛ,Baa Mɛlɛka yaŋ pa nilaŋ o chaŋ o cho wa wo?
10 O nɔ pa yeemɛi o Mɛlɛka Kpaaya Kpou Kpou Wo niŋ?
O nyuna pa Mɛlɛka o piɛileŋ niŋ teleŋ o teleŋ le malaa?
11 I cho nya pɛɛku a kpaaya* Mɛlɛka nɔ wo okɔɔ.I cho nya nyɛ o nyɛ viŋ a Mɛlɛka Kpaaya Kpou Kpou Wo okɔɔ le.
12 Te o yɔŋ pɛ maa nya kpou che niŋ yilaŋndoŋ,Mɛɛ le yɛɛ nya cho yɛ niŋ sɔɔŋ fondoŋ dimioo?
13 Paawa* wana dɛnɛ wɔɔŋndo sɔla Mɛlɛka o ba wo cho hoo ni,Nduyɛ nyɛm kɛŋ o sɔla Mɛlɛka Kpaaya Kpou Kpou Wo o ba woŋ cho muŋ ni.
14 O yɔŋ bɛɛ mbo nɔ chuauwa tau, a cho nda diu a muɛi faŋnde,Nduyɛ chuauwaa nduaa mamaa nɔ niŋ nyɛdiaa bɔɔ le dio le.
15 Wanaa cho lo yoomu o yuŋgu ndɔɔ choo wa, naa wɔɔŋ wɔɔŋndo cho nda chii ni,Nduyɛ laandaa nda mɛi niŋ yoomu wa cheŋ niŋ le nda le.
16 O yɔŋ bɛɛ mbo nɔ kaniŋ humboŋ ŋ hɔbɛi maa chundu,Nduyɛ mbo kɛsi nyɛla chuɛɛnaŋndaŋ la hɔbɛi mɛɛ nda dii nuaa puuloo bemboo yɛ,
17 O yɔŋ bɛɛ mbo chuuŋgiaa laŋ tau,Wanaa sandu wa cho laŋ wounɔŋ ni,Nduyɛ wanaa tɛɛmbuu isɔɔ le wa cho kaniŋ ndɔŋ humboŋ piɔuwaŋ ni.
18 Mɛɛ chiɛi kaaŋguaa nɛi tambu le yɛ, lende koni chiɛi wana koŋ nɛi tambu le ni.O cho ko mɛɛ bafɛi* wana mɛŋgɛlaa taŋgul lo cho yɛ.
19 Te o wa kɔlaŋ hinilaŋ pɛ, mbo nɔ nyɛsɔlaa tau, kɛ nyɛsɔlaa koŋ lo ndu o ba le.Te o chɛŋ pɛ idii, o chi lɛ nyɛ o nyɛ le.
20 Siooŋii bɛnduei cho ndu biyɔɔ mɛɛ mɛŋma koŋgi bɛnduaŋ ma kumbu nuaa lɛŋndeŋ yɛ,Nduyɛ mi hueiyii fuku fukuei hiou a ndu a nyumndaŋ.
21 Hueiyii fula ba paaleŋ le chaŋ ndo ve cho hiouwɔɔ a ndu, wana chi lɛ ndu le,Mi i faŋa ndu bau o fondaŋ ndɔɔ.
22 O yɔŋ bɛɛ mbo kindiŋ le ndi nyaanɔŋndo,I cho ndu kuel sululu, mɔnɛi ve niŋ ndi le.
23 I cho ndu balaŋ tem,Nduyɛ mi i hɔŋ huiye o fondaŋ o wa ichali wo.*
Tɛɛsiaalaŋ
^ Hibuluiye, “talelaŋ.”
^ Ɔɔ “I cho hiouwɔɔ lachi a lo lechoo nuu chɔmndo.”
^ Ɔɔ “o palɛi nii niŋ kpou.”
^ Ɔɔ “mem.”
^ Ɔɔ naapum, “ba.”
^ Ɔɔ “Sala.”
^ Ɔɔ “yɛkpɛ.”
^ Ɔɔ naapum, “Waŋnda cho ndu balaŋ tem, nduyɛ a cho wa o fondaŋnda ndalaŋ ma hɔŋ huiye ndu kɔɔli.”
