Choobu 28:1-28
28 “Fondaa cho naa nda tuau kaniŋ humboŋ nda,Nduyɛ fondaa cho naa nda dindi kooliiyoŋ nda.
2 Lɛŋ nda kala chiliŋndoŋ ni,Nduyɛ o poutaŋ niŋ nda kala* chiliŋuŋ siaŋaŋ* ni.
3 Mi wanachioo hiŋ a nyɛ teŋgaa o fondaŋ nyumndaŋ ma cho wo.Mbo kuɛ o fondaŋ nyumndaŋ ma cho kpiŋgbi wo,Le pouta baa kalalaŋ touwɔɔ.
4 Mbo tou sooŋ nyɛm baa kalaŋ cho wo landaŋ a fondaŋ waŋnda chieeya cho wo,Fondaŋ wana del bɛɛ kɔl le lakɔ le wo.Mi waŋnda apum tol o yooleŋ, nduyɛ a wa a landaŋ lende ma tosa wallo.
5 O lɛŋndeŋ choo nyɛdiaa wul ni.Kɛ lebɛŋgu, wana che pɛ aa yiŋndeŋ le cho nyɔɔ kalaŋiaa ni.*
6 O lɛŋndeŋ bɛŋgu wana saaluŋ pou safaluɛɛ wo ni,Nduyɛ o chundoo niŋ kooliiyoŋ cho ni.
7 You biyaa kɛ kɛ sina nɛiyo le kɔlaŋ loŋ te,Nduyɛ siaaŋ tiŋioo bɛɛ chi wɔ ndu a lehɔl te.
8 Visi biyaa wɔɔŋ kɛ kɛ fuuluu wɔ loŋ te,Nduyɛ kpɔkuŋndo* keeku wɔ loŋ te.
9 Mi waŋndo pɛl pou kala kalaa a laba,Nduyɛ mbo lo pembei touwɔɔ haaa mbo puusiaa ndi.
10 Mbo soli nɛiyo o pouwo niŋ le mi mɛŋndaŋ ma wa keilaŋ,Nduyɛ mbo che nyɛ o nyɛ sɔvɛ.
11 Mbo kanda peelaŋ,Nduyɛ mbo sooluu nyɛm cho ŋ viaŋnaŋ leniŋ ndoŋ kpendekele.
12 Kɛ kuɛɛnɛ wana saaluŋ yɛ taasioo,Nduyɛ kuɛɛnɛ wana saaluŋ yɛ sinapɛŋgu kpeekpeiyo?
13 Wana o wana sina mɛɛ o cho o sɔvɛ yɛ le,Nduyɛ ba o ba cho o chieeŋndo choo ma saaluŋ ndu le.
14 Mɛŋma yiŋgilɛiyaŋ ma cho dimioo aa, ‘O cho ya o ba le!’
Nduyɛ pee mɛŋma ihɛllo bɛɛ cho dimioo aa, ‘O cho ya o ba le!’
15 Wana nɔla ndu piondɔɔ a kooliiyoŋ te.Nduyɛ mɛɛ mɛɛ kaniŋ humboŋ wa, ŋ nɔla ndu piondɔɔ le.
16 Kooliŋ fula Ofii yoŋ bɛɛ, ŋ nɔla miŋ pendu ndu le,Kɛlɛŋgaa niŋ te mi pou ɔnisi wo a pou safaluɛɛ wo nɔla ndu piondɔɔ.
17 A tuu kooliiyoŋ vɛlɛ a pou baa kala ŋɛlɛŋgi ŋɛlɛŋgioo a taasioo le,Kɛlɛŋgaa niŋ te mi nyɛi laandii nda toosiaa a koolii kɛndɛ kɛndɛiye* nɔla ndu piondɔɔ.
18 A tuu ndu a pouta baa kalalaŋ o peelo, ɔɔ pou kilisita wo le.Taasioo cho o sɔvɛ mbo hiau pouta baa kalalaŋ bɔlɔɔ cha.
19 Wana tuu ndu a pou topaasi nda fula Kusi wo le.Wana nɔla ma pendu ndu a koolii kɛndɛ kɛndɛi le.
20 Kɛ kuɛɛnɛ taasioo chɛŋ yɛ,Nduyɛ kuɛɛnɛ wana saaluŋ yɛ sinapɛŋgu kpeekpeiyo?
21 Wanachioo a nyaa yoomaa kɛ kɛ cheleŋ nɔla ma saaluŋ ndu le.Nduyɛ youwa o choo choo niŋ bɛɛ nɔla ma che ndu le.
22 Sɛiyo, fondaŋ wana kua o tambei niŋndo dimi aa,‘Konaa kinɛi naŋ tuei a ndu okɔɔ ni.’
23 Mɛlɛka sina nɛi o saaluŋ ndu wo.Ndupilɛ kpe sina naa o cho wa ni.
24 Te Mɛlɛka tofa pɛ o lɛŋndeŋ mɛɛlulaŋ,Mbo che nyɛ o nyɛ cho lechoo.
25 Mɛɛ o yɔŋ hueiyii nduɛi kpaayɛi bɛnduei,*Mbo tuu mɛɛ kpɛ mɛŋndaŋ ma cho yɛ,
26 Mbo kɛɛsiaa boonduŋ piɔɔ nɔ mbo sia woŋ,Nduyɛ mbo chɔm nɛila taŋndaŋ ma nɔ mi ma keeku o halaa niŋndaŋ.
27 O walta ndɔlaŋ niŋ, mbo kila taasioo nduyɛ mbo duau ndu o tofaa bɛŋgu.Mbo saaluŋ ndu, nduyɛ mbo tɛɛsiaa a ndu okɔɔ.
28 Okoŋ mbo dimul wanachioo aa:
‘Siooŋnde nɔɔ le Chɛhowa cho taasioo ni,Nduyɛ sɔɔŋ wɔɔŋndoŋ kɔɔ mulullo cho sinapɛŋgoo ni.’”
Tɛɛsiaalaŋ
^ Hibuluiye, “hulu.”
^ Ɔɔ “kapaa.”
^ Wana che pɛ naŋ chaa a walta ndaa tosa le nyɛm baa kalaŋ nuuviaa lɛŋndaŋ okɔɔ nda cho suɛi ni.
^ Ɔɔ “yalakanaa.”
^ Ɔɔ “koolii sɔla dindioo ve.”
^ Hibuluiye, “hueiyii nduɛi lusulɛiye.”